ភ្នំពេញ ៖ តាមការព្យាករណ៍ កម្ពុជារំពឹងថា ឆ្នាំ២០១៩នេះនឹងទទួលបានភ្ញៀវទេសចរអន្តរជាតិមកទស្សនាកម្ពុជាជិត៧លាននាក់និងឆ្នាំ២០២០ នឹងទទួលបានភ្ញៀវទេសចរប្រមាណជាង៧លាននាក់ និងនាំមកនូវចំណូលសរុបប្រមាណ ៥០០០លានដុល្លារអាមេរិក បង្កើតនូវឱកាសការងារប្រមាណ ១លាននាក់។
លោកទិត ចន្ថា រដ្ឋលេខាធិការនិងជាអ្នកនាំពាក្យក្រសួងទេសចរណ៍បាន មានប្រសាសន៍ថា នៅឆ្នាំ២០១៨ កម្ពុជាទទួលបានភ្ញៀវទេសចរអន្តរជាតិ ៦លាន២សែននាក់ កើនឡើង១១ភាគរយ ក្នុងនោះភ្ញៀវចិនបានឈរលំដាប់ទី១ គឺមានប្រមាណ២លាននាក់ ក្នុងកំណើន៧០ភាគរយ។
លោកបន្តថា ការកើនឡើងនេះ ដោយសារតែកម្ពុជា មាន សុខសន្តិភាពពេញលេញ មានការអភិវឌ្ឍហេដ្ឋារចនាសម្ព័ន្ធផ្លូវថ្នល់ទាំងនៅទីប្រជុំជន និងជនបទដាច់ស្រយាល ។ម្យ៉ាងវិញទៀតកម្ពុជាជាប្រទេសដែលសម្បូរដោយសក្តានុពលទេសចរណ៍ទាំងផ្នែកវប្បធម៌និងធម្មជាតិ។
លោកបានបន្ថែមទៀតថា «កម្ពុជាយើងជាតំបន់មួយនៅក្នុងការធ្វើសមាហរណកម្មតំបន់មានន័យថា កម្ពុជានិងប្រទេសជិតខាង ជាពិសេសកម្លាំងខ្លាំងមែនទែនទេសចរមកពីប្រទេសចិន ដែលមានការកើនឡើងរហូតដល់ជាង៧០ភាគរយ ធៀបកាលពីឆ្នាំមុន ដោយសារតែយើងមានសុខសន្តិភាព ស្ថេរភាព នឹងមាន ការអភិវឌ្ឍលើគ្រប់វិស័យ ក្រោមការដឹកនាំរបស់រាជរដ្ឋាភិបាល ទី២ យើងមានសក្តានុពលល្អ ទី៣ យើងនៅក្នុងតំបន់ដែលនៅជុំវិញមានកំលាំងទេសចរខ្លាំង ដូចជានៅចិន អាស៊ាន និងបណ្តាប្រទេសមួយចំនួនដែលនៅជុំវិញយើង គឺថាវានៅមិនឆ្ងាយពីគ្នាទេ ដោយមានការតភ្ជាប់តាមផ្លូវហោះហើរល្អ និងការធ្វើសមាហរណកម្មរបស់កម្ពុជានៅក្នុងតំបន់គឺជាសក្តានុពលមួយក្នុងការទាក់ទាញការធ្វើដំណើរមួយទៅចិន អាស៊ាន ទៅបណ្តាប្រទេសអឺរ៉ុបអីគឺ ថាមានភាពងាយស្រួល ហើយសំខាន់មែនទែន សុខសន្តិភាព ស្ថេរភាពដែលទេសចរអាចធ្វើដំណើរ គ្រប់គោលដៅទាំងអស់នៅព្រះរាជាណាចក្រកម្ពុជា»។
ចំណែកលោកស្រី ឆាយ ស៊ីវលីន ប្រធានទីភ្នាក់ងារទេសចរណ៍កម្ពុជាបានស្វាគមន៏ចំពោះកំណើនភ្ញៀវអន្តរជាតិដែលមកកម្ពុជានេះព្រោះវាបានផ្តល់ប្រយោជន៍ដល់សេដ្ឋកិច្ចជាតិ និងបង្កើតឱកាសការងារជូនប្រជាពលរដ្ឋកម្ពុជាដោយផ្ទាល់និងប្រយោលរាប់លាននាក់ផងដែរ។
ជាមួយគ្នានេះលោកស្រីបញ្ជាក់ថា ភ្ញៀវទេសចរអន្តរជាតិមកកម្ពុជាច្រើនបែបនេះដោយសារតែមានការខិតខំរបស់រាជរដ្ឋាភិបាលដែលបានរៀបចំគោលនយោបាយទាក់ទាញភ្ញៀវទេសចរច្បាស់លាស់៕
Source: Kampuchea Thmey Daily
0 Comments