យ៉ាងហោចណាស់មានគ្រូបង្វឹកបាល់ទាត់ដែលកំពុងបម្រើការងារក្នុងស្រុកបានបញ្ចប់វគ្គសិក្សាគ្រូបង្វឹកផ្នែកបាល់ទាត់កម្រិតខ្ពស់ (FIFA Elite Coaching Course) ដោយជោគជ័យកាលពីពេលថ្មីៗនេះក្រោមការរៀបចំពីសំណាក់សហព័ន្ធកីឡាបាល់ទាត់កម្ពុជា (ស.ប.ក) សហការជាមួយសហព័ន្ធកីឡាបាល់ទាត់ពិភពលោក (FIFA)។
វគ្គសិក្សាដែលមានគ្រូឧន្ទេសមកពីបរទេសនោះរៀបចំពីថ្ងៃទី២១ ដល់២៣ ខែមករា ឆ្នាំ២០១៩ នៅមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ ខណៈវគ្គសិក្សានេះដែរក៏មានផ្តោតទាំងការសិក្សាផ្នែកទ្រស្តីនិងការអនុវត្តន៍លើទីលានផងដែរ។ គោលដៅនៃការសិក្សាវគ្គនេះគឺផ្តោតលើការអប់រំនៃការវិវត្តន៍ចុងក្រោយលើវិស័យបាល់ទាត់ដែលពិភពលោកគេកំពុងតែអនុវត្តន៍។
គ្រូបង្វឹកបាល់ទាត់ទាំងអស់ដែលបានចូលសិក្សាវគ្គពិសេសនេះមានដូចជាលោក អ៊ុង កងយ៉ានិត មកពីសហព័ន្ធកីឡាបាល់ទាត់កម្ពុជា, ហៅ សុជាតិនិងលី រ៉ាវី មកពីក្លិបបឹងកេត, ឡាយ រស្មី មកពីព្រះខ័នរាជស្វាយរៀង, ឃឹម បូរី និងមាស ចាន់ណា មកពីណាហ្គាវើល សុក វាសនា មកពីអាស៊ីអឺរ៉ុប ភា សុភ័ត្រា មកពីក្រសួងការពារជាតិ ប្រាក់ វុទ្ធី និងជិន ជុំ មកពីអគ្គីសនីកម្ពុជា, ហុក សុជីវ័ន្ត និងវីលីកា មកពីវិសាខា, Aluja Berengoe Jordi មកពីក្លិបអង្គរថាយហ្គឺរ, គឹម ភក្តី, ឡុង ឬទ្ធា និងសាប៊ូន វីនតា មកពីសាលាបាល់ទាត់ជាតិបាទី អ៊ុក សារ៉េត មកពីសូលទីឡូអង្គរ, ជា តារា មកពីព្រៃវែង Osaka Samueleromosell មកពីក្លិបអគ្គស្នងការដ្ឋាននគរបាលជាតិ។
សូមរំលឹកថា ជាទូទៅមិនថា FIFA ឬសហព័ន្ធកីឡាបាល់ទាត់ទ្វីបអាស៊ី គឺតែងតែចុះមកធ្វើសកម្មភាពនានានៅកម្ពុជា ហើយវគ្គសិក្សាខាងលើនេះ គឺសមស្របនឹងពេលដែលលីគកំពូលកម្ពុជា កំពុងតែសម្រាកហើយបានផ្តល់ឱកាសពេញលេញដល់គ្រូបង្វឹកឬភាគីពាក់ព័ន្ធក្នុងការអភិវឌ្ឍន៍ខ្លួនស្វាគមន៍បេសកកម្មថ្មីៗក្នុងរដូវកាលឆ្នាំ២០១៩ ខាងមុខនេះ៕
Source: Kampuchea Thmey Daily
0 Comments