រតនគិរី ៖ បុរសម្នាក់ ត្រូវបានសមត្ថកិច្ចនគរបាលស្រុកអណ្ដូងមាសចាប់ខ្លួន ពាក់ព័ន្ធករណីរំលោភសេពសន្ថវៈលើអនីតិជន អាយុ៦ឆ្នាំ នៅចំណុចភូមិតាំងសេ ឃុំញ៉ាង ស្រុកអណ្តូងមាស ខេត្តរតនគិរី។
បើយោងតាមរបាយការណ៍ពីនគរបាលស្រុកអណ្តូងមាសបានឲ្យដឹងថា កាលពីវេលាម៉ោង១២និង០០នាទីថ្ងៃត្រង់ ថ្ងៃទី៧ ខែមីនា ឆ្នាំ២០១៩កន្លងទៅ ជនសង្ស័យ ឈ្មោះ សល់ បីញ ភេទប្រុស អាយុ២៤ឆ្នាំ ជនជាតិច្រាយ មុខរបរកសិករ បច្ចុប្បន្នរស់នៅភូមិ/ឃុំកើតហេតុខាងលើ ជាប់ពាក់ព័ន្ធករណីរំលោភសេពសន្ថវៈទៅលើអនីតិជន។ រីឯក្មេងស្រីរងគ្រោះ ឈ្មោះ ក ស អាយុ៦ឆ្នាំ ជនជាតិច្រាយ មានទីលំនៅភូមិ/ឃុំ កើតហេតុជាមួយ។
យោងតាមរបាយការណ៍បានបន្តថា នៅថ្ងៃទី៨ ខែមីនា ឆ្នាំ២០១៩ នៅវេលាម៉ោង១០និង០០នាទី កម្លាំងប៉ុស្តិ៍រដ្ឋបាលឃុំញ៉ាង បានទទួលពាក្យបណ្ដឹងពីឪពុកក្មេងស្រីរងគ្រោះ បន្ទាប់មក សមត្ថកិច្ចបានចុះទៅដល់កន្លែងកើតហេតុ និងត្រួតពិនិត្យ។
បន្ទាប់មកដោយមានការចង្អុលបង្ហាញ ពី លោក ជា ពេជ្រ ព្រះរាជអាជ្ញាអមសាលាដំបូងខេត្ត ក្រោយមកសមត្ថកិច្ចបានធ្វើការឃាត់ខ្លួនជនសង្ស័យបណ្ដោះអាសន្ន នៅអធិការនគរបាលស្រុកអណ្ដូងមាស និងកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីយកទៅផ្ដន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments