អ្នកពិគ្រោះយោបល់ជើងចាស់មកពីគណបក្សសាធារណរដ្ឋលោក Roger Stone ត្រូវបានចាប់ខ្លួននៅក្នុងការវាយឆ្មក់មុនពេលព្រឹកព្រលឹមមួយក្នុងរដ្ឋ Florida កាលពីថ្ងៃសុក្រ។ លោកបានក្លាយជាសហការីទី៦ក្នុងចំណោមសហការីនៃយុទ្ធនាការរបស់លោកប្រធានាធិបតី Donald Trump ដែលត្រូវបានចោទប្រកាន់នៅក្នុងការស៊ើបអង្កេតចូលទៅក្នុងការឃុបឃិតជាមួយរុស្ស៊ីក្នុងការបោះឆ្នោតឆ្នាំ២០១៦។
លោក Stone ត្រូវរងការចោទប្រកាន់ពីបទនិយាយកុហកទៅសភានិងការរាំងស្ទះដល់ការពិនិត្យអំពីទំនាក់ទំនងរបស់គាត់ជាមួយ WikiLeaks ដែលបានទម្លាយព័ត៌មានដែល Hack ដោយរុស្ស៊ីពីយុទ្ធនាការឆ្នាំ២០១៦របស់លោកស្រី Hillary Clinton ខាងគណបក្សប្រជាធិបតេយ្យដើម្បីជួយដល់លោក Trump។
លោក Stone ក៏ត្រូវបានចោទប្រកាន់ពីបទរារាំងសាក្សីផងដែរបន្ទាប់ពីគាត់ត្រូវបានគេចោទប្រកាន់ថាបានព្យាយាមបញ្ចុះបញ្ចូលមិត្តរួមការងារម្នាក់ឲ្យកុហកសភាដូចគ្នាដើម្បីការពារគាត់។
សេតវិមានបានការពារលោក Trump ដោយនិយាយថា ការចោទប្រកាន់លោក Stone ដោយរដ្ឋអាជ្ញាពិសេសលោក Robert Mueller ដែលដឹកនាំការស៊ើបអង្កេតចូលទៅក្នុងការឃុបឃិតការបោះឆ្នោតជាមួយប្រទេសរុស្ស៊ីនៅក្នុងឆ្នាំ២០១៦គឺមិនទាក់ទងជាមួយលោក Trump ទេ។
អ្នកនាំពាក្យសេតវិមានលោកស្រី Sarah Sanders បានប្រាប់ទូរទស្សន៍ CNN ថា “រឿងនេះមិនមានជាប់ពាក់ព័ន្ធនឹងលោកប្រធានាធិបតីទេហើយគ្មានអ្វីពាក់ព័ន្ធនឹងសេតវិមានឡើយ”។
អ្នកយកព័ត៌មានរាប់រយនាក់បានប្រមូលផ្តុំជុំវិញលោក Stone ខណៈពេលដែលអ្នកតវ៉ាជាច្រើនបានស្រែកថា “ឃុំឃាំងគាត់ទៅ” ស្របពេលដែលគាត់បានប្រកាសពីភាពគ្មានកំហុសនិងភាពស្មោះត្រង់របស់គាត់ចំពោះលោក Trump ។
លោកបាននិយាយថា “ខ្ញុំត្រូវគេចោទប្រកាន់ដោយមិនពិត។ ខ្ញុំនឹងអះអាងពីភាពគ្មានកំហុសចំពោះការចោទប្រកាន់ទាំងនេះ។ ខ្ញុំនឹងយកឈ្នះពួកគេនៅក្នុងតុលាការ។ ខ្ញុំជឿជាក់ថានេះគឺជាការស៊ើបអង្កេតដែលជំរុញដោយរឿងនយោបាយ”។
គួរបញ្ជាក់ថា លោក Stone បានចាប់ផ្តើមអាជីពក្នុងនាមជាជំនួយការយុទ្ធនាការរបស់លោក Richard Nixon និងមានស្នាមសាក់រូបប្រធានាធិបតីសហរដ្ឋអាមេរិកដំបូងគេដែលលាលែងពីតំណែងរូបនេះនៅលើខ្នងរបស់គាត់។ លោក Stone បានចំណាយពេលជាច្រើនទសវត្សក្នុងការផ្តល់ប្រឹក្សាដល់យុទ្ធនាការនយោបាយជាច្រើន៕ AFP
Source: Kampuchea Thmey Daily
0 Comments