សហរដ្ឋអាមេរិក​ពន្យារពេល​ការ​បញ្ជូន​អ្នក​ស្វែងរក​សិទ្ធិ​ជ្រកកោន​ទៅ​ម៉ិ​ក​ស៊ិ​ក​វិញ

សហរដ្ឋអាមេរិក​ បាន​ពន្យារពេល​ផែនការ​របស់​ខ្លួន​ក្នុង​ការ​បញ្ជូន​អ្នក​ស្វែងរក​សិទ្ធិ​ជ្រកកោន​ត្រឡប់​ទៅ​ប្រទេស​ម៉ិ​ក​ស៊ិ​ក​វិញ​ ខណៈ​ដែល​ពាក្យ​បណ្តឹង​របស់​ពួកគេ​កំពុង​ត្រូវ​បាន​ពិនិត្យ​ស្រប​ពេល ​ដែល​រដ្ឋាភិបាល​ម៉ិ​ក​ស៊ិ​ក ​បាន​និយាយ​កាលពី​ថ្ងៃ​សុក្រ​ថា ខ្លួន “​មិន​យល់ស្រប​” ជាមួយ​គោលនយោបាយ​នេះ​ទេ។

មន្ត្រី​អាមេរិក​និង​ម៉ិ​ក​ស៊ិ​ក​បាន​និយាយ​ថា គោលនយោបាយ “Remain in Mexico” ដ៏​ចម្រូងចម្រាស​របស់​លោក​ប្រធានាធិបតី Donald Trump បាន​ចូល​ជា​ធរមាន​នៅ​ពេល​ថ្ងៃត្រង់​ថ្ងៃ​សុក្រ​ជាមួយនឹង​ការ​បញ្ជូន​ត្រលប់​ទៅវិញ​នៃ​ជន​ចំណាកស្រុក​អាមេរិក​កណ្តាល​ចំនួន​២០​នាក់​នៅ​ច្រក​ព្រំដែន San Ysidro ដែល​ពុះ​ចែក​ទីក្រុង San Diego របស់​រដ្ឋ​កាលីហ្វ័រ​នីញ៉ា​និង​ទីក្រុង Tijuana របស់​ប្រទេស​ម៉ិ​ក​ស៊ិ​ក។

ទោះបីជា​យ៉ាងណាក៏ដោយ អ្នកឆ្លើយឆ្លង​ព័ត៌មាន AFP នៅ​ព្រំដែន​បាន​និយាយថា គ្មាន​អ្នកស្វែងរក​សិទ្ធិ​ជ្រកកោន​ណា​ម្នាក់​ត្រូវបាន​បញ្ជូន​ត្រលប់​ទៅវិញ​ទេ​នៅ​ល្ងាច​ថ្ងៃ​សុក្រ​ហើយ​អាជ្ញាធរ​ម៉ិ​ក​ស៊ិ​ក​បាន​និយាយ​ថា កម្មវិធី​នេះ​ត្រូវ​បាន​ពន្យារពេល​។​

មន្ត្រី​អន្តោប្រវេសន៍​ម៉ិ​ក​ស៊ិ​កម្នា​ក់នៅ​ទីក្រុង Tijuana បាន​និយាយ​ក្នុង​លក្ខខណ្ឌ​មិន​បញ្ចេញ​ឈ្មោះថា ការវិល​ត្រលប់​មកវិញ​ជា​លើកដំបូង​ត្រូវបាន​រុញច្រាន​ទៅវិញ​។ វា​អាច​កើតឡើង​នៅ​ថ្ងៃ​ចន្ទ​ឬ​ថ្ងៃក្រោយ​នោះ​។​
​
ប្រភព​ដដែល​នេះ​បាន​ប្រាប់ AFP ថា “​វា​មិនមែនជា​រឿង​ធម្មតា​នោះទេ​។ វា​ជា​ស្ថានភាព​អន្តោប្រវេសន៍​ដ៏​ក្រៀមក្រំ​មួយ​។ អ្នក​ទាំងនេះ​គឺជា​ជន​អន្តោរ​ប្រវេសន៍​ដែលមាន​កាលបរិច្ឆេទ​តុលាការ​ដើម្បី​ស្វែងរក​សិទ្ធិ​ជ្រកកោន​ដែល​មានន័យថា អាជ្ញាធរ​សហរដ្ឋអាមេរិក​បានទទួល​យក​ថា ជីវិត​របស់​ពួកគេ​ពិតជា​ស្ថិតក្នុង​គ្រោះថ្នាក់​។ ប្រសិនបើ​មាន​អ្វី​កើតឡើង​ចំពោះ​ពួកគេ​នៅក្នុង​ប្រទេស​ម៉ិ​ក​ស៊ិ​ក គ្រួសារ​របស់​ពួកគេ​អាច​ប្តឹង​រដ្ឋាភិបាល​សហរដ្ឋអាមេរិក​ចំពោះ​ការបរាជ័យ​ក្នុងការ​ការពារ​ពួកគេ​”​។​

មុននេះ អ្នកនាំពាក្យ​ក្រសួងការបរទេស​លោក Roberto Velasco បាន​និយាយថា រដ្ឋាភិបាល​ម៉ិ​ក​ស៊ិ​ក​មិន​សប្បាយ​ចិត្តនឹង​គោលនយោបាយ​ថ្មី​នេះ​ទេ​ប៉ុន្តែ​នឹង​ទទួលយក​ជនអន្តោប្រវេសន៍​ដោយសារ​មូលហេតុ​មនុស្ស​ធម៌​។​

លោក Velasco បាន​ប្រាប់​សន្និសីទ​ព័ត៌មាន​មួយ​ថា “​រដ្ឋាភិបាល​ម៉ិ​ក​ស៊ិ​ក​មិន​យល់ស្រប​ចំពោះ​វិធានការ​ជា​ឯកតោភាគី​ដែល​អនុវត្ត​ដោយ​រដ្ឋាភិបាល​សហរដ្ឋ​អាមេរិក​ទេ​។ យ៉ាងណាក្តី យើង​សូមបញ្ជាក់​ពី​ការប្តេជ្ញាចិត្ត​របស់​យើង​ចំពោះ​ជន​ចំណាកស្រុក​និង​សិទ្ធិមនុស្ស​”​។​

លោក​និយាយថា ម៉ិ​ក​ស៊ិ​ក​នឹង​ផ្តល់​ទិដ្ឋាការ​មនុស្សធម៌​ដល់​អ្នក​វិល​ត្រលប់​មកវិញ​ដែល​អនុញ្ញាត​ឲ្យ​ពួកគេ​ស្នាក់នៅ​ក្នុងប្រទេស​នេះ​ជា​បណ្ដោះអាសន្ន​ខណៈ​ពួកគេ​រង់ចាំ​កាលបរិច្ឆេទ​របស់​តុលាការ​នៅក្នុង​សហរដ្ឋអាមេរិក​៕ AFP

​

[caption id="attachment_1018720" align="alignnone" width="700"] ​[/caption]

Source: Kampuchea Thmey Daily