នៅស្រុកមង្គលបូរី និងស្វាយចេក ខ្យល់កន្ត្រាក់ខូចខាតផ្ទះពលរដ្ឋជាង៣២ខ្នង កម្លាំងចម្រុះចុះជួយជួសជុលដើម្បីសម្រួលការរស់នៅរបស់គាត់វិញហើយ

បន្ទាយមានជ័យ ៖ នៅស្រុកមង្គលបូរី និងស្វាយចេក មានខ្យល់កន្ត្រាក់ខូចខាតផ្ទះប្រជាពលរដ្ឋជាង៣០ខ្នង នៅល្ងាចថ្ងៃទី២៤ ខែមីនា ឆ្នាំ២០១៩ លុះថ្ងៃទី២៥មីនា មានកម្លាំងចម្រុះ នគរបាល និងកងកម្លាំងផ្សេងទៀត បានចុះជួយជួសជុលជូនបងប្អូនឡើងវិញ ដើម្បីធ្វើការសម្រួលក្នុងការរស់នៅរបស់គាត់។

គួរបញ្ជាក់ផងដែរថា នៅល្ងាច ថ្ងៃទី២៤មីនានេះ មានភ្លៀងកក់ខែលាយឡំខ្យល់កន្ត្រាក់លើកទី២ នារដូវប្រាំង ឆ្នាំ២០១៩ នៅខេត្តបន្ទាយមានជ័យ ធ្វើឲ្យផ្ទះប្រជាពលរដ្ឋនៅស្រុក២ មានស្រុកមង្គលបូរី និងស្រុកស្វាយចេក ត្រូវបានខ្យល់កន្ត្រាក់បោកចំ បណ្តាលឲ្យផ្ទះប្រជាពលរដ្ឋ៣២ខ្នង ត្រូវដួលរលំនៅថ្ងៃទី២៤ ខែមីនា ឆ្នាំ២០១៩ ក្រោយពីកើតហេតុហើយ មានកម្លាំងប្រដាប់អាវុធ ក៏ដូចជាអាជ្ញាធរ មូលដ្ឋាន បានចុះជួយយកសម្ភារៈគ្រឿងផ្ទះ និងផ្តល់ស័ង្កសី ទៅចែកជូនពួកគាត់តាមចំនួន នៃការខូចខាតដោយសារខ្យល់កន្ត្រាក់នេះ។

លោកឧត្ដមសេនីយ៍ទោ អាត់ ខែម ស្នងការនគរបាល បន្ទាយមានជ័យ បានឲ្យដឹងថា ខ្យល់កន្ត្រាក់ពេលមានភ្លៀងកក់ខែនោះ បង្កខូចខាតរបើកដំបូល និងជញ្ជាំងផ្ទះប្រជាពលរដ្ឋ នៅភូមិអូរអណ្តូងកណ្តាល និងភូមិអូរអណ្តូងកើត ឃុំបន្ទាយនាងស្រុកមង្គលបូរី ចំនួន២០ខ្នង។ ក៏របើកដំបូង ជញ្ជាំងផ្ទះពលរដ្ឋចំនួន១២ខ្នង នៅឃុំ ស្វាយចេក ស្រុកស្វាយចេក ក្នុងភូមិថ្មី៨ខ្នង ភូមិស្លែង៣ខ្នង ក្នុងនោះ សាលាឆាន់ វត្តថ្មី ១ខ្នង របើកដំបូល ទាំងស្រុងចំនួន៧ខ្នង។ សរុបទាំង២ស្រុក មានផ្ទះប្រជាពលរដ្ឋចំនួន៣២ខ្នងខូចខាត សាលាឆាន់១ខ្នង របើកដំបូលទាំងស្រុង៧ខ្នង។

បន្ទាប់ពីមានគ្រោះថ្នាក់ធម្មជាតិ ខ្យល់កន្ត្រាក់នោះ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន និង ជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានណែនាំដល់មន្ត្រីរាជការកងកម្លាំងប្រដាប់អាវុធ និងអាជ្ញាធរមូលដ្ឋាន ត្រូវចុះជួយធ្វើផ្ទះជូនប្រជាជន និងផ្តល់ស័ង្កសី ជូនតាមខ្នងផ្ទះ ទៅតាមការខូចខាតភ្លាមៗផងដែរ៕