សម្ពាធជាអន្តរជាតិបានកើនឡើងកាលពីថ្ងៃអាទិត្យប្រឆាំងនឹងមេដឹកនាំប្រទេសវេណេហ្ស៊ូអេឡាលោក Nicolas Maduro ដោយទីក្រុងវ៉ាស៊ីនតោនបានទទូចថា ថ្ងៃរបស់គាត់ត្រូវបានគេរាប់ទុកបន្ទាប់ពីកិច្ចខិតខំប្រឹងប្រែងរបស់គណបក្សប្រឆាំងដើម្បីនាំយកជំនួយមនុស្សធម៌ចូលក្នុងប្រទេសបានក្លាយទៅជាភាពចលាចលបង្ហូរឈាម។
ប្រធានាធិបតីបណ្តោះអាសន្នដែលប្រកាសដោយខ្លួនឯងលោក Juan Guaido បានអំពាវនាវដល់សហគមន៍អន្តរជាតិឲ្យពិចារណាលើវិធានការទាំងអស់ដើម្បីរំដោះប្រទេសវេណេហ្ស៊ូអេឡាបន្ទាប់ពីការប៉ះទង្គិចគ្នានៅច្រកព្រំដែនបានបណ្តាលឲ្យមនុស្សបួននាក់ស្លាប់ចាប់តាំងពីថ្ងៃសុក្រមក។
សហភាពអឺរ៉ុបបានថ្កោលទោសការប្រើប្រាស់អំពើហឹង្សានិងក្រុមជនស៊ីវិលប្រដាប់ដោយអាវុធដើម្បីទប់ស្កាត់ការនាំជំនួយចូល។
អគ្គលេខាធិការអង្គការសហប្រជាជាតិលោក Antonio Guterres បាននិយាយថា គាត់មានការភ្ញាក់ផ្អើលនិងសោកសៅយ៉ាងខ្លាំងចំពោះការស្លាប់របស់ជនស៊ីវិល។
លោក Guaido គ្រោងនឹងចូលរួមកិច្ចប្រជុំ Lima Group នៃប្រទេសអាមេរិកឡាទីនភាគច្រើនក្នុងទីក្រុង Bogota នៅថ្ងៃចន្ទហើយបានអំពាវនាវដល់សហគមន៍អន្តរជាតិឲ្យត្រៀមខ្លួនសម្រាប់លទ្ធភាពទាំងអស់ចំពោះលោក Maduro។
ប្រធានាធិបតីកូឡុំប៊ីលោក Ivan Duque បាននិយាយថា “រដ្ឋាភិបាលស្របច្បាប់” របស់ប្រទេសវេណេហ្ស៊ូអេឡាបានចូលរួមជាផ្លូវការនៅក្នុងកិច្ចប្រជុំនេះដែលជាកន្លែងអនុប្រធានាធិបតីអាមេរិកលោក Mike Pence នឹងធ្វើជាតំណាងឲ្យរដ្ឋាភិបាលក្រុងវ៉ាស៊ីនតោន។
រដ្ឋមន្ត្រីការបរទេសអាមេរិកលោក Mike Pompeo បាននិយាយថា លោកមានទំនុកចិត្តថា “ថ្ងៃរបស់លោក Maduro ត្រូវបានរាប់ទុកហើយ”។
លោកបាននិយាយនៅលើកញ្ចក់ទូរទស្សន៍ CNN ថា “យើងមានគោលបំណងបេសកកម្មពិសេសមួយគឺដើម្បីធានាថា ប្រជាជនវេណេហ្ស៊ូអេឡាត្រូវតែទទួលបានលទ្ធិប្រជាធិបតេយ្យដែលពួកគេសមនឹងទទួលបាន”។
ប្រធានាធិបតីអាមេរិកលោក Donald Trump បាននិយាយថា ក្រុងវ៉ាស៊ីនតោនមិនបានបដិសេធសកម្មភាពប្រដាប់អាវុធទេ។
ក្មេងប្រុសអាយុ១៤ឆ្នាំម្នាក់គឺស្ថិតក្នុងចំណោមអ្នកដែលត្រូវបានគេសម្លាប់កាលពីថ្ងៃសៅរ៍នៅជិតព្រំដែនប្រេស៊ីលក្នុងការប៉ះទង្គិចគ្នាជាមួយកងកម្លាំងសន្តិសុខវេណេហ្ស៊ូអេឡា។ មនុស្សជាង៣០០នាក់បានរងរបួសនៅក្នុងថ្ងៃនោះនៅច្រកជាប់ព្រំដែនកូឡុំប៊ីនិងជាប់ព្រំដែនប្រេស៊ីល៕ AFP
Source: Kampuchea Thmey Daily
0 Comments