ស្ទឹងត្រែង ៖ បុរសពីរនាក់ ជិះរថយន្តតាកូម៉ា ក្នុងល្បឿនលឿន ដោយសារស្ថានភាពផ្លូវក្រួសក្រហមរអិលផងនោះ ខ្វះការប្រុងប្រយ័ត្ន បណ្ដាលឲ្យក្រឡាប់ជាច្រើនត្រឡប់ ខ្ទាតមនុស្សចេញពីរថយន្តស្លាប់ម្នាក់ភ្លាមៗ និងម្នាក់ទៀតរបួសធ្ងន់ ត្រូវបានបញ្ជូនមកកាន់មន្ទីរពេទ្យភ្លាមៗផងដែរ។
ហេតុការណ៍ក្រឡាប់រថយន្តនេះ បានកើតឡើងកាលពីវេលាម៉ោង១០ ព្រឹកថ្ងៃទី១៣ ខែកុម្ភៈ ឆ្នាំ២០១៩ ត្រង់ចំណុចកុំផាន់ភូមិគីឡូ៨ សង្កាត់សាមគ្គី ក្រុងខេត្តស្ទឹងត្រែង។
សមត្ថកិច្ចចរាចរណ៍បានឲ្យដឹងថា ជនរងគ្រោះ ដែលក្រឡាប់រថយន្តមាន 1-ឈ្មោះ ចក់ ធឿនភេទប្រុសអាយុ 45 ឆ្នាំរបួសធ្ងន់ជាអ្នកបើកបរនិង 2 ឈ្មោះមករា ភេទប្រុសអាយុ 25 ឆ្នាំ(ស្លាប់)អ្នកទាំងពីររស់នៅក្នុងទីរួមខេត្តស្ទឹងត្រែង។
សមត្ថកិច្ចបានបន្តឲ្យដឹងទៀតថា នៅថ្ងៃកើតហេតុគេបានឃើញរថយន្តម៉ាកតាកូម៉ាពណ៌ខ្មៅពាក់ស្លាកលេខភ្នំពេញ 2y 2307 បើកបរចេញពីទីរួមខេត្តស្ទឹងត្រែង ឆ្ពោះទៅកាន់ច្រកអន្តរជាតិត្រពាំងគ្រៀល តាមផ្លូវជាតិលេខ៧ មកដល់ចំណុចកើតហេតុ ដោយសារខ្វះការប្រុងប្រយ័ត្ន បើកបរក្នុងលឿនហួសកំណត់ផ្លូវក្រួសក្រហមមិនទាន់បានចាក់កៅស៊ូ ក៏រអិលរេចង្កូតធ្វើឲ្យរថយន្តក្រឡាប់ជាច្រើនត្រឡប់និងមនុស្សខ្ទាតចេញពីរថយន្តបោកទៅនឹងថ្នល់បណ្ដោលឲ្យម្នាក់ស្លាប់និងម្នាក់របួសធ្ងន់ ត្រូវបញ្ជូនមកកាន់មន្ទីរពេទ្យធ្វើការសង្គ្រោះបន្ទាន់។
ក្រោយកើតហេតុសមត្ថកិច្ចបានចុះទៅដល់ទីតាំងពិនិត្យស្ថានភាពរថយន្តដែលបង្កដោយខ្លួនឯងនោះ មិនត្រូវបានបញ្ជូនមកកាន់ស្នងការដ្ឋាននគរបាលខេត្តទេ។ ដោយឡែកសព បានប្រគល់ទៅកាន់ក្រុមគ្រួសារជនរងគ្រោះយកមកធ្វើបុណ្យតាមប្រពៃណី៕
Source: Kampuchea Thmey Daily
0 Comments