តាកែវ ៖ លោក អ៊ូច ភា អភិបាលខេត្តតាកែវ បានព្រមានចាត់វិធានក្ដៅ ចំពោះអភិបាលស្រុក ក្រុង រូបណា ដែលបណ្ដោយបើកដៃឲ្យឈ្មួញទុច្ចរិតនាំចូលជ្រូក ដោយខុសច្បាប់ពីប្រទេសវៀតណាម ដឹកកាត់តាមស្រុករបស់ខ្លួន ពិសេសគឺស្រុកជាប់ព្រំដែន។
ថ្លែងក្នុងកិច្ចប្រជុំបន្ទាន់ស្ដីពីការត្រួតពិនិត្យ និងទប់ស្កាត់ការឆ្លងរាលដាលជំងឺ ប៊េស្ដជ្រូកអាហ្វ្រិក កាលពីរសៀលថ្ងៃទី២២ ខែមីនា ឆ្នាំ២០១៩នេះ នៅសាលប្រជុំសាលាខេត្ត តាកែវ លោក អ៊ូច ភា អភិបាលខេត្ត បានថ្លែងនៅចំពោះ គណៈអភិបាលស្រុក ក្រុង និង មន្ត្រីជំនាញពាក់ព័ន្ធថា ប្រសិនបើលោកពិនិត្យឃើញថា មានអាជ្ញាធរមូលដ្ឋានណា មានការពាក់ព័ន្ធ ទៅនឹងករណីនាំសត្វជ្រូកចូលតាមច្រករបៀង ដោយខុសច្បាប់ ស្រុកនោះ គឺជាអ្នកទទួល ខុសត្រូវចំពោះមុខច្បាប់ ជាពិសេសអាចនឹងត្រូវដកតំណែងចេញតែម្តង។
លោកអភិបាលខេត្តតាកែវ បានបន្តថា ចំពោះសត្វជ្រូកដែលនាំចូលតាមច្រកព្រំដែន គឺត្រូវតែនាំចូលតាមច្រកទ្វារអន្តរជាតិភ្នំដិនតែមួយគត់ ដើម្បីធានាបានសុវត្ថិភាព និងភាពស្របច្បាប់របស់ឈ្មួញទាំងនេះ ជាពិសេសមិនធ្វើឲ្យបាត់បង់ចំណូលពន្ធគយ ដែលជាការធ្វើឲ្យជួយលើកស្ទួយសេដ្ឋកិច្ចជាតិថែមមួយកម្រិតទៀត។
លោក អ៊ូច ភា បានបន្ថែមថា ប្រសិនបើឃើញឡានដឹកជ្រូក ដែលឆ្លងកាត់មូលដ្ឋានរបស់ខ្លួនតាមស្រុក ក្រុងនីមួយៗ អាជ្ញាធរស្រុក ក្រុង ត្រូវ តែឃាត់ទុករថយន្តដឹកជ្រូកនេះ ហើយឆែកមើលឯកសារពាក់ព័ន្ធ ថាតើមានអាជ្ញាប័ណ្ណត្រឹមត្រូវដែលចេញពីក្រសួងកសិកម្មដែរឬទេ? បើការដឹកជ្រូកចូលនោះមិនស្របច្បាប់ទេ ត្រូវរកមុខអ្នកដែលអនុញ្ញាតឲ្យឃើញ ដើម្បីចាត់វិធានការតាមផ្លូវច្បាប់។ ប្រសិនបើអាជ្ញាធរមូលដ្ឋាន ស្រុក ក្រុង ណាដែលចាប់បានឡានដឹកជ្រូក ខុសច្បាប់នៅក្នុងមូលដ្ឋានរបស់ខ្លួននោះ នឹងទទួលបានថវិកាលើកទឹកចិត្ត ចំនួន ១លានរៀល ពីរូបលោកផ្ទាល់៕
Source: Kampuchea Thmey Daily
0 Comments