ភ្នំពេញ ៖ អ្នកជំនាញជប៉ុនមកផ្តល់បទពិសោធន៍ ដើម្បីកាត់បន្ថយអត្រាគ្រោះថ្នាក់ចរាចរណ៍នៅកម្ពុជា ដែលនៅតែជាបញ្ហាកង្វល់ និងប្រឈមដ៏ធំរបស់ប្រជាពលរដ្ឋ និងរាជរដ្ឋាភិបាលកម្ពុជា។
លោក មីជីម៉ាសា តាកាជី (Michimasa Takagi) អតីតទីប្រឹក្សា ជាន់ខ្ពស់នៃកម្មវិធីសុវត្ថិភាពចរាចរណ៍ផ្លូវគោក របស់ភ្នាក់ងារសហប្រតិបត្តិការជប៉ុនអន្តរជាតិ ហៅកាត់ថា JICA ប្រចាំប្រទេសវៀតណាមបានលើកឡើងកាលពីពេលថ្មីៗនេះនៅក្នុងសិក្ខាសាលាមួយថា ដើម្បីកាត់បន្ថយអត្រាគ្រោះថ្នាក់ចរាចរណ៍ត្រូវធ្វើឡើងតាមរយៈការបណ្តុះទម្លាប់ឥរិយាបថសុវត្ថិភាព កុមារតាំងពីនៅវ័យកុមារភាព ហើយ ត្រូវអនុវត្តឲ្យបានតែបាន ហើយការអប់រំក៏មិនមែនធ្វើឡើងតែនៅក្នុងសាលារៀននោះដែរ ពោលគឺ ត្រូវធ្វើនៅក្នុងការរស់នៅជាប្រចាំថ្ងៃផងដែរ។
លោកបានបន្តថា ត្រូវចាប់បង្ខំឲ្យអ្នកបើកបរផ្ទាល់ ត្រូវអនុវត្តច្បាប់ តាមរូបភាព ពាក់មួកសុវត្ថិភាពរាល់ពេលបើកបរនិងជិះលើម៉ូតូ គោរពភ្លើងនិងស្លាកសញ្ញាចរាចរណ៍ ជាដើម។ ទន្ទឹមនេះ ក៏ត្រូវកែសម្រួលស្ថានភាពផ្លូវដែលកោងខ្លាំងពេក ដើម្បីកុំឲ្យមានគ្រោះថ្នាក់ចរាចរណ៍កើតឡើង។
ចំណែកលោកស្រី មឹន មាណវី អគ្គលេខាធិការគណៈកម្មាធិការសុវត្ថិភាពចរាចរណ៍ផ្លូវគោក បានឲ្យដឹងថា គ្រោះថ្នាក់ចរាចរណ៍នៅកម្ពុជា នាពេលបច្ចុប្បន្នច្រើនបង្កឡើងដោយការបើកបរហួសល្បឿនកំណត់ ការបើកបរក្នុងពេលស្រវឹង ការបើកបរមិនគោរពសិទ្ធិអាទិភាពនៅលើដងផ្លូវ និងការជែងក្នុងស្ថានភាពគ្រោះថ្នាក់ ជាដើម។
លោកស្រីបានបញ្ជាក់ថា ផលវិបាកនៃគ្រោះថ្នាក់ចរាចរណ៍នាពេលបច្ចុប្បន្ននៅតែបង្កឲ្យមានមនុស្សស្លាប់ របួស ពិការ និងខូចខាតទ្រព្យសម្បត្តិរដ្ឋ និងឯកជន ខណៈដែលស្ពានផ្លូវកាន់តែល្អ។
លោក គឹម បញ្ញា នាយកប្រតិបត្តិអង្គការមូលនិធិបង្ការរបួសអាស៊ីប្រចាំកម្ពុជា មានប្រសាសន៍ថា វិធានការនានាដែលអាចកាត់បន្ថយអត្រាគ្រោះថ្នាក់ចរាចរណ៍នៅកម្ពុជាធ្លាក់មកនៅទាបបំផុតនោះ គឺការរឹតបន្តឹងច្បាប់ចរាចរណ៍ទៅលើផ្នែកដូចជា ការមិនពាក់មួកសុវត្ថិភាព ការបើកបរហួសល្បឿនកំណត់ ការវ៉ាជែងក្នុងស្ថានភាពគ្រោះថ្នាក់ ការបើកបរក្រោមឥទ្ធិពលគ្រឿងស្រវឹង ការប្រើទូរស័ព្ទក្នុងពេលបើកបរ ខណៈប្រជាពលរដ្ឋមិនទាន់ប្តូរឥរិយាបថឲ្យបានព្រមគ្នាលើការប្រើប្រាស់ផ្លូវ។
យោងតាមរបាយការណ៍បឋមរបស់ក្រសួងមហាផ្ទៃ បានបង្ហាញថា ក្នុងឆ្នាំ២០១៨កន្លងទៅនេះ មានអ្នកស្លាប់ដោយសារគ្រោះថ្នាក់ចរាចរណ៍ចំនួន១៧៦១នាក់ ក្នុងគិតជាមធ្យមភាគមានអ្នកស្លាប់ប្រមាណ៥នាក់ ក្នុងមួយថ្ងៃ៕
Source: Kampuchea Thmey Daily
0 Comments