ប៉ៃលិន ៖ ថ្លែងក្នុងពិធីសម្ពោធដាក់អោយប្រើប្រាស់ជាផ្លូវការ នូវផ្លូវលំមួយខ្សែប្រវែង២៨០០ម៉ែត្រ ស្ថិតនៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ នាព្រឹកថ្ងៃអង្គារ ៨កើត ខែមាឃ ឆ្នាំច សំរិទ្ធស័ក ព.ស២៥៦២ ត្រូវនឹងថ្ងៃទី១២ ខែកុម្ភៈ ឆ្នាំ២០១៩ ឯកឧត្តម នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តប៉ៃលិន មានប្រសាសន៍យ៉ាងដូច្នោះ ដើម្បីឲ្យប្រជាពលរដ្ឋក្នុងមូលដ្ឋានជ្រាប់កាន់តែច្បាស់។
ពិធីនេះដែរ ក៏មានការអញ្ជើញចូលរួមពីលោកអភិបាលរងខេត្ត ,ឯកឧត្តម សមាជិកក្រុមប្រឹក្សាខេត្ត ,សមត្ថកិច្ចទាំងបីស្ថាប័ន, មន្ត្រីរាជការជុំវិញខេត្ត និងសប្បុរសជន ព្រមទាំងប្រជាពលរដ្ឋសរុប២០០នាក់។
យោងតាមរបាយការណ៍របស់លោកមេភូមិអូឈើក្រំ បានឲ្យដឹងថា ៖ ផ្លូវលំមួយខ្សែនេះមាន ប្រវែង២៨០០ម៉ែត្រ, ទទឹង៨ម៉ែត្រ , ដោយមានសំណង់លូចំនួន០៧កន្លែង ដែលចំណាយថវិកាកសាងអស់ចំនួន ៨៩លានរៀល និងជាថវិកាផ្ទាល់ របស់ឯកឧត្តម នាយឧត្តមសេនីយ៍ អ៊ី ឈាន និងលោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន។
ថ្លែងក្នុងឱកាសនោះដែរ ឯកឧត្តម នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិចុះមូលដ្ឋានខេត្តប៉ៃលិន បានមានប្រសាសន៍លើកឡើងថា៖ ផ្លូវលំមួយខ្សែនេះ គឺជាសមិទ្ធផលថ្មីមួយទៀត នៅក្នុងភូមិអូឈើក្រំ សម្រាប់សម្រួលដល់ការធ្វើដំណើរ, ការដឹកជញ្ជូនរបស់ប្រជាពលរដ្ឋ ជួយកាត់បន្ថយភាពក្រីក្រ របស់ប្រជាពលរដ្ឋ ស្របតាមគោលនយោបាយ របស់រាជរដ្ឋាភិបាលកម្ពុជា។
ឯកឧត្តម នាយឧត្តមសេនីយ៍ អ៊ី ឈាន ក៏បានមានប្រសាសន៍រំលឹកពីប្រវត្តិដ៏ជូរចត់ លំបាកវេទនា របស់ប្រជាពលរដ្ឋខ្មែរ ដោយសារសង្គ្រាមរ៉ាំរ៉ៃ ការកាប់សម្លាប់រវាងខ្មែរ និងខ្មែរ នេះដោយសារតែ ការបែកបាកសាមគ្គីជាតិ។
ឯកឧត្តម បានមានប្រសាសន៍បន្តថា ៖ បច្ចុប្បន្ននេះ យើងកំពុងរស់នៅក្នុងម្លប់សុខសន្តិភាព ក្រោមនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា យើងមានឱកាសពេញលេញ ក្នុងការអភិវឌ្ឍ កសាងសង្គម របស់យើងអោយមានការរីកចម្រើន លើគ្រប់វិស័យ ប្រជាពលរដ្ឋរស់នៅ ដោយក្តីសុខសាន្ត ប្រកបមុខរបរ រកស៊ីទទួលទានលើកស្ទួយជីវភាពគ្រួសារ អោយមានការធូរធាជាលំដាប់។ ទាំងនេះដោយសារគុណបំណាច់របស់ថ្នាក់ដឹកនាំរាជរដ្ឋាភិបាល ដែលប្រសូតចេញ ពីគណបក្សប្រជាជនកម្ពុជា ដែលតែងតែនៅរួមរស់ រួមសុខ រួមទុក្ខជាមួយប្រជាជនកម្ពុជាគ្រប់ពេលវេលា។ ដូច្នេះយើងត្រូវដឹងគុណ ដល់ថ្នាក់ដឹកនាំគណបក្សប្រជាជនកម្ពុជា តាមរយៈការបន្តគាំទ្រ ដល់គណបក្សប្រជាជនកម្ពុជាជានិច្ចនិរន្តទៅ។ ឯកឧត្តម ក៏មានប្រសាសន៍បញ្ជាក់ដែរថា៖ ការធ្វើផ្លូវលំក្រាលក្រួស១ខ្សែនេះ គឺពិតជាបានបំពេញនូវសេចក្តីត្រូវការរបស់បងប្អូនប្រជាពលរដ្ឋ បានងាយស្រួលក្នុងការធ្វើចរាចរណ៍ និងការដឹកកសិផលយកទៅលក់នៅលើទីផ្សារ ជាពិសេសផ្តល់ភាពងាយស្រួល ដល់សិស្សានុសិស្ស បានធ្វើដំណើរទៅសាលារៀន។
ក្នុងឱកាសនោះ ឯកឧត្តម អ៊ី ឈាន ក៏បានផ្ដាំផ្ញើ ដល់បងប្អូន ប្រជាពលរដ្ឋដែលប្រើប្រាស់ផ្លូវនេះទាំងអស់ សូមចូលរួមថែរក្សា ដើម្បីធានាដល់ការប្រើប្រាស់ បានយូរអង្វែង ជាពិសេសត្រូវចូលរួមអនុវត្តន៍គោលនយោបាយ ភូមិ/ឃុំមានសុវត្ថិភាព ក្នុងការរក្សាបាននូវសន្តិសុខ សណ្តាប់ធ្នាប់សាធារណៈក្នុងមូលដ្ឋានរបស់យើង។
ក្នុងឱកាសនោះផងដែរ ឯកឧត្តម នាយឧត្តមសេនីយ៍ អ៊ី ឈាន ក៏បានជួយឧបត្ថម្ភ ដល់ប្រជាជលរដ្ឋ ដែលបានអញ្ជើញចូលរួមក្នុងកម្មវិធីសម្ពោធផ្លូវលំនេះចំនួន២០០នាក់ ដោយម្នាក់ៗទទួលបានថវិកាចំនួន២០០០០រៀលផងដែរ៕
Source: Kampuchea Thmey Daily
0 Comments