បាត់ដំបង ៖ យ៉ាងហោចណាស់ក៏មានមនុស្ស២នាក់ដែរ ក្នុងចំណោមមនុស្សចំនួន៤នាក់ នៅក្នុងរថយន្តធុនតូច ត្រូវបានស្លាប់យ៉ាងអាណោចអាធ័មជាទីបំផុត ( រួមទាំងអ្នកបើកបរផង ) ខណៈដែលកំពុងបើកបរ ស្រាប់តែរថយន្តធំបានរេចង្កូតមកបុកទាំងកម្រោល ថែមទាំងកិនពីលើទៀតផង។
យោងតាមរបាយការណ៍របស់សមត្ថកិច្ច នៃអធិការដ្ឋាននគរបាលស្រុកមោងឬស្សីបានបញ្ជាក់ថា ករណីគ្រោះថ្នាក់ចរាចរណ៍ដ៏រន្ធត់នេះ បានកើតឡើងកាលពីវេលាម៉ោង៨និង៥នាទីយប់ ថ្ងៃទី១៣ ខែកុម្ភៈ ឆ្នាំ២០១៩ ចំណុចក្រុមទី១២ ភូមិព្រៃស្វាយ ឃុំព្រៃស្វាយ ស្រុកមោងឬស្សី ខេត្តបាត់ដំបង លើផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ២៣៥ និង ២៣៦។
របាយការណ៍បានបន្តថា ករណីគ្រោះថ្នាក់ចរាចរណ៍នេះដែរ បានកើតឡើង រវាងរថយន្ត ម៉ាកហ៊ីណូ ធុនដឹកជញ្ជូនធំ ពាក់ស្លាកលេខ ភ្នំពេញ 3A. 2727 ដែលបានធ្វើដំណើរពីបាត់ដំបង ទៅភ្នំពេញ ជាមួយនឹងរថយន្ត ម៉ាក់ហ៊ីយិនដាយ ពាក់ស្លាកលេខ បាត់ដំបង2B.6341 ក្នុងទិសដៅច្រាស់គ្នា។
ក្រោយពីសមត្ថកិច្ចជំនាញបានចុះទៅពិនិត្យលើទីតាំងកើតហេតុ គឺសង្កេតឃើញថា រថយន្តធំដែលអ្នកបើកបរបានរត់គេចខ្លួនទៅហើយនោះ បានរេចង្កូតទៅបុក ហើយកិនលើរថយន្តធុនតូច ដែលបណ្តាលឲ្យមនុស្ស២នាក់ស្លាប់នៅនឹងកន្លែង ( កៀបក្នុងរថយន្ត ) និងមនុស្ស២នាក់ទៀត បានរងរបួសយ៉ាងធ្ងន់ធ្ងរ ដោយបានបញ្ជូនទៅសង្គ្រោះនៅឯមន្ទីរពេទ្យបង្អែកស្រុកមោងឬស្សី។
ក្រោយពីបានស្រាវជ្រាវទើបដឹងថា រថយន្តតូច គឺបើកបរដោយឈ្មោះ សោម ស៊ីដេត ភេទប្រុស អាយុ៤៦ឆ្នាំ រស់នៅ ឃុំរាំងកេសី ស្រុកសង្កែ ( ស្លាប់ ) និងអ្នកស្លាប់ម្នាក់ទៀតឈ្មោះ ហង្ស សីហា ភេទប្រុស អាយុ៣៧ឆ្នាំ រស់នៅឃុំរាំងកេសី ស្រុកសង្កែដូចគ្នា ចំណែកអ្នករបួសទាំង២នាក់ មានឈ្មោះ ហង្ស វណ្ណា ភេទប្រុស អាយុ៤៨ឆ្នាំ និង ឈ្មោះ វណ្ណៈ ចរណៃ ភេទស្រី អាយុ១១ឆ្នាំ អ្នកទាំង ២ រស់នៅស្រុកបាកាន ខេត្តពោធិ៍សាត់។
បច្ចុប្បន្ន សព ត្រូវបានសមត្ថកិច្ចប្រគល់ទៅឲ្យក្រុមគ្រួសារនាំយកទៅធ្វើបុណ្យតាមប្រពៃណីហើយ ដោយឡែករថយន្តទាំង២គ្រឿង ក៏បានប្រគល់ទៅឲ្យការិយាល័យនគរបាលចរាចរណ៍ផ្លូវគោកហើយដែរ៕
Source: Kampuchea Thmey Daily
0 Comments