ប្រទេសអូស្ត្រាលីបានសារភាពថា ខ្លួនមិនបានផ្តោតការយកចិត្តទុកដាក់គ្រប់គ្រាន់លើទីលាននៅតំបន់ប៉ាស៊ីហ្វិករបស់ខ្លួនទេប៉ុន្តែបានប្តេជ្ញាថានឹងធ្វើវិសោធនកម្មរយៈពេលយូរអង្វែងស្របពេលដែលឥទ្ធិពលរបស់ប្រទេសចិនបានកើនឡើងនៅក្នុងតំបន់។
រដ្ឋមន្ត្រីក្រសួងអភិវឌ្ឍន៍អន្ដរជាតិនិងប៉ាស៊ីហ្វិកលោកស្រី Anne Ruston បានប្រាប់ AFP នៅថ្ងៃសុក្រថា “ខ្ញុំគិតថា យើងត្រូវតែទទួលយកការរិះគន់ខ្លះ។ យើងប្រហែលជាមិនបានដាក់ការយកចិត្តទុកដាក់និងកិច្ចខិតខំប្រឹងប្រែងច្រើនចូលក្នុងតំបន់របស់យើងដូចដែលយើងគួរធ្វើទេ”។
ក្នុងរយៈពេលប៉ុន្មានខែថ្មីៗនេះ លោកស្រី Ruston បានខិតខំប្រឹងប្រែងជួសជុលនិងដោះស្រាយកិច្ចការរវាងប្រទេសអូស្ត្រាលីនិងបណ្តាកោះប៉ាស៊ីហ្វិកដែលជាផ្នែកមួយនៃការបង្កើនកិច្ចខិតខំប្រឹងប្រែងរបស់លោកនាយករដ្ឋមន្ត្រី Scott Morrison នៅក្នុងតំបន់។
គោលនយោបាយនេះរួមបញ្ចូលទាំងជំនួយបន្ថែម ជំនួយសន្តិសុខបន្ថែម អ្នកការទូតជាច្រើនទៀតដែលធ្វើការនៅក្នុងតំបន់ហើយសំខាន់ជាងនេះទៅទៀតគឺទំនាក់ទំនងដោយផ្ទាល់។
វាជាផ្នែកមួយដ៏ធំដែលឆ្លើយតបទៅនឹងសកម្មភាពសេដ្ឋកិច្ច នយោបាយនិងយោធាដែលកំពុងរីកលូតលាស់របស់ក្រុងប៉េកាំងនៅក្នុងតំបន់។
ខណៈពេលដែលប្រទេសអូស្ត្រាលីផ្តោតការយកចិត្តទុកដាក់លើទីក្រុង Fallujah ជាងកោះហ្វីជីនោះ ប្រទេសចិនបានផ្តល់ប្រាក់កម្ចីនិងការវិនិយោគនៅក្នុងតំបន់ហើយស្វែងរកកិច្ចសន្យាធនធានធម្មជាតិនិងទូរគមនាគមន៍។
ការចូលរួមឡើងវិញរបស់ប្រទេសអូស្ត្រាលីត្រូវបានរំខានដោយការខ្វែងគំនិតគ្នាដ៏ជ្រាលជ្រៅជាមួយបណ្តាប្រជាជាតិប៉ាស៊ីហ្វិកអំពីជំហរដ៏គួរឲ្យសង្ស័យរបស់រដ្ឋាភិបាលអភិរក្សនិយមស្តីពីការប្រែប្រួលអាកាសធាតុដែលជាការគំរាមកំហែងមួយដល់ប្រជាជាតិកោះជាច្រើន។
នាយករដ្ឋមន្ត្រីហ្វីជីលោក Voreqe Bainimarama គឺស្ថិតក្នុងចំណោមអ្នកដែលបានចោទប្រកាន់ប្រទេសអូស្ត្រាលីថាបានដាក់ឧស្សាហកម្មធ្យូងថ្មរបស់ខ្លួននៅខាងលើសុខុមាលភាពនៃប្រជាជនប៉ាស៊ីហ្វិក។
ប្រទេសអូស្ត្រាលីបានប្តេជ្ញាចិត្តចំពោះគម្រោងមហិច្ឆតាមួយចំនួនដូចជាការជួយប្រទេសប៉ាពួរញ៉ូហ្គីណេដើម្បីនាំយកចរន្តអគ្គិសនីដល់ប្រជាជន៧០ភាគរយនៅត្រឹមឆ្នាំ២០៣០៕ AFP
Source: Kampuchea Thmey Daily
0 Comments