តាកែវ ៖ ជនសង្ស័យជួញដូរថ្នាំញៀនម្នាក់ ជាមួយនឹងវត្ថុតាង ត្រូវបានប៉ូលិសស្រុកត្រាំកក់ ចាប់ឃាត់ខ្លួនបានយកមកកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធី។
ការចាប់ខ្លួនជនសង្ស័យពាក់ព័ន្ធនឹងថ្នាំញៀននេះ ធ្វើឡើងនៅថ្ងៃទី២៦ ខែកុម្ភៈ ឆ្នាំ២០១៩ វេលាម៉ោង៩និង៥០នាទីព្រឹក ដោយកម្លាំងជំនាញ នៃអធិការនគរបាលស្រុកត្រាំកក់សហការជាមួយកម្លាំងប៉ុស្តិ៍នគរបាលរដ្ឋបាលតាភេម ដែលដឹកនាំបញ្ជាដោយ លោកវរសេនីយ៍ឯក ឌុក ធីយ៉ា អធិការនគរបាលស្រុក នៅចំណុចផ្លូវលំ ស្ថិតក្នុងភូមិប្រស៊ូង ឃុំតាភេម ស្រុកត្រាំកក់។
លោកអធិការបានឲ្យដឹងថា ដោយមានការសង្ស័យ ខណៈកម្លាំងសមត្ថកិច្ចកំពុងតែល្បាត ក៏បានហៅឈ្មោះ ឈៀន ចិត្រា ភេទប្រុស អាយុ២៣ឆ្នាំ ទីលំនៅភូមិអង្គគគីរ ឃុំពពេល ស្រុកត្រាំកក់ ដែលជាមុខសញ្ញាជួញដូរសារធាតុញៀនយ៉ាងសកម្មដើម្បីសាកសួរ ភ្លាមៗនោះ ជនសង្ស័យក៏បានរត់ ទើបក្រុមសមត្ថកិច្ចលោកបានធ្វើការដេញតាមទាន់ និងឆែកឆេរទៅលើខ្លួនជនសង្ស័យ ក៏ប្រទះឃើញថ្នាំញៀន ពណ៌សថ្លាចំនួន០៥កញ្ចប់តូច ដែលដាក់នៅក្នុងសំបកឆ្នាំងសាកទូរស័ព្ទ។
បច្ចុប្បន្ន ជនសង្ស័យ ដែលសមត្ថកិច្ចចាប់ឃាត់ខ្លួនខាងលើនេះ ត្រូវបានកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី៕
Source: Kampuchea Thmey Daily
0 Comments