ភ្នំពេញ ៖ នៅថ្ងៃទី០៨ ខែមីនា ឆ្នាំ២០១៩ ដែលជាថ្ងៃទីពីរ នៃការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ មានគណបក្សនយោបាយចំនួន៦ បានដាក់ពាក្យសុំចុះបញ្ជីឈរឈ្មោះបោះឆ្នោតជ្រើសរើសក្រុមប្រឹក្សារាជធានី ខេត្ត បន្ថែម ហើយក៏មានគណបក្សនយោបាយ ចំនួន៤ បានទៅដាក់ពាក្យសុំចុះបញ្ជីឈរឈ្មោះបោះឆ្នោតជ្រើសរើសក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌ នៅ គធ.ខប ផងដែរ។
គណបក្សនយោបាយ ដែលបានដាក់ពាក្យឈរឈ្មោះបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្តបន្ថែមទាំងនោះរួមមាន ទី១, គណបក្សប្រជាជនកម្ពុជា ចុះបញ្ជីនៅរាជធានី-ខេត្ត ឡើងដល់ចំនួន២៤ មានបេក្ខជនពេញសិទ្ធិចំនួន៥៤០ និងបេក្ខជនបម្រុងចំនួន៥៤១ សរុបចំនួន១០៨១ ទី២, គណបក្សហ្វ៊ុនស៊ិនប៉ិច ចុះបញ្ជីនៅរាជធានី-ខេត្ត ឡើងដល់ចំនួន៥ មានបេក្ខជនពេញសិទ្ធិចំនួន១៣១ និងបេក្ខជនបម្រុងចំនួន១៣១ សរុប២៦២ ទី៣, គណបក្សយុវជនកម្ពុជា ចុះបញ្ជីនៅរាជធានី-ខេត្ត ចំនួន៤ មានបេក្ខជនពេញសិទ្ធិចំនួន១០០ និងបេក្ខជនបម្រុងចំនួន១០០ សរុប២០០ ទី៤, ខ្មែរសាធារណរដ្ឋ ចុះបញ្ជីនៅរាជធានី-ខេត្តឡើងដល់ចំនួន២ មានបេក្ខជនពេញសិទ្ធិចំនួន៥៤ និងបេក្ខជនបម្រុងចំនួន៥៤ សរុប១០៨ ទី៥, គណបក្សឆន្ទៈខ្មែរ ចុះបញ្ជីនៅរាជធានី-ខេត្ត ឡើងដល់ចំនួន៣ មានបេក្ខជនពេញសិទ្ធិចំនួន៧៩ និងបេក្ខជនបម្រុងចំនួន៧៩ សរុប១៥៨ និងទី៦, គណបក្សខ្មែររួបរួមជាតិ ចុះបញ្ជីនៅរាជធានី-ខេត្ត ឡើងដល់ចំនួន៣ មានបេក្ខជនពេញសិទ្ធិចំនួន៦៧ និងបេក្ខជនបម្រុងចំនួន៦៧ សរុប១៣៤។
ចំណែកគណបក្សនយោបាយ ដែលបានដាក់ពាក្យឈរឈ្មោះបោះឆ្នោតជ្រើសរើសក្រុមប្រឹក្សាក្រុង ក្រុមប្រឹក្សាស្រុក និងក្រុមប្រឹក្សាខណ្ឌទាំងនោះរួមមាន ទី១, គណបក្សប្រជាជនកម្ពុជា ចុះបញ្ជីនៅក្រុង ស្រុក ខណ្ឌ ចំនួន១៩៦ មានបេក្ខជនពេញសិទ្ធិចំនួន៣៣០៣ និងបេក្ខជនបម្រុងចំនួន៣៣១០ សរុប៦៦១៣ ទី២, គណបក្សហ្វ៊ុនស៊ិនប៉ិច ចុះបញ្ជីនៅក្រុង ស្រុក ខណ្ឌ ចំនួន៣៤ មានបេក្ខជនពេញសិទ្ធិចំនួន៦២៥ និងបេក្ខជនបម្រុងចំនួន៦២៧ សរុប១២៥២ ទី៣, គណបក្សយុវជនកម្ពុជា ចុះបញ្ជីនៅក្រុង ស្រុក ខណ្ឌ ចំនួន៥ មានបេក្ខជនពេញសិទ្ធិចំនួន១២៨ និងបេក្ខជនបម្រុងចំនួន១២៨ សរុប២៥៦ និងទី៤, គណបក្សខ្មែររួបរួមជាតិ ចុះបញ្ជីនៅក្រុង ស្រុក ខណ្ឌ ចំនួន៨ មានបេក្ខជនពេញសិទ្ធិចំនួន១៦១ និងបេក្ខជនបម្រុងចំនួន១៦១ សរុប៣២២។
អនុលោមតាមបទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៣ ប្រការ២.៤៣ ចែងថា គណៈកម្មការរាជធានី ខេត្តរៀបចំការបោះឆ្នោត (គធ.ខប) ត្រូវពិនិត្យសម្រេចលើពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត ក្នុងរយៈពេលយ៉ាងយូរ ៥ (ប្រាំ) ថ្ងៃ បន្ទាប់ពីបានទទួលពាក្យសុំ។ ក្នុងករណី គធ.ខប ពិនិត្យឃើញថា សំណុំលិខិតរបស់គណបក្សនយោបាយណាមួយពុំបានបំពេញលក្ខខណ្ឌ ដូចមានចែងក្នុងប្រការ២.៣៦ ដល់ប្រការ២.៤១ នៃបទបញ្ជា និងនីតិវិធី សម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៣ គធ.ខប ត្រូវជូនដំណឹងទៅសាមីគណបក្សនយោបាយនោះវិញ ដើម្បីបំពេញបន្ថែម ឬកែតម្រូវ។ សាមីគណបក្សនយោបាយត្រូវបំពេញលក្ខខណ្ឌ ឬកែតម្រូវលក្ខខណ្ឌ ចំណុចដែលខ្វះខាតយ៉ាងយូរ៥ (ប្រាំ) ថ្ងៃ បន្ទាប់ពីថ្ងៃដែលបានទទួលលិខិតជូនដំណឹងនេះ។
សូមបញ្ជាក់ថា ដំណើរការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតក្រុមប្រឹក្សា នឹងត្រូវចាប់ផ្ដើមពីថ្ងៃទី០៧ ខែមីនា ឆ្នាំ២០១៩ ដល់ថ្ងៃទី១១ ខែមីនា ឆ្នាំ២០១៩ ហើយការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតក្រុមប្រឹក្សា ត្រូវធ្វើនៅគណៈកម្មការរាជធានីខេត្តរៀបចំការបោះឆ្នោត (គធ.ខប) ហើយគណបក្សនយោបាយ ដែលមានបំណងឈរឈ្មោះបោះឆ្នោតត្រូវយកគំរូពាក្យស្នើសុំនៅលេខាធិការដ្ឋានគណៈកម្មការរាជធានី ខេត្ត រៀបចំការបោះឆ្នោត ឬអាចទាញយកគំរូពាក្យស្នើសុំពីគេហទំព័ររបស់ គ.ជ.ប។
ការបោះឆ្នោតជ្រើសរើសក្រុមប្រឹក្សា អាណត្តិទី៣ នឹងប្រព្រឹត្តទៅនៅថ្ងៃទៅ២៦ ខែឧសភា ឆ្នាំ២០១៩ ហើយការចុះឈ្មោះអ្នកបោះឆ្នោត បានចាប់ផ្ដើមដំណើរ កាលពីថ្ងៃទី០៤ ដល់ថ្ងៃទី១៩ ខែមីនា ឆ្នាំ២០១៩ មានរយៈពេល១៣ថ្ងៃ ដោយមិនរាប់ថ្ងៃអាទិត្យ និងថ្ងៃបុណ្យផ្លូវការ។ អ្នកបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សានេះ គឺជាសមាជិកក្រុមប្រឹក្សាឃុំ សង្កាត់ នៅក្នុងមុខតំណែង ដែលមានសមាជិក សរុបចំនួន១១,៥៧២នាក់ ទូទាំងប្រទេស។
ទាក់ទងការបោះឆ្នោតក្រុមប្រឹក្សានេះដែរ កាលពីថ្ងៃទី០៤ ខែមីនា ឆ្នាំ២០១៩ ក្រសួងមហាផ្ទៃ បានស្នើឲ្យរដ្ឋបាលរាជធានី-ខេត្ត ជួយសម្របសម្រួល និងបង្កលក្ខណៈងាយស្រួលក្នុងការចេញលិខិតបញ្ជាក់ផ្សេងៗជូនដល់បេក្ខជនឈឈ្មោះបោះឆ្នោតរបស់គណបក្សនយោបាយ សម្រាប់យកទៅប្រើប្រាស់ក្នុងការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាផងដែរ៕
Source: Kampuchea Thmey Daily
0 Comments