ពលរដ្ឋខេត្តស្វាយរៀង ត្រេកអរ ក្រោយទទួលបានមណ្ឌលសុខភាពថ្មីសន្លាងជាអំណោយដ៏ថ្លៃថ្លារបស់សម្តេចតេជោ

ស្វាយរៀង ៖ ប្រជាពលរដ្ឋទូទាំងខេត្តស្វាយរៀង បានសម្តែងនូវការត្រេកអរយ៉ាងពន់ពេក និងអរគុណចំពោះសម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ដែលបានផ្ដល់អំណោយដ៏ថ្លៃថ្លានូវមណ្ឌលសុខភាពថ្មីសន្លាងដែលមានអត្ថប្រយោជន៍យ៉ាងខ្លាំងចំពោះពួកគាត់បានសម្រេចដូចក្តីបំណង។

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានសម្ដែងការសាទរក្នុងពិធីសម្ពោធអគារមណ្ឌលសុខភាពគគីរនាព្រឹកថ្ងៃទី២៧ ខែមករា ឆ្នាំ២០១៩ ស្ថិតនៅឃុំគគីរ ស្រុករមាសហែក ខេត្តស្វាយរៀង។

លោកជំទាវកិត្តិសង្គហបណ្ឌិតបានថ្លែងនូវការផ្តាំផ្ញើសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសូមសម្តែងនូវការកោតសរសើរដោយស្មោះ ប្រគេនថ្វាយចំពោះ ព្រះថេរានុត្ថេរៈគ្រប់ព្រះអង្គ និងជូនចំពោះអស់លោក លោកស្រី លោកតា លោកយាយ អាជ្ញាធរដែនដីគ្រប់លំដាប់ថ្នាក់ និងបងប្អូនប្រជាពលរដ្ឋទាំងអស់ ដែលតែងតែបានចូលរួមចំណែកអស់ពីកម្លាំងកាយចិត្ត ក្នុងកិច្ចអភិវឌ្ឍនៅមូលដ្ឋានក្នុងពេលកន្លងមក រហូតធ្វើឲ្យមូលដ្ឋានភូមិ-ឃុំនេះសម្រេចបាននូវសមិទ្ធផលថ្មីៗជាច្រើន។

ជាក់ស្តែង អគារមណ្ឌលសុខភាពគគីរថ្មីសន្លាង ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោហ៊ុនសែន និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ដែលបានរួមចំណែកយ៉ាងសំខាន់ក្នុងការផ្តល់ សេវាថែទាំ និងព្យាបាលដល់ប្រជាពលរដ្ឋឥតគិតថ្លៃជាពិសេស ស្ត្រី និងកុមារ និងមិនត្រឹមតែផ្តល់ការថែទាំនិងព្យាបាលនៅក្នុងឃុំគគីរប៉ុណ្ណោះទេ ប៉ុន្តែថែមទាំងអាចផ្តល់សេវាព្យាបាលជូនដល់បងប្អូន នៅតាមបណ្តាឃុំនានាជុំវិញស្រុករមាសហែកផងដែរ ពោលគឺនឹងរួមចំណែកជំរុញការផ្តល់សេវាថែទាំសុខភាពនៅក្នុងខេត្តស្វាយរៀង កាន់តែប្រសើរឡើង។

លោកជំទាវកិត្តិសង្គហបណ្ឌិតបានថ្លែងបន្តថា អគារមណ្ឌលសុខភាពដែលបាននិងកំពុងរួមគ្នាប្រារព្ធពិធីសម្ពោធដាក់ឲ្យប្រើប្រាស់នាពេលនេះ ជាគំនិតផ្តួចផ្តើមរបស់ សម្តេចតេជោនាយករដ្ឋមន្ត្រី បើទោះបីជាចំនួនប្រជាពលរដ្ឋនៅឃុំគគីរ នៅពុំទាន់សមាមាត្រសមស្របនឹងបង្កើតមណ្ឌលសុខភាពយ៉ាងក្តី។ ប៉ុន្តែ ដោយមានការគិតគូរអំពីសុខទុក្ខ ពិសេស បញ្ហាសុខភាពរបស់បងប្អូនដែលរងគ្រោះដោយសារគ្រាប់បែកគីមី ដែលអាមេរិកបានទម្លាក់នៅចន្លោះឆ្នាំ ១៩៧០-១៩៧៥ ទើប សម្តេចតេជោ និងសម្តេចកិត្តិព្រឹទ្ធបណ្ឌិតបានសម្រេចផ្តល់ជូនអគារមណ្ឌលសុខភាពគគីរដ៏ថ្មីសន្លាងនេះឡើង ដើម្បីឆ្លើយតបទៅនឹងតម្រូវការជាក់ស្តែង បន្ទាប់ពីក្រសួងសុខាភិបាលបានរកឃើញថា មានបងប្អូនប្រជាពលរដ្ឋដែលរងផលប៉ះពាល់ដោយសារធាតុគីមី ឈ្មោះ អឺជែន អូរ៉េន (Agent Orange) ជា សារធាតុ ហឺបីសាយ (Herbicide) ដ៏សាហាវដែលបានប្រើប្រាស់នៅក្នុងសង្គ្រាមដែលសហរដ្ឋអាមេរិក ទម្លាក់ ដើម្បីកម្ទេចគម្របព្រៃឈើ និងកងទ័ពវៀតណាមខាងជើង និងទ័ពវៀតកុង នៅចន្លោះឆ្នាំ ១៩៦១-១៩៧១។

លោកជំទាវកិត្តិសង្គហបណ្ឌិតម៉ែន សំអនបានថ្លែងបន្ថែមថា សារធាតុគីមីនេះ បានបណ្តាលឲ្យកើតចេញជារោគសញ្ញាមិនប្រក្រតីមួយចំនួនដូចជា ក្បាលធំ ស្វិតដៃ ស្វិតជើង ថប់ដង្ហើម ប្រតិកម្ម-ស្បែក និងរមាស់ជាដើម។

ទន្ទឹមនឹងនេះ សម្តេចតេជោ ក៏បានណែនាំទៅក្រសួងសុខាភិបាល ដាក់បងប្អូនប្រជាពលរដ្ឋក្នុងឃុំគគីរ ស្រុករមាសហែក ខេត្តស្វាយរៀង ដែលរងគ្រោះដោយសារសារធាតុគីមីអាមេរិក ទៅក្នុងកម្មវិធីសមធម៌ ពោលគឺទទួលបានការពិនិត្យ និងព្យាបាលនៅមន្ទីរពេទ្យរដ្ឋដោយមិនគិតថ្លៃ ។

ក្នុងរយៈពេល៤០ឆ្នាំកន្លងមកនេះ យើងបានរួមគ្នាជាកម្លាំងកសាងនិងអភិវឌ្ឍប្រទេសឡើងវិញលើគ្រប់វិស័យ ក្នុងនោះក៏មានវិស័យសុខាភិបាល ក៏ជាវិស័យអាទិភាពមួយយ៉ាងសំខាន់ ដែលរាជរដ្ឋាភិបាលបានយកចិត្តទុកដាក់ និងត្រូវបានអភិវឌ្ឍយ៉ាងឆាប់រហ័សគួរឲ្យកត់សំគាល់ ទាំងការស្តារ ការពង្រីកហេដ្ឋារចនាសម្ព័ន្ធមូលដ្ឋានសុខាភិបាល ការអភិវឌ្ឍនិងការពង្រីកសមត្ថភាពស្ថាប័ន ការបង្កើនសមត្ថភាពធនធានមនុស្ស ឱ្យបានឆ្លើយតបទៅនឹងតម្រូវការផ្នែកសុខភាពជាសារវន្តរបស់ប្រជាពលរដ្ឋទូទាំងប្រទេស។

រាជរដ្ឋាភិបាលកម្ពុជាក្នុងនីតិកាលទី៦ នៃរដ្ឋសភា បានប្តេជ្ញាចិត្តយ៉ាងមោះមុតជាបន្តទៀត ក្នុងការកាត់បន្ថយភាពក្រីក្រឲ្យបានជាអតិបរមា និងការធានានូវសូចនាករសំខាន់ៗក្នុងវិស័យសង្គមកិច្ច ជាពិសេសវិស័យសុខាភិបាល និងបន្តអនុវត្តនូវគោលនយោបាយបង្កើនវិសាលភាព ប្រសិទ្ធភាព និងសេវាសុខភាពសាធារណៈឲ្យកាន់តែប្រសើរឡើង ទទួលបាននូវការជឿទុកចិត្តពីប្រជាពលរដ្ឋតាមរយៈការធ្វើកំណែទម្រង់កាន់តែស៊ីជម្រៅ ខ្លាំងក្លា និងប្រកបដោយប្រសិទ្ធភាពខ្ពស់៕