បន្ទាយមានជ័យ ៖ នាព្រឹកថ្ងៃទី២៥ ខែមករា ឆ្នាំ២០១៩នេះ នៅសាលប្រជុំក្នុងមន្ទីរសេដ្ឋកិច្ចហិរញ្ញវត្ថុ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានបើកកិច្ចប្រជុំ ស្តីពីការផ្ទៀងផ្ទាត់ និងធ្វើការវាយតម្លៃលើចលនទ្រព្យ អចលនទ្រព្យថយចុះ ឬ កើនឡើង និងការធ្វើប័ណ្ណកម្មសិទ្ធិរបស់រដ្ឋប្រចាំឆ្នាំ២០១៧ និង ២០១៨ ដោយមានការចូលរួម លោក ង៉ោ ម៉េងជ្រួញ អភិបាលរងខេត្ត គ្រប់ប្រធានមន្ទីរ អង្គភាព មន្ត្រីពាក់ព័ន្ធជាច្រើននាក់បានចូលរួម។
ក្នុងកិច្ចប្រជុំនោះ ប្រធានមន្ទីរអង្គភាព និងមន្ត្រីពាក់ព័ន្ធបានលើកឡើងរាល់បញ្ហាការវាយតម្លៃលើអចលនទ្រព្យន ចលនទ្រព្យ និងការធ្វើប័ណ្ណកម្មសិទ្ធិរបស់រដ្ឋប្រចាំឆ្នាំ២០១៧ និង ២០១៨ មាន៤ចំណុច ៖
១-តារាងដីធ្លី និងអគារ ,២-តារាងសម្ភារៈបរិក្ខារបច្ចេកទេសឧស្សាហកម្ម, ៣-តារាងយានយន្ត និងគ្រឿងចក្រ ,៤-តារាងសម្ភារៈបរិក្ខារជាដើម។
ក្នុងកិច្ចប្រជុំនោះដែរ បានធ្វើការវាយតម្លៃអចលនទ្រព្យ ត្រូវផ្អែកតាមតារាងមូលដ្ឋានគិតពន្ធលើអចលនទ្រព្យ នៃតំបន់ផ្សេងៗ និងផ្អែកលើការវាយតម្លៃជាក់ស្ដែងរបស់គណៈកម្មាធិការបញ្ជីសារពើភណ្ឌទ្រព្យសម្បត្តិរដ្ឋ ដើម្បីឲ្យបានទិន្នន័យជាមូលដ្ឋានសម្រាប់បញ្ចូលទៅក្នុងគម្រោងប្រព័ន្ធព័ត៌មានវិទ្យាគ្រប់គ្រងហិរញ្ញវត្ថុសាធារណៈ។
ក្នុងអង្គប្រជុំនោះ បានបញ្ជាក់ឲ្យដឹងទៀតថា មន្ទីរអង្គភាពទាំងអស់ ត្រូវទទួលខុសត្រូវក្នុងការចុះបញ្ជី និងរៀបចំតារាងប្រៀបធៀបកើន និងថយចុះទ្រព្យសម្បត្តិរបស់រដ្ឋរបស់ខ្លួនទាំងអស់ ត្រូវធានាការរៀបចំឲ្យបានត្រឹមត្រូវ បើសិននៅថ្ងៃក្រោយ មានការត្រួតពិនិត្យពីសមត្ថកិច្ចណាមួយឃើញមានការចុះខ្វះខាត លាក់លៀមថយចុះលើតារាងបញ្ជីដែលបានកត់ត្រានោះ មិនប្រក្រតី ដោយប្រការណាមួយ និងអនុវត្តខុសនីតិវិធីហិរញ្ញវត្ថុប្រធានមន្ទីរ អង្គភាពទាំងអស់ ត្រូវទទួលខុសត្រូវនៅមុខច្បាប់។
ក្នុងកិច្ចប្រជុំនោះដែរ លោក ង៉ោ ម៉េងជ្រួញ បានមានប្រសាសន៍ថា ការផ្ទៀងផ្ទាត់បញ្ជីសារពើភណ្ឌទ្រព្យសម្បត្តិរដ្ឋ គឺត្រូវយកលេខតារាងប្រៀបធៀបកើនឡើង និងថយចុះចាប់ពីឆ្នាំ២០១៧ ដល់ឆ្នាំ២០១៨ អាជ្ញាធរ ប្រធានមន្ទីរគ្រប់អង្គភាព ត្រូវពិនិត្យ និងឯកភាពគ្នាជាមុនសិនមុន និងប្រគល់ទៅឲ្យប្រធានគណៈកម្មការបញ្ជីសារពើភណ្ឌ ដើម្បីបូកសរុប និងផ្ញើជូនទៅក្រសួងសេដ្ឋកិច្ច និងហិរញ្ញវត្ថុដែលជាអាជ្ញាធរគ្រប់គ្រងទ្រព្យសម្បត្តិរបស់រដ្ឋ។
ក្នុងនោះអង្គភាពទាំងអស់ ត្រូវកំណត់តម្លៃ ចលនទ្រព្យ អចលនទ្រព្យ ធ្វើប័ណ្ណកម្មសិទ្ធិឲ្យបានត្រឹមត្រូវ ១-ដីធ្លី អគារ ទំហំ ម៉ែត្រការ៉េ កន្លែង, ២-តារាងសម្ភារៈបរិក្ខារបច្ចេកទេសឧស្សាហកម្ម, ៣-តារាងយានយន្ត និងគ្រឿងចក្រ ,៤តារាងសម្ភារៈបរិក្ខារជាដើម៕
Source: Kampuchea Thmey Daily
0 Comments