ព្រៃវែង ៖ អគ្គិភ័យ បានឆាបឆេះផ្ទះរបស់ប្រជាពលរដ្ឋនៅក្នុងស្រុកពារាំងចំនួន២ខ្នង ស្ទើរគ្មានសល់បង្កការភ្ញាក់ផ្អើលទាំងកណ្តាលថ្ងៃត្រង់។
ហេតុការណ៍អគ្គិភ័យឆេះផ្ទះប្រជាពលរដ្ឋខាងលើ បានកើតឡើង កាលពីថ្ងៃទី១៨ ខែកុម្ភៈ ឆ្នាំ២០១៩ចំណុចភូមិព្រៃស្នៀតខាងលិច ឃុំព្រៃស្នៀត ស្រុកពារាំង ខេត្តព្រៃវែង វេលាម៉ោង១២និង៤០នាទី។
លោក ស៊ីម កុសល អធិការនគរបាលស្រុកពារាំងបានឲ្យដឹងថា ម្ចាស់ផ្ទះ ដែលត្រូវអគ្គិភ័យឆាបឆេះខាងលើ ទី១-ឈ្មោះ ឈន យាន ភេទស្រី អាយុ៧១ឆ្នាំ និងទី២-ឈ្មោះ គ្រី លុយ ភេទប្រុស អាយុ៧៣ឆ្នាំ រស់នៅភូមិ/ឃុំកើតហេតុខាងលើ។
លោកបានបន្តថា ក្នុងហេតុការណ៍ខាងលើ គឺក្រោយពីលោកទទួលបានការរាយការណ៍ថា មានករណីអគ្គិភ័យឆេះផ្ទះប្រជាពលរដ្ឋនៅចំណុចខាងលើភ្លាម លោកបានបញ្ជាឲ្យរថយន្តពន្លត់អគ្គិភ័យរបស់អធិការដ្ឋាននគរបាលស្រុកពារាំង ទៅធ្វើអន្តរាគមន៍ពន្លត់ភ្លាមៗ។
ក្រោយមក កម្លាំងជំនាញពន្លត់អគ្គិភ័យបានពន្លត់ទប់ស្កាត់ទាន់ពេលវេលា ដោយមិនឲ្យឆាបឆេះរាលដាលដល់ផ្ទះរបស់ប្រជាពលរដ្ឋជិតខាងផ្សេងទៀតនោះឡើយ។
តែទោះជាយ៉ាងណា ផ្ទះរបស់ប្រជាពលរដ្ឋចំនួន២ខ្នងខាងលើ ត្រូវបានអគ្គិភ័យឆេះអស់មួយភាគផងដែរ។
លោកក៏បានបញ្ជាក់ផងដែរថា មូលហេតុដែលបង្កឲ្យមានអគ្គិភ័យឆាបឆេះឡើងប ណ្តាលមកពីម្ចាស់ផ្ទះមានការធ្វេសប្រហែស ដោយដាំបាយមិនប្រយ័ត្ន ធ្វើឲ្យភ្លើងឆាបឆេះដំបូល បង្កការឆាបឆេះតែម្តង។ នេះសំណាងហើយ ដែលមិនបង្កឲ្យមានគ្រោះថ្នាក់ដល់ប្រជាពលរដ្ឋណាម្នាក់នោះឡើយ៕
Source: Kampuchea Thmey Daily
0 Comments