ក្រុម​Melbourne Victoty​បាន​រកបាន​ត្រឹម​១​ពិន្ទុ ស្របពេល​អវត្តមាន​កីឡាករ Keisuke Honda អ្នកចាត់ការ​ទូទៅ​ក្រុម​ជម្រើសជាតិ​កម្ពុជា​ជា​លើក​ទី​២

ក្រោយ​បញ្ចប់​បេសកកម្ម​ដឹកនាំ​ជម្រើសជាតិ​កម្ពុជា ក្នុង​យុទ្ធនា​ការប្រកួត​ក្នុង​ពានរង្វាន់​ធំ​ប្រចាំ​តំបន់​អាស៊ាន AFF Suzuki Cup 2018 លោក Keisuke Honda ក្នុងនាម​ជា​អ្នកចាត់ការ​ទូទៅ​របស់​ក្រុម បានធ្វើ​ដំណើរ​ទៅ​ប្រកប​អាជីព​ជា​កីឡាករ​បាល់ទាត់​វិញ​នៅ​ប្រទេស​អូស្ត្រាលី ជាមួយ​ក្លិប​Melbourne Victoty សមាជិក​ពានរង្វាន់​លី​គ​កំពូល​ប្រទេស​អូស្ត្រាលី​(A-League)​។

ពានរង្វាន់​លី​គ​កំពូល​របស់​ប្រទេស​អូស្ត្រាលី បាន​ធ្វើ​ដំណើរ​ចំនួន​១០​ប្រកួត​មកហើយ ខណៈ​ប្រកួត​ចុងក្រោយ​ក្នុង​ពានរង្វាន់ A-League ក្រុម​Melbourne Victory បាន​ប្រកួត​ស្មើគ្នា​ជាមួយ​ក្រុម​Wellington Phoenix ១​ទល់​១ នៅ​ល្ងាច​ថ្ងៃ​សុក្រ ទី​២៨ ខែធ្នូ ឆ្នាំ​២០១៨ លើ​ទីលាន​កីឡដ្ឋាន​AAMI Park ក្នុង​ទីក្រុង​Melbourne ។ លោក​Muscat ដែលជា​គ្រូបង្វឹក​មិនបាន​ដាក់​កីឡាករ Keisuke Honda ឲ្យ​ចូលរួម​ប្រកួត​២​លើក​ជាប់ៗ​គ្នា​មកហើយ​។

ក្រុម Melbourne Victoty កំពុង​ឈរ​ចំណាត់ថ្នាក់​លេខ​១ បណ្តោះ​អាសន្ន​ក្នុងចំណោម​ក្លិប​ទាំង​១០ ពោល​គឺ​ប្រកួត​ឈ្នះ​៦​លើក ស្មើគ្នា​២​លើក​និង​ចាញ់​២​លើក​។ ចំពោះ​កីឡាករ Honda វិញ​ទោះបីជា​ខកខាន​បង្ហាញខ្លួន​២​ប្រកួត​ជាប់​គ្នា​ក៏ដោយ តែ​រូបគេ​ធ្លាប់​បាន​រកបាន​គ្រាប់​បាល់​ចំនួន​៥​គ្រាប់​ម្នាក់ឯង​ឲ្យ​ក្រុម​ក្នុងចំណោម​ប្រកួត​កន្លង​មក​នេះ​ផងដែរ​។

កីឡាករ Keisuke Honda បាន​ចុះ​កិច្ច​សន្យា​រយៈពេល​១​ឆ្នាំ​ជាមួយ​ក្លិប​ថ្មី​នៅ​ប្រទេស​អូស្ត្រាលី នៅ​ដែល​កន្លងទៅ​គឺ​ក្លិប​Melbourne Victoty ខណៈ​រូបគេ​ធ្លាប់​បាន​រក​៣៧​គ្រាប់ និង​លេង​បាន​៩៨​ប្រកួត​ឲ្យ​ជម្រើសជាតិ​ជប៉ុន​។ រូបគេ​បាន​ចូលនិវត្តន៍​ពី​បាល់ទាត់​ជម្រើសជាតិ​ក្រោយ 2018 FIFA World Cup នៅ​ប្រទេស​រុស្ស៊ី ចប់​នៅពេល​ក្រុម​ជម្រើសជាតិ​ជប៉ុន​ធ្លា​ក់នៅ​វគ្គ​១៦​ក្រុម​ចុងក្រោយ​។

កីឡាករ Keisuke Honda បាន​ចាប់​អាជីព​បាល់ទាត់​ដំបូង​នៅក្នុង​ក្លិប Nagoya Grampus ក្នុងប្រទេស​កំណើត​រប​ស់​ខ្លួន​ចាប់ពី​ឆ្នាំ ២០០៤ ដល់​២០០៧ ស្រប​ពេល​នៅ​ឆ្នាំ​២០០៧ ដល់​២០០៩ ផ្លាស់​ទៅលេង​ក្នុង​ក្លិប VVV-Venlo ក្នុងប្រទេស​ហុ​ល្លង់ ហើយ នៅ​ឆ្នាំ ២០០៩ ដល់ ២០១៣ បាន​ផ្លាស់​ទៅកាន់​ក្លិប CSKA Moscow របស់​ប្រទេស​រុស្សី មុន​ផ្លាស់​ទៅកាន់ AC Milan របស់​អ៊ីតាលី នៅ​ចាប់ពី​ឆ្នាំ ២០១៤ ដល់​ឆ្នាំ​២០១៦ ខណៈ​រដូវ​កាល​២០១៧​នេះ​ប្តូរ​ទៅលេង​នៅ​ក្លិប Pachuca លី​គ​កំពូល​ប្រទេស​ម៉ិចស៊ីកូ​។

បើ​និយាយ​ពី​ក្នុង​ឈុត​ជម្រើសជាតិ​វិញ Honda បាន​ជាប់​ក្នុង​ឈុត​អាយុ​ក្រោម​២០ ឆ្នាំ (U-20) កាលពី​ឆ្នាំ​២០០៥ ហើយ​ចាប់ពី​ឆ្នាំ​២០០៦ ដល់​២០០៨ បាន​ចូលរួម​ជាមួយ​ក្រុម U-23 ជប៉ុន និង​ចាប់ពី​ឆ្នាំ ២០០៨ ដល់​បច្ចុប្បន្ន​ជាប់​ក្នុង​ជម្រើសជាតិ​ជប៉ុន​ឈុត​ធំ​។ ក្នុង​នោះ​គេ​ធ្លាប់​ទទួល​បាន​ពានរង្វាន់​ឯកត្តជនជា​ច្រើន​ទាំង​ក្នុង​ប្រទេស​ប្រចាំ​តំបន់​ទ្វីប​អាស៊ី​ និង​កម្រិត​ពិភព​លោក​ផងដែរ​៕

Source: Kampuchea Thmey Daily