គណបក្សពលករដែលជាគណបក្សប្រឆាំងដ៏ធំរបស់ចក្រភពអង់គ្លេសបាននិយាយថា ខ្លួនអាចគាំទ្រការធ្វើប្រជាមតិ Brexit ជាលើកទីពីរបានដរាបណាសហភាពអឺរ៉ុបបើកទ្វារដើម្បីពន្យារពេលការចាកចេញរបស់ប្រទេសពីប្លុកនេះហួសពីថ្ងៃកំណត់ថ្ងៃទី២៩ខែមីនា។
ចក្រភពអង់គ្លេសនៅតែមានការបែកបាក់លើបញ្ហា Brexit ដែលភាគច្រើននៃអ្នកបោះឆ្នោតបានគាំទ្រក្នុងការធ្វើប្រជាមតិនៅខែមិថុនាឆ្នាំ២០១៦ហើយមានការរំពឹងទុកថា ទីក្រុងឡុងដ៍នឹងស្នើសុំពេលវេលាបន្ថែមទៀតដើម្បីចរចា។
នាយករដ្ឋមន្ត្រីចក្រភពអង់គ្លេសលោកស្រី Theresa May បានលើកឡើងកាលពីថ្ងៃអាទិត្យថា សភាប្រហែលជានឹងមិនអាចបោះឆ្នោតលើកិច្ចព្រមព្រៀង Brexit របស់លោកស្រីបានទេរហូតដល់ថ្ងៃទី១២ខែមីនាពោលគឺមានរយៈពេលត្រឹមតែ១៧ថ្ងៃប៉ុណ្ណោះមុនពេលចក្រភពអង់គ្លេសចាកចេញពីសហភាពអឺរ៉ុប។
សហភាពអឺរ៉ុបបាននិងកំពុងឃ្លាំមើលជាមួយការព្រួយបារម្ភកាន់តែខ្លាំងឡើងអំពីលទ្ធភាពដែលថា ចក្រភពអង់គ្លេសនឹងចាកចេញពីប្លុកនេះដោយគ្មានកិច្ចព្រមព្រៀងមួយដែលជាហេតុនឹងបង្កឲ្យមានចលាចល។
ការរំពឹងទុកកំពុងកើនឡើងថា សមាជិកសភានឹងធ្វើការបោះឆ្នោតជាបន្តបន្ទាប់នៅសប្តាហ៍នេះក្នុងគោលបំណងពន្យារពេលការដកខ្លួនរបស់ចក្រភពអង់គ្លេសដើម្បីចៀសវាងការចាកចេញដោយគ្មានកិច្ចព្រមព្រៀង។
គណបក្សពលករកាលពីថ្ងៃចន្ទបានលើកឡើងនូវសម្ពាធដោយនិយាយថា ខ្លួននឹងដាក់ផែនការផ្ទាល់ខ្លួនសម្រាប់ Brexit ដែលអំពាវនាវឲ្យចក្រភពអង់គ្លេសបន្តស្ថិតនៅក្នុងសហភាពគយរបស់សហភាពអឺរ៉ុបដែលជាផ្នែកមួយនៃការបោះឆ្នោតទាំងនោះ។
បន្ទាប់មកគណបក្សពលករបាននិយាយថា ប្រសិនបើគម្រោងរបស់ខ្លួនត្រូវបានច្រានចោល នោះ ខ្លួននឹងផ្តល់ការគាំទ្រដល់ការធ្វើវិសោធនកម្មលើការរៀបចំប្រជាមតិជាលើកទីពីរស្តីពីសមាជិកភាពរបស់សហភាពអឺរ៉ុបដោយគ្មានកំណត់កាលបរិច្ឆេទច្បាស់លាស់។
មេដឹកនាំគណបក្សពលករលោក Jeremy Corbyn បាននិយាយនៅក្នុងសេចក្តីថ្លែងការណ៍មួយថា “យើងប្តេជ្ញាដាក់ចេញឬគាំទ្រការធ្វើវិសោធនកម្មមួយដើម្បីគាំទ្រដល់ការបោះឆ្នោតជាសាធារណៈដើម្បីទប់ស្កាត់ការបាត់បង់ Brexit ទាំងបង្ខំលើប្រទេសនេះ”៕ AFP
Source: Kampuchea Thmey Daily
0 Comments