ភ្នំពេញ ៖ មន្ត្រីជាន់ខ្ពស់អាជ្ញាធរជាតិប្រយុទ្ធនឹងជំងឺអេដស៍បានអំពាវនាវឲ្យយុវវ័យកម្ពុជាការពារខ្លួនកុំឲ្យឆ្លងជំងឺអេដស៍នៅក្នុងទិវានៃក្តីស្រលាញ់ដែលមានយុវវ័យខ្លះបានប្រព្រឹត្តិនូវអំពើមិនគប្បីប្រាសចាកប្រពៃណីដ៏ផូរផង់របស់ខ្មែរ។
លោកវេជ្ជបណ្ឌិត តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍បានណែនាំដល់យុវវ័យត្រូវប្រើប្រាស់ស្រោមអនាម័យឲ្យបាន១០០ភាគរយនៅក្នុងទិវានៃក្តីស្រលាញ់ថ្ងៃ១៤កុម្ភៈ ដើម្បីការពារខ្លួនកុំឲ្យឆ្លងជំងឺអេដស៍ ដែលជាជំងឺដ៏កាចសាហាវនិងកំពុងបន្តចម្លងដល់មនុស្សគ្រប់រូបពិសេសយុវវ័យ។
ការអំពាវនាវនេះ ដោយសារតែជារៀងរាល់ឆ្នាំមានយុវវ័យមួយចំនួនតូចបានចាត់ទុកទិវានៃក្តីស្រលាញ់១៤កុម្ភៈ គឺជាថ្ងៃបុណ្យសង្សារដោយធ្វើសកម្មភាពផ្សេងៗដូចជាទិញផ្កាឲ្យគ្នាទៅវិញទៅមកនិងខ្លះទៀតបានដើរលេងកំសាន្តសប្បាយរហូតដល់ប្រគល់ខ្លួនប្រាណដល់សង្សាររបស់ខ្លួនទៀតផង។
លោកវេជ្ជបណ្ឌិត តែង គន្ធី បានមានប្រសាសន៍ថាមានតែការប្រើប្រាស់ស្រោមអនាម័យតែមួយគត់ដែលអាចបង្ការការចម្លងជំងឺអេដស៍បានព្រោះថា គេមិនដឹងថាដៃគូដែលអ្នករួមភេទនោះមានផ្ទុក ឬ មិនមានផ្ទុកមេរោគអេដស៍ឡើយ។ ដូចនេះយុវវ័យមិនត្រូវយកទិវានៃក្តីស្រលាញ់១៤កុម្ភៈជាថ្ងៃសម្រាប់បូជាខ្លួនប្រាណនោះទេត្រូវធ្វើខ្លួនជាមនុស្សល្អគោរពទៅតាមប្រពៃណីដ៏ល្អរបស់ខ្មែរដែលមានតាំងពីយូរលង់ណាស់មកហើយ។
លោកវេជ្ជបណ្ឌិត តែង គន្ធី បានជំរុញឲ្យយុវវ័យគួរតែយកទិវានៃក្តីស្រលាញ់បង្វែរទៅជាថ្ងៃនៃការគោរពស្រលាញ់មា តាបិតា លោកគ្រូអ្នកគ្រូចាស់ព្រឹទ្ធាចារ្យដើម្បីចូលរួមលើកកម្ពស់សីលធម៌សង្គមនិងតម្លៃស្ត្រីខ្មែរឲ្យកាន់តែផូរផង់ថែមទៀត។
ប្អូនស្រី ស្រេង ច័ន្ទមុន្នីណេត និស្សិតវិទ្យាស្ថានបច្ចេកវិទ្យាកម្ពុជាបានណែនាំដល់និស្សិតត្រូវប្រែក្លាយទិវានៃក្តីស្រលាញ់ទៅ ជាការខិតខំរៀនសូត្រនិងធ្វើអំពើល្អនៅក្នុងសង្គមវិញដោយមិនត្រូវយកថ្ងៃ១៤កុម្ភៈ ទៅប្រព្រឹត្តិអំពើខុសឆ្គងនឹងប្រពៃណីឡើយ។
ប្អូនស្រីបានបន្តថា«ខ្ញុំគិតថាថ្ងៃ១៤កុម្ភៈហ្នឹង គឺមានផលអវិជ្ជមាននិងវិជ្ជមានគឺក្នុងករណីយុវវ័យយកថ្ងៃនេះទៅប្រព្រឹត្តិអំពើមិនសមរម្យនៅក្នុងសង្គមធ្វើឲ្យប៉ះពាល់ដល់សេចក្តីថ្លៃថ្នូររបស់ស្ត្រីនាំឲ្យបំផ្លាញដល់សង្គមជាតិកម្ពុជា»។
ប្អូនប្រុស ហ៊ន ម៉េងស័ង និស្សិតវិទ្យាស្ថានបច្ចេកវិទ្យាកម្ពុជាបានប្តេជ្ញាថានឹងយកថ្ងៃ១៤កុម្ភៈទៅជួបជុំជាមួយឪពុកម្តាយបង្ហាញការគោរពដឹងគុណចំពើគាត់ដែលបានចិញ្ចឹមបីបាច់និងផ្តល់នូវអ្វីៗគ្រប់យ៉ាងដល់ប្អូនបានសិក្សារហូតដល់មហាវិទ្យាល័យ។ ប្អូនបានបន្តថា ប្អូននឹងខិតខំរៀនសូត្រស្តាប់បង្គាប់ឪពុកម្តាយនិងប្រព្រឹត្តិតែអំពើល្អនៅក្នុងសង្គម។
ចំណែកក្រសួងកិច្ចការនារីកាលពីថ្ងៃទី១២ ខែកុម្ភៈ ឆ្នាំ២០១៩បានអំពាវនាវដល់ប្រជាពលរដ្ឋគ្រប់រូប ជាពិសេសយុវវ័យ សូមកុំយល់ខុសពីអត្ថន័យ ទិវានៃក្តីស្រលាញ់ ថ្ងៃ១៤ កុម្ភៈ ឬប្រើប្រាស់ថ្ងៃនេះ ដើម្បីប្រព្រឹត្តសកម្មភាពពុំគប្បីដែលប្រាសចាកពីសីលធម៌ វប្បធម៌ និងប្រពៃណីសង្គមខ្មែរ។
តាមរយៈសេចក្ដីអំពាវនាវនេះ ក្រសួងលើកទឹកចិត្តឲ្យពលរដ្ឋទាំងអស់ ពិសេសយុវវ័យ សូមបង្ហាញក្តីស្រលាញ់ សម្រាប់មាតាបិតា ក្រុមគ្រួសារអ្នកគ្រូ លោកគ្រូ មិត្តភ័ក្រ និងគូសង្សារ ដោយសេចក្តីថ្លៃថ្នូរ ទទួលខុសត្រូវ និងផ្តល់តម្លៃដល់អ្នកទាំងនោះ ក៏ដូចជាការផ្តល់តម្លៃដល់ខ្លួនឯង។
ក្រសួងបានណែនាំដល់ប្រជាពលរដ្ឋគ្រប់រូប ជាពិសេសយុវវ័យកុំយល់ខុសពីអត្ថន័យ ទិវានៃក្តីស្រលាញ់ ថ្ងៃ១៤ កុម្ភៈ ឬប្រើប្រាស់ថ្ងៃនេះ ដើម្បីប្រព្រឹត្តសកម្មភាពពុំគប្បីដែលនាំឲ្យប្រាសចាកពីសីលធម៌ វប្បធម៌ និងប្រពៃណីសង្គមខ្មែរ។
រីឯក្រសួងអប់រំយុវជននិងកីឡាបានចេញវិធានការទប់ស្កាត់សកម្មភាពមិនប្រក្រតីក្នុងទិវានៃក្តីស្រលាញ់នៅតាមគ្រឹះស្ថានសិក្សារដ្ឋនិងឯកជនដោយសារតែរៀងរាល់ឆ្នាំនៅថ្ងៃទី១៤ ខែកុម្ភៈដែលជាទិវានៃក្តីស្រលាញ់ជាឱកាសមួយដែលធ្វើឲ្យសិស្សានុសិស្សមួយចំនួនយល់ច្រឡំថាជាបុណ្យសង្សារ ឬ ជាថ្ងៃណាត់ជួបគ្នារវាងគូស្នេហ៍ទៅវិញហើយមានសិស្សខ្លះបានភ្លើតភ្លើនភ្លេចការសិក្សាបាត់បង់កិត្តិយសសេចក្តីថ្លៃថ្នូររបស់ខ្លួននិងក្រុមគ្រួសារប្រាសចាកពីវប្បធម៌និងប្រពៃណីដ៏ផូរផង់របស់ជាតិ។
ដើម្បីការពារនូវសេចក្តីថ្លៃថ្នូរនេះ ក្រសួងបានចេញវិធានការមួយចំនួនក្នុងនោះណែនាំដល់គ្រឹះស្ថានសិក្សាសាធារណៈនិងឯកជនត្រូវផ្សព្វផ្សាយដល់សិស្សានុសិស្សតាមគ្រប់មធ្យោបាយដើម្បីកុំឲ្យសិស្សមានការយល់ច្រឡំពីអត្ថន័យនៃទិវានៃក្តីស្រលាញ់ ត្រូវពង្រឹងការអនុវត្តបទបញ្ចាផ្ទៃក្នុងសាលាឲ្យបានម៉ឺងម៉ាត់និងតាមដានអវត្តមានសិស្សជាប្រចាំព្រមទាំងធ្វើទំនាក់ទំនងជិតស្និទ្ធជាមួយមាតាបិតាសិស្សក្នុងការផ្តល់ព័ត៌មាននានាពាក់ព័ន្ធនឹងសកម្មភាពមិនប្រក្រតីរបស់សិស្សដើម្បីសហការអប់រំណែនាំកែលម្អសិស្សបានទាន់ពេលវេលា។
ក្រសួងអប់រំអំពាវនាវដល់សិស្សានុសិស្សទាំងអស់មិនត្រូវយកទិវានៃក្តីស្រលាញ់នេះទៅប្រព្រឹត្តិអ្វីដែលខុសកន្លងប្រពៃណីខ្មែរនិងខុសពីអត្ថន័យដើមនៃទិវានេះទេត្រូវរក្សាតំលៃខ្លួននិងក្រុមគ្រួសារនិងត្រូវខិតខំប្រឹងប្រែងរៀនសូត្រគោពរពវិន័យសាលានិងយកល្អគួរយកទិវានេះទិញផ្កាជួនមាតាបិតាលោកគ្រូអ្នកគ្រូនិងមិត្តភក្តិរបស់ខ្លួនដើម្បីសំដែងនូវដឹងគុណនិងការគោរពស្រលាញ់វាប្រសើរជាង។
គួរបញ្ជាក់ថា ពិធីបុណ្យ Valentine’s Day ដែលអាចហៅបានថា “ទិវានៃសេចក្ដីស្រលាញ់” មានដើមកំណើតចេញពីអាណាចក្ររ៉ូម ដែលសព្វថ្ងៃជា (ប្រទេសអ៊ីតាលី) នាសតវត្សទី៣ នៃគ.ស ដែលមានស្ដេចមួយអង្គ ឈ្មោះថា Claudius ។ស្ដេចមួយអង្គនោះទ្រង់ជាមនុស្សល្មោភនឹងអំណាចទឹកដី មួយថ្ងៃៗគិតតែពីធ្វើសង្គ្រាម ដើម្បីពង្រីកអាណាចក្ររបស់ខ្លួនមិនគិតពីភាពលំបាករបស់ប្រជាពលរដ្ឋនោះទេ។
ស្ដេច Claudius គាត់បានចេញព្រះរាជសាឲ្យប្រជាពលរដ្ឋប្រុសៗពេញវ័យឲ្យជាប់កាតព្វកិច្ចយោធាទាំងអស់ ហើយហាមប្រាមមិនឲ្យមានការរៀបការនោះទេ សូម្បីតែអ្នកដែលបានភ្ជាប់ពាក្យហើយក៏ត្រូវតែផ្ដាច់ពាក្យវិញដែរ។ ជាពិសេសអ្នកដែលល្មើសច្បាប់នេះ ក៏ត្រូវមានទោសប្រហារជីវិតតែម្ដង។ ប៉ុន្ដែនាពេលនោះ មានលោកអាចារ្យម្នាក់ឈ្មោះថា Valentine គាត់បានមើលឃើញនូវស្ថានភាព ដ៏អយុត្តិធម៌បែបនេះ គាត់មិនពេញចិត្តនោះទេ។
ក្រោយមកមានយុវជនប្រុសស្រីមួយក្រុម បានសុំឲ្យលោកជួយរៀបចំពិធីអាពាហ៍ពិពាហ៍ឲ្យពួកគេ។ ជាបន្តបន្ទាប់មកទៀតក៏មានយុវជនផ្សេងៗទៀត ក៏បានមកសុំឲ្យលោកជួយរៀបចំពិធីអាពាហ៍ពិពាហ៍ដល់ពួកគេ ដូចគូរមុនៗដែរ។
ថ្ងៃមួយដំណឹងនេះក៏បានលេចឮដល់ស្ដេច Claudius ទ្រង់ក៏បានចេញព្រះរាជបញ្ជាឲ្យចាប់ខ្លួនលោកអាចារ្យ Valentine យកមកដាក់ទោស ដោយការធ្វើទារុណកម្មរហូតដល់លោកបានបាត់បង់ជីវិតនៅក្នុងថ្ងៃ១៤ ខែកុម្ភៈ ឆ្នាំ២៧០ នៃគ.ស។ ម្ល៉ោះហើយគូរស្នេហ៍ដែលត្រូវបានលោករៀបចំអាពាហ៍ពិពាហ៍ឲ្យ មានការអាណិត និងស្រលាញ់លើរូបលោក ក៏បានយកសាកសពរបស់លោកទៅបញ្ចុះនៅឯវិហាមួយ ដែលមានឈ្មោះថា Sauta Pula ហើយគេតែងតែប្រារព្ធធ្វើពិធីបុណ្យ Valentine’s Day ដែលអាចហៅបានថាទិវានៃសេចក្ដីស្រលាញ់ នៅក្នុងថ្ងៃទី ១៤ ខែកុម្ភៈ ដើម្បីរំលឹកដល់លោកជារៀងរាល់ឆ្នាំ៕
Source: Kampuchea Thmey Daily
0 Comments