សូមសរសើរ! ប៊ុន រតនា , លីឈី ដឹកនាំសិស្ស៥៣៦នាក់ រើសសំរាមនៅតាកែវ និងចែកសម្ភារៈសិក្សា

Cambodia News February 26, 2019

ភ្នំពេញ ៖ នាឱកាសនៃថ្ងៃទិវាជាតិទីក្រុងស្អាតថ្ងៃទី២៥ ខែកុម្ភៈ ឆ្នាំ២០១៩ថៅកែឃ្លាំងលក់រថយន្ត S-Auto បាននាំយកនូវសម្ភារៈសិក្សាជូនសិស្សានុសិស្សចំនួន៥៣៦ នាក់ និងអ្នកគ្រូលោកគ្រូចំនួន ២៥នាក់ ទទួលបាននូវសម្ភារៈប្រើប្រាស់និងថវិកាមួយចំនួនស្ថិតនៅសាលាបឋមសិក្សាវត្តលើស្រុកគីរីវង់ ខេត្តតាកែវ។ ដូចដែលប្រិយមិត្តបានដឹងស្រាប់ហើយថាសម្រាប់លោក ប៊ុន រតនា ហៅសេម និង កញ្ញា លីឈី ត្រូវបានទទួលស្គាល់នៅលើបណ្តាញសង្គមហ្វេស ប៊ុកជាគូស្នេហ៍ចូលចិត្តរើសសំរាម និងស្រលាញ់នូវបរិស្ថាន។

ជាញឹកញាប់ គូស្នេហ៍ដែលខាងប្រុសជាអ្នកដឹកនាំសម្តែងបទល្បីៗជាច្រើននៅក្នុងផលិតកម្ម ថោនជាពិសេសបទ «ពុកខ្ញុំជាប៉ូលិសចរាចរណ៍» និងបច្ចុប្បន្នមានមុខជំនួញជាម្ចាស់ឃ្លាំងលក់រថយន្ត S-Auto និងខាងស្រី ជាតារាសម្តែង និងជាពិធីការិនីក្នុងកម្មវិធី Happy Life Show ក្នុងស្ថានីយទូរទស្សន៍ថោន តែងតែដឹកនាំគ្នារើសសំរាមមិនថាទីជិតទីឆ្ងាយ ដោយភ្ជាប់ទៅជាមួយគោលដៅកម្សាន្តដែលបានទៅ។

ជាក់ស្តែងនៅព្រឹកនេះដែរ ភ្ជាប់ដំណើរទៅកាន់ សាលាបឋមសិក្សាវត្តលើស្រុកគីរីវង់ ខេត្តតាកែវ ថៅកែឃ្លាំងលក់រថយន្ត S-Auto និង ថៅកែលក់ខោអាវនៅផ្សារថ្មី បាននាំយកសម្ភារៈសិក្សាជូនដល់សិស្សចំនួន ៥៣៦ នាក់ បានដឹកនាំសិស្សទាំងអស់ សម្អាតបរិស្ថាន ក្នុងទីធ្លាសាលា ។លោក សេម ថា ដូចបានដឹងស្រាប់ហើយពួកខ្ញុំទាំងពីរនាក់ ជាអ្នកដែលចូលចិត្តរើសសំរាម ដើម្បីសំអាតបរិស្ថានហើយការដឹកនាំហើយក្មេងៗ ទាំង ៥៣៦ នាក់រើសសំរាម។
លោក សេម បញ្ជាក់ថាគោលបំណងឲ្យពួកគាត់ចេះស្រលាញ់បរិស្ថាន ព្រោះថាក្មេងៗជាទំពាំងស្នងឫស្សី និងជាក្រដាសសមួយសន្លឹក អាចនឹងប្រឈមគ្រប់ពេល តែបើយើងបង្ហាញសកម្មភាពគំរូល្អបែបនេះទៅគាត់នឹងដក់ក្នុងអារម្មណ៍ចេះសម្អាត និងស្រលាញ់បរិស្ថាន ហើយនិងបន្តសកម្មភាពទៅកាន់មិត្តភក្តិគាត់ផ្សេងៗទៀត។

បន្ថែមពីលើនេះលោក សេម លើកឡើងទៀតថាផ្តើមចេញពីយើងម្នាក់ទៅមនុស្សម្នាក់ទៀត នោះបរិស្ថាន ប្រទេសរបស់យើង នឹងស្រស់ស្អាតឲ្យវាសក្ដិសមទៅនឹងពាក្យមួយឃ្លាថា បរិស្ថានស្អាត សុខភាពល្អ។ លោក ប៊ុន រតនា និង កញ្ញា លីឈី បានបញ្ជាក់ថា សកម្មភាពរើសសំរាមនេះពួកខ្ញុំនឹងបន្តទៅកាន់កន្លែងផ្សេងៗទៀត ដោយមិនផ្អាកដំណើរនោះទេ ឲ្យសក្ដិសមឈ្មោះពូសំរាម និង រាជិនីសំរាម៕