ជនសង្ស័យ​ប្លន់​យន្តហោះ​បង់​ក្លា​ដែ​ស ​ត្រូវ​បាន​បាញ់សម្លាប់

មន្ត្រី​កងទ័ព​ម្នា​ក់ បាន​និយាយ​ថា កង​កុម្ម៉ង់ដូ​បង់​ក្លា​ដែ​ស​ បាន​សម្រុកចូល​យន្តហោះ​ដឹក​អ្នកដំណើរ​មួយ​គ្រឿង​នៅ​ភាគ​អាគ្នេយ៍​ប្រទេស​កាលពី​ថ្ងៃអាទិត្យ​និង​បាន​បាញ់សម្លាប់​បុរស​ប្រដាប់​អាវុធ​ម្នាក់​ដែល​គេ​សង្ស័យ​ថា ​ព្យាយាម​ប្លន់​ជើង​ហោះហើរ​ដែល​ឆ្ពោះ​ទៅកាន់​ទីក្រុង​ឌូ​បៃ។

ជនសង្ស័យ​ដែល​ត្រូវបាន​រៀបរាប់​ដោយ​ក្រុមមន្ត្រី​ថា​ជា​បុរស​បង់​ក្លា​ដែ​ស​ស្ថិតក្នុង​វ័យ​ជាង​២០​ឆ្នាំ​ត្រូវបាន​បាញ់សម្លាប់​ខណៈដែល​កង​កម្លាំង​ពិសេស​បាន​ប្រញាប់ប្រញាល់​ទៅរក​យន្តហោះ Boeing 737-800 បន្ទាប់ពី​វា​ចុះចត​ដោយ​សុវត្ថិភាព​នៅ​ទីក្រុង Chittagong ។​

ក្រុមមន្ត្រី​បាន​និយាយថា អ្នកដំណើរ​ចំនួន​១៣៤​នាក់​និង​បុគ្គលិក​អាកាសយានិក​១៤​នាក់​នៅលើ​ជើងហោះហើរ BG147 របស់​ក្រុមហ៊ុន Bangladesh Biman ត្រូវបាន​ជួយសង្គ្រោះ​ទាំងអស់​ដោយ​គ្មាន​នរណាម្នាក់​រងរបួស​ឡើយ​។​

ប៉ុន្តែ​អ្នកនាំពាក្យ​កងទ័ព​លោក​ឧ​ត្ត​ម​សេនីយ៍ Motiur Rahman បាន​និយាយថា ជន​ដែល​គេ​សង្ស័យថា​ជា​អ្នក​ប្លន់​ដែល​ត្រូវ​បានកំណត់​អត្តសញ្ញាណ​ថា​មានឈ្មោះ “Mahadi” និង​ត្រូវបាន​គេ​ពិពណ៌នា​ថា​មាន​អាយុ​២៥​ឬ​២៦​ឆ្នាំ​គឺ​បាន​រងរបួស​ហើយ​ស្លាប់​ភ្លាមៗ​បន្ទាប់ពី​ត្រូវបាន​ចាប់ខ្លួន​។​

លោក Rahman បាន​ប្រាប់​ក្រុម​អ្នកយកព័ត៌មាន​ថា “​កង​កុម្ម៉ង់ដូ​របស់​យើង​បាន​ស្នើសុំ​ឲ្យ​ចោរប្លន់​ចុះចាញ់​ប៉ុន្តែ​គាត់​បាន​បដិសេធ​ហើយ​ត្រូវបាន​គេ​បាញ់​។ ក្រោយមក យើង​បានដឹងថា គាត់​បាន​ស្លាប់​ហើយ​។ យើង​បាន​រកឃើញ​កាំភ្លើងខ្លី​មួយ​ដើមពី​គាត់​ប៉ុន្តែ​គ្មានអ្វី​ផ្សេងទៀត​ទេ​”​។​

អ្នកដំណើរ​ម្នាក់​បាន​ប្រាប់​អ្នកយកព័ត៌មាន​នៅ​ទីក្រុង Chittagong ថា “​ត្រឹមតែ​១០​នាទី​ប៉ុណ្ណោះ​បន្ទាប់ពី​យន្តហោះ​បាន​ហោះ​ចេញពី​ទីក្រុង​ដា​កា គាត់​បាន​បាញ់​ពីរ​គ្រាប់​”​។​

សមាជិក​ម្នាក់​នៃ​បុគ្គលិក​អាកាសយានិក​ដែល​សុំ​មិន​បញ្ចេញ​ឈ្មោះ​បាន​និយាយថា បុរស​ម្នាក់​នោះ​មាន​កាន់​វត្ថុ​ដែល​ដូចជា​គ្រាប់បែក​។​

ចោរប្លន់​ក៏បាន​ចាប់​អ្នក​បម្រើការ​លើ​យន្តហោះ​ម្នាក់​ធ្វើជា​ចំណាប់ខ្មាំង​ផងដែរ​។​
​ប្រធាន​ផ្នែក​អាកាសចរណ៍​ស៊ីវិល​របស់​ប្រទេស​ឈ្មោះ Nayeem Hasan បាន​និយាយថា ជនសង្ស័យ​បាន​អះអាងថា​មាន​គ្រាប់បែក​មួយ​នៅលើ​យន្តហោះ​៕ AFP

​

Source: Kampuchea Thmey Daily