ប្រជាជនអូស្ត្រាលីរាប់ពាន់នាក់ ត្រូវបានគេរំពឹងថា នឹងធ្វើការតវ៉ានៅថ្ងៃសៅរ៍ដែលជាថ្ងៃបុណ្យជាតិមួយដែលសម្គាល់ជាកំណើតនៃប្រទេសអូស្ត្រាលីសម័យទំនើប។
ទិវាអូស្ត្រាលីនៅថ្ងៃទី២៦ខែមករាគឺជាថ្ងៃខួបនៃការមកដល់របស់ “First Fleet” ក្នុងឆ្នាំ១៧៨៨នៅកំពង់ផែ Sydney Cove ដែលដឹកភាគច្រើនជាអ្នកទោសនិងកងទ័ពមកពីប្រទេសអង់គ្លេស។
សម្រាប់ជនជាតិដើមភាគតិចអូស្ត្រាលីមួយចំនួនដែលតាមដានវង្សត្រកូលរបស់ពួកគេនៅលើទ្វីបនេះកាលពី៥០,០០០ឆ្នាំមុន, ទិវានេះគឺជា “ថ្ងៃឈ្លានពាន” ដែលជាការចាប់ផ្តើមនៃអាណានិគមនិយមរបស់ចក្រភពអង់គ្លេសនៅលើទឹកដីកំណើតនិងការបង្ក្រាបយ៉ាងសាហាវព្រៃផ្សៃរបស់ពួកគេ។
លោក Joe Williams បុគ្គលិកសុខភាពផ្លូវចិត្តនិងជាអតីតកីឡាករបាល់ឱបអាជីពម្នាក់បាននិយាយថា “ការប្រារព្ធទិវាអូស្ត្រាលីនៅថ្ងៃទី២៦ខែមករាគឺជាការវាយលុក”។
លោកបានប្រាប់ Reuters ថា “ការអបអរការលុកលុយដែលធ្វើឲ្យប្រជាជនរបស់យើងត្រូវដួលរលំ ផ្លាស់ទីលំនៅនិងត្រូវគេជិះជាន់អស់រយៈពេល២៣០ឆ្នាំគឺជាការវាយលុកដ៏ជាក់ច្បាស់”។
ខណៈពេលដែលការស្ទាបស្ទង់មតិបានបង្ហាញថា រហូតដល់ទៅពាក់កណ្តាលនៃប្រទេសនេះគាំទ្រឲ្យផ្លាស់ប្តូរទិវាអូស្ត្រាលីនោះ រដ្ឋាភិបាលអភិរក្សបានស្ថិតនៅក្រោមសម្ពាធក្នុងការធ្វើឲ្យថ្ងៃទី២៦ខែមករាជាថ្ងៃបុណ្យជាតិដោយស្របច្បាប់។
លោក Nick Folkes វិចិត្រករម្នាក់មកពីទីក្រុងស៊ីដនីនិងជាស្ថាបនិកនៃគណបក្សសេរីភាពបាននិយាយថា “យើងគួរតែរក្សាថ្ងៃទី២៦ខែមករាជាថ្ងៃពិសេសមួយនៅក្នុងប្រតិទិនរបស់យើង”។
លោកបានបន្ថែមថា “វាមានន័យថា ជាការគោរពនិងការទទួលស្គាល់ចំពោះការលះបង់ដែលធ្វើឡើងដោយអ្នករុករក អ្នកតាំងទីលំនៅនិងអ្នកទោសរបស់យើង”។
រដ្ឋាភិបាលរបស់លោកនាយករដ្ឋមន្ត្រី Scott Morrison ដែលប្រឈមនឹងការបោះឆ្នោតទូទៅមួយនៅខែឧសភាគឺបានប្រឆាំងនឹងការផ្លាស់ប្តូរណាមួយហើយបានខិតខំធ្វើការដើម្បីបង្កើនការគាំទ្រដល់ថ្ងៃឈប់សម្រាកនេះ។
ក្នុងខែនេះ រដ្ឋាភិបាលបានបញ្ជាឲ្យក្រុមប្រឹក្សាមូលដ្ឋានរៀបចំពិធីអបអរសាទរសម្រាប់ពលរដ្ឋថ្មីក្នុងទិវាអូស្ត្រាលីនិងថ្ងៃឈប់សម្រាកទិវាសញ្ជាតិអូស្ត្រាលីនៅថ្ងៃទី១៧ខែកញ្ញា៕ REUTERS
Source: Kampuchea Thmey Daily
0 Comments