អ្នកកាសែត​ឥណ្ឌា​ទទួលបាន​ការធានា​នៅក្រៅ​ឃុំ​ក្នុង​ពាក្យបណ្តឹង​បរិហារកេរ្តិ៍​របស់​អតីតរដ្ឋមន្ត្រី​

អ្នកកាសែត​ម្នាក់​ដែល​ត្រូវបាន​គេ​ប្តឹង​ពីបទ​បរិហាកេរ្តិ៍​បន្ទាប់ពី​បាន​ចោទប្រកាន់​អតីតរដ្ឋមន្ដ្រី​ឥណ្ឌា​និង​ជា​បណ្ណាធិការ​ព័ត៌មាន​ជើងចាស់​ឈ្មោះ M.J. Akbar អំពី​ការយាយី​ផ្លូវភេទ​គឺ​ត្រូវបាន​ធានា​ឲ្យ​នៅក្រៅ​ឃុំ​ក្នុង​តុលាការក្រុង New Delhi កាលពី​ថ្ងៃ​ចន្ទ​។​

តុលាការ​បានកំណត់​សវនាការ​បន្ទាប់​ក្នុងករណី​ព្រហ្មទណ្ឌ​របស់លោក Akbar ប្រឆាំងនឹង​លោកស្រី Priya Ramani នៅ​ថ្ងៃទី​១០​ខែមេសា​។​

លោកស្រី Ramani ដែល​អមដំណើរ​ដោយ​អ្នកគាំទ្រ​អ្នកកាសែត​ល្បីឈ្មោះ​របស់​ឥណ្ឌា​បាន​និយាយប្រាប់​អ្នកយកព័ត៌មាន​នៅ​ខាងក្រៅ​សាល​សវនាការ​ថា “​បន្ទាប់ពីនោះ វា​នឹង​ក្លាយជា​វេន​របស់ខ្ញុំ​ក្នុងការ​ប្រាប់​អំពី​រឿងរ៉ាវ​របស់ខ្ញុំ​ហើយ​ការពិត​គឺជា​ការការពារ​របស់​ខ្ញុំ​”​។​

លោក Akbar បាន​ប្តឹង​លោកស្រី Ramani កាលពី​ខែតុលា​ឆ្នាំមុន​នៅពេល​នាង​បានកំណត់​អត្តសញ្ញាណ​រូបលោក​នៅលើ Twitter ក្នុងនាម​ជា​បណ្ណាធិការ​ព័ត៌មាន​មិន​បញ្ចេញ​ឈ្មោះ​ម្នាក់​ដែល​នាង​បាន​រៀបរាប់​ក្នុង​រឿង​មួយ​ដែល​ត្រូវបាន​បោះ​ពុ​ម្ភ​ផ្សាយ​នៅក្នុង​ទស្សនា​វ​ដ្តី Vogue កាលពី​ឆ្នាំ​២០១៧​។​

នៅក្នុង​អត្ថបទ​នោះ​នាង​បាន​និយាយថា អ្នកនិពន្ធ​រូបនេះ​បានផ្តល់​គ្រឿង​ស្រវឹង​ដល់​នាង​ហើយ​បាន​លួង​លោមនាង​ជាមួយ​បទ​ចម្រៀង​ហិណ្ឌូ​ចាស់​និង​បាន​អញ្ជើញ​នាង​ឲ្យ​អង្គុយ​ក្បែរ​គាត់​នៅលើ​គ្រែ​ក្នុង​បន្ទប់​សណ្ឋាគារ​ទីក្រុង Mumbai ដែលជា​កន្លែង​នាង​បាន​ជួប​គាត់​សម្រាប់​ការសម្ភាសន៍​ការងារ​មួយ​កាលពី​ប៉ុន្មាន​ឆ្នាំមុន​។​

លោក Akbar បាន​លាលែង​ពី​តំណែង​ជា​រដ្ឋមន្ត្រី​ក្រសួងការបរទេស​ឥណ្ឌា​កាលពី​ឆ្នាំមុន​ចំពេល​មានការ​ចោទប្រកាន់​ដោយ​ស្ត្រី​២០​នាក់​ដែល​រង​ការយាយី​ផ្លូវភេទ​អំឡុង​អាជីព​លើក​មុន​របស់គាត់​ក្នុងនាម​ជា​អ្នកនិពន្ធ​ព័ត៌មាន​ដ៏​លេចធ្លោ​បំផុត​របស់​ប្រទេស​នេះ​។​

ស្ត្រី​ផ្សេងទៀត​នៅក្នុង​ប្រព័ន្ធ​ផ្សព្វ​ផ្សាយបាន​ចោទប្រកាន់ថា លោក Akbar បាន​សម្ភាសន៍​បេក្ខជន​ការងារ​នៅក្នុង​បន្ទប់​សណ្ឋាគារ​នៅពេល​យប់ ស្ទាបអង្អែល ម៉ាស្សា​និង​បង្ខំ​ថើប​យុវជន​ហាត់​ការ​និង​បុគ្គលិក​។

ទោះបីជា​យ៉ាងណាក៏ដោយ លោក Akbar អាយុ​៦៨​ឆ្នាំ​បាន​បដិសេធ​រាល់​ការចោទប្រកាន់​ដោយ​លើកឡើង​នៅលើ​បណ្តាញ​សង្គម​ថា ពួកគេ​គឺជា​ផ្នែក​មួយ​នៃ​យុទ្ធនា​ការដែល​គេ​រៀបចំឡើង​ដើម្បី​យកឈ្នះ​គណបក្សកាន់អំណាច Bharatiya Janata Party ក្នុងការ​បោះឆ្នោត​ទូទៅ​នៅ​ខែឧសភា​៕ AP

​

Source: Kampuchea Thmey Daily