គណៈប្រតិភូជាន់ខ្ពស់កងទ័ពជើងគោក នៃកងយោធពលខេមរភូមិន្ទ ត្រូវបានទទួលស្វាគមន៍យ៉ាងកក់ក្ដៅពីសំណាក់មេបញ្ជាការកងទ័ពជើងគោក នៃកងទ័ពរំដោះប្រជាជនចិន

ភ្នំពេញ ៖ តបតាមការអញ្ជើញរបស់ក្រសួងការពារជាតិ នៃសាធារណរដ្ឋប្រជាមានិតចិន និងដើម្បីពង្រឹង ពង្រីកកិច្ចសហប្រតិបត្តិការឲ្យកាន់តែរឹងមាំរវាងកងទ័ព ប្រជាជននៃប្រទេសទាំងពីរកម្ពុជា-ចិន គណៈប្រតិភូជាន់ខ្ពស់កងទ័ពជើងគោក នៃកងយោធពលខេមរភូមិន្ទ ដឹកនាំដោយ ឧត្ដមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ព ជើងគោក បានជួបពិភាក្សាការងារជាមួយនាយឧត្ដមសេនីយ៍ ហាន វេហ្គូ (HAN WEIGUO) មេបញ្ជាការកងទ័ពជើងគោក នៃកងទ័ពរំដោះប្រជាជនចិន។

នាយឧត្ដមសេនីយ៍ ហាន វេហ្គូ (HAN WEIGUO) បានមានប្រសាសន៍ថា លោកមានសេចក្ដីសោមនស្សរីករាយដែលបានទទួលស្វាគមន៍ ឧត្ដមសេនីយ៍ឯក ហ៊ុន ម៉ាណែត និងគណៈប្រតិភូកងទ័ពជើងគោកនៅរដ្ឋធានីប៉េកាំង នៃសាធារណរដ្ឋប្រជាមានិតចិន។

នាយឧត្ដមសេនីយ៍ បានចាត់ទុកថាប្រទេសកម្ពុជា និងប្រទេសចិន ជាបងប្អូនដែលមានមិត្តភាពជាដែកថែប។ មេបញ្ជាការកងទ័ពជើងគោក នៃកងទ័ពរំដោះប្រជាជនចិន សង្ឃឹមថា ប្រទេសទាំងពីរចិន-កម្ពុជា នឹងបន្ត ពង្រឹង ពង្រីក ទំនាក់ទំនង និងកិច្ចសហប្រតិបត្តិការឲ្យកាន់តែរឹងមាំថែមទៀតក្រោមយុទ្ធសាស្ត្រចង្អុលទិសរបស់ឯកឧត្ដមប្រធានាធិបតី ស៊ី ជីនពីង និង សម្ដេចតេជោ ហ៊ុន សែន នាយករដ្ឋមន្ត្រី ធ្វើយ៉ាងណា ដើម្បីអភិវឌ្ឍន៍កិច្ចសហប្រតិបត្តិការគ្រប់ជ្រុងជ្រោយ នៃប្រទេសទាំងពីរ។

ឧត្ដមសេនីយ៍ឯក ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះមេបញ្ជាការកងទ័ពជើងគោក នៃកងទ័ពរំដោះប្រជាជនចិន ដែលបានទទួលស្វាគមន៍យ៉ាងកក់ក្ដៅចំពោះគណៈប្រតិភូកងទ័ពជើងគោកកម្ពុជា។

លោកឧត្ដមសេនីយ៍ឯក បានបន្តថា កិច្ចពិភាក្សានេះ គឺជាការរក្សាការពង្រឹង ពង្រីកចំណងមិត្តភាព និងកិច្ចសហប្រតិបត្តិការ នៃកងទ័ពប្រទេសទាំងពីរកម្ពុជា-ចិន។

មេបញ្ជាការកងទ័ពជើងគោកកម្ពុជា បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល កងទ័ពនិងប្រជាជនចិន ដែលបានចូលរួមគាំទ្រយ៉ាងសកម្មនៅក្នុងដំណើរការកសាង និងអភិវឌ្ឍន៍លើគ្រប់វិស័យនៅក្នុងប្រទេសកម្ពុជា។

ឧត្ដមសេនីយ៍ឯក ហ៊ុន ម៉ាណែត បានស្នើសុំឲ្យភាគីចិនបន្តគាំទ្រ និងសហប្រតិបត្តិការលើគ្រប់វិស័យ នៃប្រទេសទាំងពីរសំដៅធ្វើយ៉ាងណាអនុវត្តកិច្ចប្រតិបត្តិការជាយុទ្ធសាស្ត្រគ្រប់ជ្រុងជ្រោយ និងដ៏រឹងមាំ នៃប្រទេសទាំងពីរកម្ពុជា-ចិន។

សូមបញ្ជាក់ថា ដំណើរទស្សនកិច្ចផ្លូវការ នៃគណៈប្រតិភូជាន់ខ្ពស់កងទ័ពជើងគោក នៃកងយោធពលខេមរភូមិន្ទនៅសាធារណរដ្ឋប្រជាមានិតចិនរយៈពេល៥ថ្ងៃ ចាប់ពីចាប់ពីថ្ងៃទី២៥កុម្ភៈ ដល់ថ្ងៃទី១ ខែមិនា ឆ្នាំ២០១៩។

នៅក្នុងដំណើរបំពេញទស្សនកិច្ច និងស្នាក់នៅក្នុងសាធារណរដ្ឋប្រជាមានិតចិននាឱកាសនោះ ភាគីកម្ពុជា នឹងជួបសំដែងការគួរសម និងពិភាក្សាការងារជាមួយថ្នាក់ដឹកនាំជាន់ខ្ពស់ នៃកងទ័ពរំដោះប្រជាជនចិនរួមមាន ៖ ឯកឧត្ដម សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិ នៃសាធារណរដ្ឋប្រជាមានិតចិន ឯកឧត្ដម អនុប្រធានគណៈកម្មការយោធាមជ្ឈិម នៃកងទ័ពរំដោះប្រជាជនចិន ឯកឧត្ដម មេបញ្ជាការកងទ័ពជើងគោក នៃកងទ័ពរំដោះប្រជាជនចិន និងថ្នាក់ដឹកនាំសំខាន់ៗជាច្រើនរូបទៀត៕