ភ្នំពេញ ៖ ស្ត្រីម្នាក់បានស្លាប់និងម្នាក់ទៀតរងរបួសស្រាល ខណៈជួបគ្រោះថ្នាក់ចរាចរណ៍មួយរវាងរថយន្តសណ្តោងកុងតឺន័រនិងម៉ូតូ។
ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង១៥និង៣៥នាទីរសៀល ថ្ងៃទី២៦ ខែមករា ស្ថិតនៅតាមបណ្តោយផ្លូវជាតិលេខ១ ក្នុងភូមិព្រែកធំ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
យោងតាមប្រភពពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅទទួលបន្ទុកចរាចរណ៍បានឲ្យកម្ពុជាថ្មីដឹងថា នៅមុនពេលកើតហេតុគេឃើញស្ត្រីរងគ្រោះទាំងពីរនាក់បានជិះម៉ូតូមួយគ្រឿងម៉ាកសង់ស៊េរី២០១៥ ពណ៌ខ្មៅ ពាក់ស្លាកលេខ ភ្នំពេញ1AY-7687 បានធ្វើដំណើរតាមបណ្តោយផ្លូវជាតិលេខ១ ក្នុងទិសដៅពីកើតទៅលិច។ លុះមកដល់ចំណុចកើតហេតុជនរងគ្រោះបានបត់ម៉ូតូឆ្លងមកឆ្វេងដៃស្របពេលនោះ ក៏រថយន្តសណ្តោងកុងតឺន័រមួយគ្រឿង ពណ៌ក្រហម ពាក់ស្លាកលេខ ភ្នំពេញ4A-1975 មកពីក្រោយក៏ប៉ះកន្ទុយម៉ូតូបណ្តាលឲ្យធ្លាក់ស្ត្រីម្នាក់អង្គុយពីក្រោយកិនធ្លាយពោះស្លាប់ភ្លាមៗ ដោយឡែកអ្នកបើកបរម៉ូតូគ្រាន់តែរលាត់ដៃជើងចំណែករថយន្តបើកទៅមុខបន្តិចក៏ឈប់ហើយអ្នកបើកបរបានរត់គេចបាត់ស្រមោល។
លោកអធិការរងបានបន្តថា ស្ត្រីអ្នករួមដំណើរដែលស្លាប់នោះឈ្មោះអ៊ូរ បញ្ញា អាយុ៣៣ឆ្នាំដោយឡែកអ្នកឌុបឈ្មោះឡុង ឌីវណ្ណះ អាយុ៣៨ឆ្នាំពួកគេទាំងពីររស់នៅក្នុងភូមិព្រែកធំសង្កាត់ក្បាលកោះខណ្ឌច្បារអំពៅរាជធានីភ្នំពេញ។ ចំពោះរថយន្តនិងម៉ូតូត្រូវបានបញ្ជូនទៅកាន់ការិយាល័យនគរបាលជើងគោកនៃស្នងការដ្ឋាននគរបាលរាជធានីភ្នំពេញដើម្បីដោះស្រាយតាមផ្លូវច្បាប់។ រីឯសពត្រូវបានសាច់ញាតិបញ្ជូនមកលំនៅឋានដែលស្ថិតនៅក្បែចំណុចកើតហេតុធ្វើបុណ្យតាមប្រពៃណី៕
Source: Kampuchea Thmey Daily
0 Comments