ការស្ទង់មតិមួយបានបង្ហាញនៅថ្ងៃចន្ទថា ប្រជាប្រិយភាពរបស់ប្រធានាធិបតីបារាំងលោក Emmanuel Macron បានងើបឡើងវិញដល់កម្រិតដែលមិនធ្លាប់ត្រូវបានគេឃើញចាប់តាំងពីការតវ៉ា “អាវកាក់ពណ៌លឿង” បានផ្ទុះឡើងនៅពាក់កណ្តាលខែវិច្ឆិកាខណៈការគាំទ្រសម្រាប់ចលនានេះបានថយចុះ។
ការស្ទាបស្ទង់របស់ Odoxa បានបង្ហាញថា មនុស្សដែលពិចារណាថា លោក Macron ជាប្រធានាធិបតីដ៏ល្អមួយរូបបានកើនឡើងដល់៣២ភាគរយនៅក្នុងខែនេះដែលស្មើទៅនឹងកម្រិតនៅពេលដែលការតវ៉ាបានចាប់ផ្តើមជាលើកដំបូង។
ប្រជាប្រិយភាពរបស់គាត់បានកើនឡើងខ្ពស់វិញចាប់តាំងពីធ្លាក់ចុះដល់២៧ភាគរយកាលពីខែធ្នូដែលជាចំណុចទាបបំផុតក្នុងតំណែងប្រធានាធិបតីរបស់គាត់ខណៈដែលក្រុមអ្នកតវ៉ាបានវាយលុកតាមទីក្រុងប៉ារីសនិងទីក្រុងដទៃទៀតដោយវាយកម្ទេចបង្អួចនិងដុតរថយន្ត។
លោក Macron បានជួបប្រទះនឹងបញ្ហាប្រឈមធំបំផុតចំពោះសិទ្ធិអំណាចរបស់គាត់ពីការតវ៉ានេះដែលបានចាប់ផ្តើមដោយសារតែតម្លៃនៃការរស់នៅខ្ពស់ប៉ុន្តែបានរីករាលដាលទៅជាចលនាដ៏ទូលំទូលាយមួយប្រឆាំងនឹងអតីតធនាគារិកវិនិយោគអាយុ៤១ឆ្នាំរូបនេះនិងកំណែទម្រង់គាំទ្រពាណិជ្ជកម្មរបស់គាត់។
ការស្ទង់មតិបានបង្ហាញថា ៥៥ភាគរយនៃអ្នកដែលត្រូវបានស្ទាបស្ទង់មតិបានគិតថា ការតវ៉ាគួរតែបញ្ឈប់ដែលនេះជាលើកទីមួយហើយដែលមនុស្សភាគច្រើនបានគាំទ្រចំពោះការបញ្ឈប់ចាប់តាំងពីពួកគេបានចាប់ផ្តើមឡើង។
បាតុកម្មប្រចាំសប្ដាហ៍ដោយបាតុករជាទូទៅមានទំហំតូចនិងមិនសូវហឹង្សាទេចាប់តាំងពីវាឡើងដល់ចំណុចខ្ពស់បំផុតកាលពីខែធ្នូនៅពេលរដ្ឋធានីរបស់ប្រទេសបារាំងបានជួបប្រទះកុបកម្ម ការបំផ្លិចបំផ្លាញនិងការលួចប្លន់ដ៏អាក្រក់បំផុតក្នុងរយៈពេលជាច្រើនទសវត្សមកនេះ។
ទោះបីជាយ៉ាងណាក៏ដោយ តួលេខបានកើនឡើងបន្តិចកាលពីថ្ងៃសៅរ៍ដោយក្រសួងមហាផ្ទៃបានប៉ាន់ស្មានថា មនុស្ស៤៦,៦០០នាក់បានចេញមកតវ៉ាទៅទូទាំងប្រទេសសម្រាប់ការតវ៉ាចុងសប្តាហ៍លើកទី១៥ជាប់ៗគ្នា។
ប្រជាប្រិយភាពរបស់លោក Macron បានកើនឡើងវិញនៅពេលដែលរដ្ឋាភិបាលរបស់លោកបានសន្យាថានឹងមានការឆ្លើយតបយ៉ាងមុតមាំចំពោះអំពើហិង្សារបស់អ្នកតវ៉ាហើយលោកបានចាប់ផ្តើមការជជែកដេញដោលជាបន្តបន្ទាប់នៅទូទាំងប្រទេសក្នុងគោលបំណងភ្ជាប់ទំនាក់ទំនងជាមួយអ្នកបោះឆ្នោតឡើងវិញជាពិសេសនៅតាមតំបន់ជនបទ៕ REUTERS
Source: Kampuchea Thmey Daily
0 Comments