សៀមរាប ៖ មហាជនបានសម្តែងការខកចិត្តចំពោះអាជ្ញាធរខេត្តទេសចរណ៍មួយនេះបាន ទុកប្រអប់អគ្គិសនីទៅចងភ្ជាប់គល់ឈើ និងតាមផ្លូវនៅតាមមាត់ស្ទឹងសៀមរាប ដោយមិនមានគម្របបិទ ដែលអាចប្រឈមនិងគ្រោះថ្នាក់យ៉ាងខ្លាំងចំពោះភ្ញៀវទេសចរណ៍ដោយយថាហេតុ។
ប្រអប់អគ្គិសនីរាប់សិបប្រអប់ ដែលអាជ្ញាធរខេត្ត បានយកទៅចងភ្ជាប់នឹងគល់ឈើ តាមដងផ្លូវសម្រាប់ដើរកម្សាន្ត នាមាត់ស្ទឹងសៀមរាបដោយពុំមានគម្របបិតនេះ គេសង្កេតឃើញមានយូរណាស់មកហើយ មិនដឹងថា ធ្វើរបៀបនេះទុកសម្រាប់ទស្សនាឬយ៉ាងណានោះទេ។ ប្រអប់ភ្លើងទាំងនេះ បានចងភ្ជាប់គល់ឈើតាមមាត់ស្ទឹង ចាប់ពីចំណុចគល់ស្ពានថ្មព្រះរាជដំណាក់ រហូតដល់គល់ស្ពានថ្មវត្តព្រះរាជបូព៌។ ក្រៅពីនោះបង្គោលភ្លើង សម្រាប់បើកបំភ្លឺលម្អរតាមមាត់ស្ទឹង ក៏មានខ្សែរញ៉េរញ៉ៃដោយមុខតំណខ្លះមានរុំស្គុតហើយខ្លះទៀតមិនមានរុំស្គុតនោះឡើយ។
បុរសជាមគ្គុទេសក៍ម្នាក់ បានលើកឡើងថា វាហាក់បីដូចជាចម្លែកបន្តិចហើយ រឿងទាំងនេះមិនគួរមានឡើយ។ នៅបណ្តារខេត្តផ្សេងៗដូចជាមិនមានការដាប់ប្រអប់ភ្លើងដោយមិនមានគម្របបិតអីចឹងទេ ហើយរឹតតែមិនមានគេយកប្រអប់ភ្លើង ទៅចង់ភ្ជាប់គល់ឈើតាមចំណុចកម្សាន្តរបៀបចឹងដែរ។
មគ្គុទេសក៍ដែលសុំមិនបង្ហាញឈ្មោះបន្តថា ថ្វីត្បិតវាមិនទាន់ឆក់យកជីវិតមនុស្សណាម្នាក់ ប៉ុន្តែវានឹងអាចកើតមាននៅពេលខាងមុខ ជាពិសេសក្នុងរដូវវស្សា ព្រោះថា ចរន្តភ្លើងងាយឆ្លងបំផុតតាមចរន្តទឹក នេះប្រសិនបើអាជ្ញាធរ ឬ ស្ថាប័នពាក់ព័ន្ធ មិនបានគិតគូរដល់ចំណុចអវិជ្ជមានមួយនេះ។ ម្យ៉ាងវិញទៀតបើទោះបី វាមិនទាន់មានគ្រោះថ្នាក់ ក៏ហាក់មិនសមភ្នែកអ្នកទេសចរណ៍ គ្រប់ជាតិសាសន៍នោះដែរ។ ប៉ុន្តែវាពិតជាគ្រោះថ្នាក់ខ្លាំងណាស់ មិនគួរគេយកប្រអប់ភ្លើងទៅចងតាមគល់ឈើក្បែរផ្លូវដើរ ប្រៀបដូចដាក់តាំងសម្រាប់ទស្សនាកម្សាន្តភ្នែក អីចឹងនោះឡើយ។
ក្នុងករណីនេះលោកហាយ យង់ ប្រធានការិយាល័យអភិវឌ្ឍន៍ក្រុងសៀមរាប បានថ្លែងតាមទូរសព្ទ័ថា រឿងអគ្គិសនីនៅចំណុចមាត់ស្ទឹងសៀមរាប គ្រប់គ្រងដោយជំនាញពីរស្ថាប័ន គឺខាងអគ្គិសនីនិងសាលាខេត្តសៀមរាប។ប៉ុន្តែខាងអគ្គិសនីគ្រាន់តែដាក់ប្រអប់ប៉ុណ្ណោះទេ ចំណែកសាលាខេត្តជាអ្នកគ្រប់គ្រងភ្លើង។
លោកសុខ ថុល នាយករដ្ឋបាលសាលាខេត្តសៀមរាប ក៏បានឲ្យដឹងតាមទូរស័ព្ទដែរថា ប្រអប់ភ្លើងទាំងនោះ គឺសម្រាប់យកភ្លើងទៅប្រើប្រាស់បំភ្លឺតាមដងស្ទឹងសៀមរាប។ ឯប្រអប់ភ្លើងដែលមិនមានគម្របសង្ស័យមានគេលួចដោះ។ ចំណែកថា ត្រូវដោះចេញពីគល់ឈើ ឬយ៉ាងណានោះ លោកមិនបានឆ្លើយតបនោះឡើយទេ៕
Source: Kampuchea Thmey Daily
0 Comments