ភ្នំពេញ ៖ បុរសម្នាក់ បានស្លាប់ និងម្នាក់ទៀតរងរបួសយ៉ាងធ្ងន់ធ្ងរ ក្នុងហេតុការណ៍គ្រោះថ្នាក់ចរាចរណ៍។
យោងតាមប្រភពពី លោកអនុសេនីយ៍ឯក ឯម ភារី នាយនគរបាលប៉ុស្តិ៍ស្ទឹងមានជ័យទី៣បានឲ្យកម្ពុជាថ្មីដឹងថា កាលពីវេលាម៉ោង៣និង៣០នាទីទៀបភ្លឺ ឈានចូលថ្ងៃទី២៦កុម្ភៈនេះ មានករណីគ្រោះថ្នាក់ចរាចរណ៍មួយនៅតាមបណ្ដោយផ្លូវវេងស្រេង កែងនឹងផ្លូវ៣០ម៉ែត្រ ស្ថិតនៅក្នុងភូមិដំណាក់ធំទី៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ បណ្តាលឲ្យមនុស្សម្នាក់ស្លាប់ និងម្នាក់ទៀតរងរបួស។
លោកនាយប៉ុស្តិ៍បន្តថា នៅម៉ោងកើតហេតុ សាក្សីបានឃើញរថយន្តកូរ៉េមួយគ្រឿង ពាក់ស្លាកលេខភ្នំពេញ2AK 41 33 ដឹកមាន់ពេញ បានបើកបរតាមបណ្ដោយផ្លូវវេងស្រេង ក្នុងទិសដៅពីលិចទៅកើត។ លុះមកដល់ចំណុចកើតហេតុ រថយន្តដឹកមាន់បានបុកម៉ូតូសង់ស៊េរី២០១៩ ពណ៌ខ្មៅ ពាក់ស្លាកលេខស្វាយរៀង1M 80 28 ពីក្រោយ ធ្វើឲ្យម្ចាស់ម៉ូតូខ្ទាតមកម្ខាង ហើយរថយន្តដឹកមាន់បានជ្រុលទៅបុកគូទរថយន្តសណ្តោងកុងតឺន័រដែលនៅពីមុខ បណ្តាលឲ្យអ្នកបើកបររថយន្តដឹកមាន់ បានស្លាប់ភ្លាមៗ ដោយសារកៀបជាប់នឹងកាប៊ីនរថយន្ត។
លោកនាយប៉ុស្តិ៍បន្តថា តាមសាក្សីបំភ្លឺជូននគរបាលជំនាញ គឺដោយសារតែអ្នកបើកបររថយន្តដឹកមាន់បើកបរលឿន លុះដល់ចំណុចកើតហេតុជាន់ហ្វ្រាំងមិនស៊ី ទើបបុកម៉ូតូ និងគូទរថយន្តកុងតឺន័របណ្តាលឲ្យស្លាប់ខ្លួន។
ជនរងគ្រោះរហូតបាត់បង់ជីវិតនោះ ឈ្មោះ ដូច សន ភេទប្រុស អាយុ៥៨ឆ្នាំ មានស្រុកកំណើតភូមិដីត្រពាំងរវាង ឃុំភ្នំតូច ស្រុកឧត្តុង្គ ខេត្តកំពង់ស្ពឺ៕
Source: Kampuchea Thmey Daily
0 Comments