ប្រធានាធិបតីអ៊ុយក្រែនលោក Petro Poroshenko កាលពីថ្ងៃពុធបានប្រកាសអំពីការបញ្ចប់ច្បាប់អាជ្ញាសឹកនៅតាមតំបន់ព្រំដែនរបស់ប្រទេស ដែលត្រូវបានដាក់កាលពីខែមុនបន្ទាប់ពីរុស្ស៊ីចាប់យកនាវា៣គ្រឿងរបស់កងទ័ពជើងទឹកក្រុងគៀវនៅក្នុងសមុទ្រ Azov។
លោក Poroshenko បានឲ្យដឹងអំឡុងកិច្ចប្រជុំក្រុមប្រឹក្សាសន្តិសុខនិងការពារជាតិនៅទីក្រុងគៀវថា “ថ្ងៃនេះនៅម៉ោង២រសៀល ច្បាប់អាជ្ញាសឹកត្រូវបញ្ចប់”។
ប្រធានាធិបតីរូបនេះបាននិយាយថា លោកបានឈានដល់ការសម្រេចចិត្តនេះដោយផ្អែកលើការវិភាគគ្រប់ជ្រុងជ្រោយនៃស្ថានការណ៍សន្តិសុខនៅក្នុងប្រទេស។
ការដាក់ច្បាប់អាជ្ញាសឹកបានកើតឡើងបន្ទាប់ពីលោក Poroshenko ព្រមានអំពីការកើនឡើងនៃកងកម្លាំងរុស្ស៊ីក្បែរព្រំដែនអ៊ុយក្រែនដែលបង្កើនវិបត្តិដ៏គ្រោះថ្នាក់បំផុតក្នុងរយៈពេលប៉ុន្មានឆ្នាំចុងក្រោយនេះរវាងប្រទេសជិតខាងអតីតសូវៀតទាំងពីរ។
ទូកល្បាតព្រំដែនរបស់ប្រទេសរុស្ស៊ីបានបាញ់និងរឹបអូសយកនាវាអ៊ុយក្រែន៣គ្រឿងរួមជាមួយនាវិក២៤នាក់កាលពីខែវិច្ឆិកានៅឆ្នេរសមុទ្រនៃតំបន់ Crimea។ នាវិកទាំងនោះនៅតែត្រូវឃុំខ្លួនដោយអាជ្ញាធររុស្ស៊ី។
ច្បាប់អាជ្ញាសឹកត្រូវបានដាក់នៅក្នុងតំបន់ចំនួន១០ជាប់ព្រំដែនរបស់រុស្ស៊ីឬតំបន់ដែលគ្រប់គ្រងដោយក្រុមបំបែកខ្លួនគាំទ្រដោយក្រុងមូស្គូក៏ដូចជានៅតាមឆ្នេរនៃសមុទ្រ Azov និងសមុទ្រខ្មៅផងដែរ។
កងកម្លាំងប្រដាប់អាវុធអ៊ុយក្រែនបានត្រៀមខ្លួនរួចរាល់ក្នុងការប្រយុទ្ធហើយត្រូវបានបំពេញបន្ថែមដោយការចំណាយនៃទុន បម្រុងដំណាក់កាលដំបូង។
ក្រុងគៀវក៏ហាមឃាត់បុរសរុស្ស៊ីដែលមានអាយុពី១៦ទៅ៦០ឆ្នាំពីការចូលក្នុងប្រទេសផងដែរ។
សេវាព្រំដែនបាននិយាយកាលពីថ្ងៃពុធថា ការចូលនេះត្រូវបានដាក់កំហិតចំពោះជនជាតិរុស្សីប្រហែល១,៦៥៥នាក់ចាប់តាំងពីថ្ងៃទី៣០វិច្ឆិកាមក៕ AFP
Source: Kampuchea Thmey Daily
0 Comments