ភ្នំពេញ ៖ ជនសង្ស័យក្នុងវ័យ១៨ឆ្នាំម្នាក់ ត្រូវបានសមត្ថកិច្ចប៉ូលិសប៉ុស្តិ៍ផ្សារដើមគធ្វើការឃាត់ខ្លួនខណៈដែលជនសង្ស័យម្នាក់នេះ ដាក់ថ្នាំញៀននៅជាប់ខ្លួន ហើយត្រូវបានប៉ូលិសឆែកឆេររកឃើញនោះ។
ជនសង្ស័យត្រូវបានប៉ូលិស ឃាត់ខ្លួនបានកាលពីព្រឹកថ្ងៃទី២៥ ខែកុម្ភៈ ឆ្នាំ២០១៩ វេលាម៉ោង៨និង៥០នាទី នៅចំណុចប៉េនឡានផ្សារនាគមាសផ្លូវលេខ២៣៤ក្រុមទី១១ភូមិ២ សង្កាត់ផ្សារដើមគរ ខណ្ឌទួលគោក។
ជនសង្ស័យ ឈ្មោះវុន វិត ភេទប្រុស អាយុ១៨ឆ្នាំ មុខរបរមិនពិតប្រាកដ ដេកទីលំនៅមិនពិតប្រាកដ ដេកតាមសំយ៉ាបផ្សារនាគមាស ក្នុងសង្កាត់ផ្សារដើមគរ មានស្រុកកំណើតនៅភូមិគោកសណ្តែក ឃុំស្អាងស្រែ ស្រុកស្អាង ខេត្តកណ្តាល។
ក្នុងការឃាត់ខ្លួននេះប៉ូលិសដកហូតបានវត្ថុតាងមួយចំនួនក្នុងនោះរួមមាន១-ម្សៅក្រាមពណ៌សថ្លា (សង្ស័យជាគ្រឿងញៀន)ចំនួន០២កញ្ចប់តូច។ ២-កែវកែច្នៃចំនួន០១ទុកសម្រាប់ជក់គ្រឿងញៀន។
មន្ត្រីប៉ូលិស ខណ្ឌទួលគោកបានឲ្យដឹងថា នៅមុនពេលកើតហេតុ សមត្ថកិច្ចប៉ូលិសប៉ុស្តិ៍រដ្ឋបាល ផ្សារដើមគរបានល្បាតក្នុងមូលដ្ឋានដើម្បីការពារសុវត្ថិភាពសន្តិសុខជូនប្រជាពលរដ្ឋ ខណៈជិះម៉ូតូបានមកដល់ផ្សារដើមគរ បានឃើញយុវជនម្នាក់គួរឲ្យសង្ស័យ ទើបសមត្ថកិច្ចប៉ូលិសធ្វើការឆែកឆេរ ក៏បានរកឃើញថ្នាំញៀន ២កញ្ចប់ដែលជនសង្ស័យលាក់ទុកនៅក្នុងហោប៉ៅរបស់ខ្លួន ភ្លាមនោះសមត្ថកិច្ចក៏បានបញ្ជូនជនសង្ស័យមកកាន់ប៉ុស្តិ៍រដ្ឋបាលភ្លាមដែរ។
បច្ចុប្បន្ន ជនសង្ស័យត្រូវបានឃាត់ខ្លួនបណ្តោះអាសន្នបញ្ជូនទៅអធិការនគរបាលខណ្ឌទួលគោកធ្វើការសាកសួរតាមនីតិវិធីច្បាប់៕
Source: Kampuchea Thmey Daily
0 Comments