ភ្នំពេញ ៖ កម្ពុជា គ្រោងនឹងរៀបចំការប្រកួតតន្ត្រីជាក្រុម «Battle of the Bands Cambodia» ឆ្នាំ២០១៩ជាលើកដំបូង ដើម្បីចម្រាញ់ជ្រើសរើសស្វែងរកក្រុមតន្ត្រីករដែលសមត្ថភាព និងទេពកោសល្យល្អបំផុតប្រចាំ នៅប្រទេសកម្ពុជា។
ថ្លែងនៅក្នុងសន្និសីទកាសែតមួយ កាលពីរសៀលថ្ងៃទី២៥ ខែមករា ឆ្នាំ២០១៩ នៅអគារ Exchange Square លោក កង ពិសិដ្ឋ តារាចម្រៀង និងជាគណៈកម្មការនៅក្នុងការប្រកួតបានឲ្យដឹងថា ការប្រកួតតន្ត្រីជាក្រុម «Battle of the Bands Cambodia»នេះ ក្រុមចូលរួមប្រកួតទាំងអស់ អាចដាក់ពាក្យសម្ដែងវគ្គខ្លីៗ ដែលនឹងចាប់ទទួលនៅថ្ងៃទី០១ រហូតដល់ថ្ងៃទី២៨ ខែកុម្ភៈ ឆ្នាំ២០១៩ ហើយនៅថ្ងៃទី ២៣ និង ២៤ ខែមីនា ឆ្នាំ២០១៩ ចាប់ផ្ដើមប្រកួតជាផ្លូវការនៅ Hard Rock Café ស្ថិតនៅអគារ Exchange Square រាជធានីភ្នំពេញ។
បន្ទាប់មកគណៈកម្មការប្រកួតដែលមាន លោក ហាន កាវី (Han Kavie) ដែលជាប្រធានរបស់ក្រុមហ៊ុន Seila Record លោក អ័ន ហ្គ្រេ ជាជនជាតិអូស្ត្រាលី និង លោក រូបលោកផ្ទាល់ ជាអ្នកដឹកនាំក្រុមអ្នកលេងហ្គីតានឹងសម្រិតសម្រាំងជ្រើសរើសយកក្រុមតន្ត្រីអាជីព ដែលមានសមត្ថភាពសម្រាប់ប្រកួតវគ្គពាក់កណ្ដាលផ្ដាច់ព្រ័ត្រ ដែលនឹងប្រព្រឹត្តទៅនៅថ្ងៃទី២០ ខែមេសា ឆ្នាំ២០១៩ និងប្រកួតវគ្គផ្ដាច់ព្រ័ត្រនៅថ្ងៃទី១៥ ខែឧសភា ឆ្នាំ២០១៩។
លោកបានបន្តថា ក្រុមតន្ត្រីដែលចុះឈ្មោះចូលរួមប្រកួត ត្រូវមានសមាជិក ចាប់ពី៣ ទៅដល់៨នាក់ ហើយសមាជិកក្រុមតន្ត្រី នៅក្នុងក្រុមនីមួយៗត្រូវមានជនជាតិខ្មែរយ៉ាងតិច៥០ភាគរយ នៃក្រុមចំពោះរាល់សមាជិកទាំងអស់រស់នៅអចិន្ត្រៃយ៍ និងធ្វើការពេញម៉ោងនៅកម្ពុជា ហើយរាល់សមាជិកក្រុមត្រូវមានអាយុចន្លោះពី១៦ឆ្នាំ ទៅ៣៥ឆ្នាំ។
លោក កង ពិសិដ្ឋ បានបញ្ជាក់ឲ្យដឹងថា ក្រុមតន្ត្រីចូលរួម ក្នុងការប្រកួតទាំងអស់ ត្រូវផ្ញើទាំង សំឡេង ឬវីដេអូនៃបទចម្រៀង ដែលជាស្នាដៃនិពន្ធផ្ទាល់របស់ក្រុមខ្លួន (Original Song) ឬក៏ជាបទចម្រៀងដែលច្រៀងឡើងវិញ (Cover Song) ទៅកាន់កម្មវិធី«Battle of the Bands Cambodia»តាមរយៈអ៊ីមែលbattleofthe bandskh ព@gmail.com ដោយភ្ជាប់មកជាមួយនូវទម្រង់ចុះឈ្មោះ ដែលអាចរកបាននៅ លើទំព័រ Facebook ផ្លូវការ ដែលមានឈ្មោះ ៖ @BattleoftheBandsKH។
គួរបញ្ជាក់ថា តន្ត្រីករ ដែលទទួលបានជ័យលាភី នឹងមានឱកាសទទួលបានកិច្ចព្រមព្រៀងថតវីដេអូជា មួយក្រុមហ៊ុន (Seila Records) ឈ្នះរង្វាន់ជាទឹកប្រាក់ចំនួន២.៥០០ដុល្លារអាមេរិក ឈ្នះទូរស័ព្ទដៃ IPhoneXR ចំនួនមួយគ្រឿង ការផ្តល់ជូននូវកញ្ចប់អ៊ីនធឺណិតពីក្រុមហ៊ុន Cellcard សម្រាប់សមាជិកក្រុមម្នាក់ៗ ដោយឥតគិតថ្លៃរយៈពេល១ឆ្នាំ និងឱកាសចុះកិច្ចសន្យាប្រគំតន្ត្រីរយៈពេល៣ខែ ជាមួយ Hard Rock Café ផងដែរ៕
Source: Kampuchea Thmey Daily
0 Comments