ភ្នំពេញ៖ កាលពីថ្ងៃអាទិត្យ លោកចាន់ ស៊ីណាត អនុរដ្ឋលេខាធិការក្រសួងធនធានទឹក និងឧតុនិយម និងជាអនុប្រធានអន្តរាគមន៍មុខព្រួញខេត្តបន្ទាយមានជ័យ ខេត្តឧត្តរមានជ័យ និងខេត្តបាត់ដំបង បានដឹកនាំក្រុមការងារធ្វើការចុះពិនិត្យប្រព័ន្ធធារាសាស្ត្រ អាងត្រពាំងថ្ម ដែលមានលទ្ធភាព ធ្វើការស្រោចស្រពបានលើផ្ទៃដីដាំស្រូវ និងដំណាំអនុផលផ្សេងៗទៀតបានចំនួន ៣៥.០០០ ហិតតា ធ្វើបាន ០៣ដងក្នុង ០១ ឆ្នាំ។
ក្រសួង បានឲ្យដឹងថា ដោយពិនិត្យឃើញនូវសក្តានុពលរបស់ប្រព័ន្ធធារាសាស្ត្រអាងត្រពាំងថ្ម មានភាពធំធេង ហើយអាចពង្រីកបាននៅគ្រប់ពេលទាំងអស់ ទើបលោក លឹម គានហោ រដ្ឋមន្ត្រីបចេ្ចកទេសក្រសួងធនធានទឹក និងឧតុនិយម បានបញ្ជាឲ្យលោកអនុរដ្ឋលេខាធិការ គិតគូរប្រើប្រាស់ឲ្យអស់សក្តានុភាពទឹក ពុំចាំបាច់ដក ដង្ហើម តាមតែច្រកភ្នំឆ័ត្រ តាមជ្រលងបឹងត្រគួន ស្រែល្អ តាមេង ពន្លៃ និងថ្មពួក នោះទេ ត្រូវតែឈ្លាសវៃរកពីប្រភពផ្សេងបន្ថែមទៀត ដើម្បីឆ្លើយតបនឹងតម្រូវការរបស់ សកបទ ប្រព័ន្ធធារាសាស្ត្រ អាងត្រពាំងថ្ម ប្រជាកសិករនៃស្រុកភ្នំស្រុក ស្រុកព្រះនេតព្រះ ស្រុកស្រីស្នំ និងក្រុងសិរីសោភ័ណ។
សូមបញ្ជាក់ជូនថា ក្រសួងធនធានទឹក និងឧតុនិយម នឹងធ្វើទំនើបកម្មលើប្រព័ន្ធធារាសាស្ត្រអាងត្រពាំងថ្ម ដោយប្រើប្រភពទឹកពីតំបន់ ៥៥ សំរោងចុងកាល់ ស្រែង១ និងស្រែង២ កាត់តំបន់ដានចាស់មួយចំនួនត្រង់មកអាងត្រពាំងថ្ម។ កិច្ចការមួយនេះ ក្រសួងនឹងអនុវត្តក្នុងពេលខាងមុខ។ តែចំពោះមុខនេះក្រសួងបានឲ្យគ្រប់ផ្នែក និងអង្គភាពចំណុះទាំងអស់ ធ្វើការពង្រីកបរិមាណទឹកពីប្រភពពាក់ព័ន្ធទាំងអស់ដើម្បីឆ្លើយតបនឹងតម្រូវការជាបណ្តើរៗហើយ៕
Source: Kampuchea Thmey Daily
0 Comments