មន្ត្រីសិទ្ធិមនុស្សកំពូលម្នាក់របស់អង្គការសហប្រជាជាតិបាននិយាយកាលពីថ្ងៃសុក្រថា ប្រទេសបង់ក្លាដែសមិនត្រូវប្រញាប់ប្រញាល់តាំងទីលំនៅជនភៀសខ្លួនមកពីជនជាតិភាគតិចមូស្លីមរ៉ូហ៊ីងយ៉ាពេកទេស្របពេលមានផែនការរើសហគមន៍នេះទៅកាន់កោះមួយដែលងាយរងគ្រោះដោយអាកាសធាតុមូសុង។
ជនមូស្លីមរ៉ូហ៊ីងយ៉ាប្រហែល៧៥០,០០០នាក់មកពីប្រទេសមីយ៉ាន់ម៉ាបានរត់គេចពីការបង្ក្រាបបង្ហូរឈាមដោយយោធានៅរដ្ឋរ៉ាក់ឃីនភាគខាងជើងចាប់តាំងពីខែសីហាឆ្នាំ២០១៧មកហើយបានចូលរួមជាមួយជនភៀសខ្លួនប្រហែល៣០០,០០០នាក់ដែលកំពុងរស់នៅក្នុងជំរំជនភៀសខ្លួនបង់ក្លាដែសដែលពោរពេញដោយមនុស្សកកកុញរួចទៅហើយ។
រដ្ឋាភិបាលក្រុងដាកាបានចំណាយប្រាក់ប្រមាណ២៨០លានដុល្លារអាមេរិកដើម្បីប្រែក្លាយកោះ Bhashan Char ឲ្យក្លាយទៅជាជំរំមួយសម្រាប់ជនភៀសខ្លួនមួយចំនួន។ Bhashan Char ជាកោះដីល្បប់ដែលទើបផុសចេញពីឈូងសមុទ្រ Bengal កាលពីជិតពីរទសវត្សរ៍មុន។
ប៉ុន្តែកោះនេះត្រូវចំណាយពេលមួយម៉ោងសម្រាប់ការធ្វើដំណើរតាមទូកពីដីគោកនៅជិតបំផុតហើយលាតសន្ធឹងលើសមុទ្រដែលងាយរងគ្រោះដោយសារព្យុះសាហាវៗ។ កោះនេះស្ថិតលើតំបន់ឆ្នេរដែលជាកន្លែងអាកាសធាតុអាក្រក់បានសម្លាប់មនុស្សរាប់សែននាក់ក្នុងរយៈពេលប៉ុន្មានទសវត្សថ្មីៗនេះ។
លោកស្រី Yanghee Lee អ្នករាយការណ៍ពិសេសផ្នែកសិទ្ធិមនុស្សរបស់អង្គការសហប្រជាជាតិបានធ្វើទស្សនកិច្ចនៅកោះនេះកាលពីថ្ងៃព្រហស្បតិ៍ហើយបានជំរុញឲ្យប្រទេសបង់ក្លាដែសសង្កេតមើលដោយប្រុងប្រយ័ត្ននិងអត់ធ្មត់មុនពេលដំណើរការផែនការតាំងទីលំនៅថ្មី។
លោកស្រីបានប្រាប់អ្នកយកព័ត៌មានកាលពីថ្ងៃសុក្រថា “មិនគួរប្រញាប់ប្រញាល់បញ្ជូនជនភៀសខ្លួនទៅតាំងទីលំនៅនៅទីនោះពេកទេមុនរដូវមូសុង”។
លោកស្រី Lee បានណែនាំដល់រដ្ឋាភិបាលក្រុងដាកាឲ្យចែករំលែកការសិក្សាអំពីលទ្ធភាពនិងអនុញ្ញាតឲ្យអង្គការសហប្រជាជាតិអនុវត្តការវាយតម្លៃផ្នែកបច្ចេកទេសនិងមនុស្សធម៌រួមទាំងការវាយតម្លៃផ្នែកសន្តិសុខផងដែរ មុនពេលបង្កើតផែនការណាមួយបន្ថែមទៀតសម្រាប់តាំងទីលំនៅមនុស្សនៅលើកោះនេះ៕ AFP
Source: Kampuchea Thmey Daily
0 Comments