នាយករដ្ឋមន្ត្រីអង់គ្លេសលោកស្រី Theresa May កាលពីថ្ងៃអាទិត្យបានអំពាវនាវសុំពេលវេលាបន្ថែមទៀតដើម្បីចរចាឡើងវិញនូវកិច្ចព្រមព្រៀង Brexit របស់លោកស្រីហើយលោកស្រីបានបង្កឲ្យមានការរិះគន់ដោយសារការលើកឡើងថា សភាប្រហែលជានឹងមិនអាចបោះឆ្នោតលើអត្ថបទនេះបានទេរហូតដល់១៧ថ្ងៃមុនពេលចក្រភពអង់គ្លេសចាកចេញពីសហភាពអឺរ៉ុប។
មេដឹកនាំពាណិជ្ជកម្មនិងសមាជិកសភាបានប្រតិកម្មជាមួយនឹងកំហឹងនិងការស្រងាកចិត្តចំពោះព័ត៌មាននេះ។ វាក៏បានជំរុញឲ្យមានការអំពាវនាវថ្មីៗឲ្យពន្យារពេល Brexit ផងដែរដើម្បីចៀសវាងការចាកចេញដោយគ្មានកិច្ចព្រមព្រៀងមួយនៅថ្ងៃទី២៩ខែមីនា។
រដ្ឋមន្ត្រីចំនួន៣រូបរបស់លោកស្រី May បានព្រមានកាលពីដើមថា សភានឹងស្វែងរកការពន្យាពេលប្រសិនបើមិនមានការទម្លាយភាពទាល់ច្រកណាមួយក្នុងសប្តាហ៍នេះទេនោះ។
លោកស្រីបានលើកឡើងលទ្ធភាពនៃការបោះឆ្នោតមួយលើកិច្ចព្រមព្រៀងរបស់លោកស្រីក្នុងរយៈពេលប៉ុន្មានថ្ងៃខាងមុខនេះប៉ុន្តែបាននិយាយកាលពីថ្ងៃអាទិត្យថា លោកស្រីនៅតែកំពុងចរចាជាមួយសហភាពអឺរ៉ុប។
លោកស្រីបាននិយាយក្នុងកិច្ចប្រជុំកំពូលមេដឹកនាំអ៊ឺរ៉ុបនិងអារ៉ាប់នៅប្រទេសអេហ្ស៊ីបថា “នៅពេលយើងកំពុងបន្តជាមួយកិច្ចចរចាទាំងនោះ យើងនឹងមិននាំមកនូវការបោះឆ្នោតដ៏មានអត្ថន័យដល់សភានៅសប្តាហ៍នេះទេ។ ប៉ុន្តែរឿងនេះនឹងកើតឡើងនៅថ្ងៃទី១២ខែមីនា”។
សមាជិកសភាកាលពីខែមុនបានច្រានចោលកិច្ចព្រមព្រៀងដកខ្លួនរបស់លោកស្រីហើយចាប់តាំងពីពេលនោះមក លោកស្រី May បានព្យាយាមដោះស្រាយក្តីព្រួយបារម្ភរបស់ពួកគេអំពីផែនការរបស់ខ្លួនដែលគេហៅថា “Backstop” សម្រាប់ព្រំដែនរវាងប្រទេសអៀរឡង់ខាងជើងនិងប្រទេសអៀរឡង់ដែលជាសមាជិកសហភាពអ៊ឺរ៉ុប។
លោកស្រីបានជួបជាមួយប្រធានក្រុមប្រឹក្សាអឺរ៉ុបលោក Donald Tusk នៅទីក្រុង Sharm el-Sheikh ហើយក៏នឹងធ្វើកិច្ចចរចានៅឯកិច្ចប្រជុំកំពូលជាមួយលោកស្រីអធិការបតីអាល្លឺម៉ង់ Angela Merkel ផងដែរខណៈដែលក្រុមការងាររបស់លោកស្រីនឹងវិលត្រលប់ទៅកាន់ទីក្រុងប្រ៊ូសសែលវិញនៅថ្ងៃអង្គារ៕ AFP
Source: Kampuchea Thmey Daily
0 Comments