ក្រោយបញ្ចប់បេសកកម្មដឹកនាំជម្រើសជាតិកម្ពុជា ក្នុងយុទ្ធនាការប្រកួតក្នុងពានរង្វាន់ធំប្រចាំតំបន់អាស៊ាន AFF Suzuki Cup 2018 កាលពីខែធ្នូកន្លងទៅលោក Keisuke Hondaក្នុងនាមជាអ្នកចាត់ការទូទៅរបស់ក្រុម បានធ្វើដំណើរទៅប្រកបអាជីពជាកីឡាករបាល់ទាត់វិញនៅប្រទេសអូស្ត្រាលី ជាមួយក្លិបMelbourne Victory សមាជិកពានរង្វាន់លីគកំពូលប្រទេសអូស្ត្រាលី (A-League)។
លោកMuscat ទើបតែដាក់កីឡាករ Keisuke Honda ឲ្យចូលរួមបានឡើងវិញក្រោយរូបគេសម្រាកព្យាបាលរបួសត្រគាកខាងស្តាំ ជិត១០លើកជាប់ៗគ្នាមក។ ការបង្ហាញខ្លួនលើកទី២ឡើងវិញនេះគឺស្របពេលក្រុម Melbourne Victory ស្មើគ្នាជាមួយក្រុមMelbourne City ១ទល់១ កាលពីល្ងាចថ្ងៃសៅរ៍ ចុងសប្ដាហ៍កន្លងទៅនេះ ខណៈកីឡាករ Honda បានចូលរួមត្រឹម៧៧នាទីក៏ត្រូវប្តូរចេញ។ ទោះបីជាខកខានបង្ហាញខ្លួនរយៈពេលយូក៏ដោយតែរូបគេរកបានគ្រាប់បាល់ចំនួន៦គ្រាប់ម្នាក់ឯងឲ្យក្រុមក្នុងចំណោមប្រកួតកន្លងមកនេះផងដែរ។
ទោះបីជាកីឡាករជប៉ុន រូបនេះអាចត្រឡប់មកកាន់ទីលានបានវិញក៏ដោយ តែរូបគេមិនអាចមកជួយក្រុមជម្រើសជាតិកម្ពុជាក្រោមអាយុ២២ឆ្នាំ ក្នុងយុទ្ធនាការប្រកួតក្នុងពានរង្វាន់ជើងឯកយុវជនតំបន់អាស៊ាន AFF U22 Championship 2019។ ទោះបីជាយ៉ាងណាក៏ដោយ Honda នៅតែតាមដានការប្រកួតពីចម្ងាយព្រមទាំងរៀបចំប្រព័ន្ធលេងនិងផែនការសម្រាប់ក្រុមដដែល។
គិតត្រឹមពេលនេះពានរង្វាន់លីគកំពូលរបស់ប្រទេសអូស្ត្រាលី បានធ្វើដំណើរចំនួន២០ប្រកួតមកហើយ ខណៈប្រកួតក្នុងពានរង្វាន់ A-League ជាបន្តក្រុមMelbourne Victoryត្រូវប៉ះក្រុមNewcastle Jets នៅវេលាម៉ោង៣និង៥០នាទីរសៀល (ម៉ោងនៅកម្ពុជា) ថ្ងៃទី២ ខែមីនា ឆ្នាំ២០១៩ លើទីលានកីឡដ្ឋាន Marvel Stadium ក្នុងទីក្រុង Melbourneរបស់ខ្លួន។ ក្រុម Melbourne Victoryធ្លាក់មកឈរចំណាត់ថ្នាក់លេខ៣ បណ្តោះអាសន្នក្នុងចំណោមក្លិបទាំង១០ ពោលគឺប្រកួតឈ្នះ១១លើក ស្មើគ្នា៥លើកនិងចាញ់៤លើក។
កីឡាករ Keisuke Honda បានចុះកិច្ចសន្យារយៈពេល១ឆ្នាំជាមួយក្លិបថ្មីនៅប្រទេសអូស្ត្រាលី គឺMelbourne Victoty ខណៈរូបគេធ្លាប់បានរក៣៧គ្រាប់ និងលេងបាន៩៨ប្រកួតឲ្យជម្រើសជាតិជប៉ុន។ រូបគេបានចូលនិវត្តន៍ពីបាល់ទាត់ជម្រើសជាតិក្រោយ 2018 FIFA World Cup នៅប្រទេសរុស្ស៊ីចប់នៅពេលក្រុមជម្រើសជាតិជប៉ុនធ្លាក់នៅវគ្គ១៦ក្រុមចុងក្រោយ៕
Source: Kampuchea Thmey Daily
0 Comments