មាស ​សុជាតិ បាន​ត្រឹម​ស្មើ​ជាមួយ​ អ៊ីរ៉ង់ ​កា​ហ្វា​រី​ ​

ប្រដាល់ ៖ មាស សុជាតិ អ្នក​ប្រដាល់​ក្លិប​ឃ្លាំងមឿង​កីឡា ដែល​ត្រូវគេ​ផ្គូ​ឲ្យ​​ជួប​ប្រកួត​ជាមួយ​អ្នក​ប្រដាល់​អ៊ីរ៉ង់​ ឈ្មោះ កា​ហ្វា​រី (Gafari Goloojeh) នៅក្នុង​កម្មវិធី​ប្រដាល់​Boostrong Fighter On Fire នៅ​សង្វៀន​ទូរទស្សន៍​អាស៊ីអាគ្នេយ៍​(SEATV) កាលពី​ថ្ងៃទី​២៤ ខែ​មីនា​ ឆ្នាំ​២០១៩​នោះ គឺ​បាន​ត្រឹម​ស្មើគ្នា​តែប៉ុណ្ណោះ។
​
ពីរ​នាក់​នេះ ប្រកួត​គ្នា​ប្រាំ​ទឹក​ពេញ ក្នុង​ប្រភេទ​ទម្ងន់៦៥គីឡូក្រាម។ កា​ហ្វា​រី បាន​បែក​ចុង​ភ្នែក​ខាង​ស្តាំ​ក្នុង​ទឹក​ទី​៤ ដោយសារ​កែង​របស់ ​មាស សុជាតិ។ អ្នក​ប្រដាល់​ អ៊ីរ៉ង់ ​នេះ ពុំមែន​ជា​ជើង​ខ្លាំង​នោះ​ទេ គេ​ទើប​មក​ស្រុក​ខ្មែរ​ជា​លើកដំបូង​ប៉ុណ្ណោះ។
​
​ប៉ុន្តែ​យ៉ាងណា មាស សុជាតិ គេ​ពិបាក​វាយ​ទៅលើ​កា​ហ្វា​រី​នោះ​ណាស់ ដោយសារ​គែ​ខ្ពស់ ហើយ​កណ្ដាប់ដៃ​របស់​គេ ក៏​លឿន រហ័ស និង​ខ្លាំង​ណាស់ដែរ ដែល​ធ្វើឲ្យ សុជាតិ ត្រូវ​ច្រើន​ដៃ​គួរសម​ដែរ នៅពេលដែល​គេ​ព្យាយាម​ចូល​ជិត​ដើម្បី​អោប​ប្រើ​ជង្គង់ និង​កែង​នោះ។ ម្ល៉ោះហើយ ទើប​ចប់​ការ​ប្រកួត​៥​ទឹក មាស សុជាតិ ​បាន​ត្រឹម​ស្មើ​ពិន្ទុ​ប៉ុណ្ណោះ។
​
​សុខ សុវណ្ណ អ្នក​ប្រដាល់​ក្លិប​កងពលធំ​អន្តរាគមន៍​លេខ​២ បាន​ផ្ដួល ថន ភឿ​ត អ្នក ប្រដាល់​ក្លិប​ឃ្លាំង​មឿង​កីឡា ឲ្យ​បោះបង់ចោល​ការប្រកួត​ក្នុង​ទឹក​ទឹក​ទី​៣។ ពីរ​នាក់​នេះ ជួបគ្នា​ក្នុង​ទម្ងន់​៦០​គីឡូក្រាម ។​
​
​ថន ភឿ​ត ត្រូវ​សុវណ្ណ ទាត់​ជើង​រហូតដល់​ឈឺ ត្រូវ​អាជ្ញាកណ្ដាល​រាប់​៨ ពីរដង​ក្នុង​ទឹក​ទី​៣​នេះ ហើយ​នៅពេល​ដួល​ម្តងទៀត គេ​ក៏​បោះបង់​ការប្រកួត​តែម្តង ព្រោះតែ​ឈឺ​ជើង​ខាងស្តាំ មិនអាច​បន្ត​ការ​ប្រកួត​ទៀត​បាន។
​
ចំណែក សេន កុសល អ្នក​ប្រដាល់​ក្លិប​មោងឬស្សី​មរតក​គុន​ខ្មែរ ត្រូវ​គ្រូពេទ្យ​បញ្ឈប់​លែង​ប្រកួត ដោយសារតែ​គេ​មាន​របួស​ធំ​(​បែក​ថ្ងាស​) ហូរឈាម​ច្រើនពេក និង​រំខាន​ដល់​ការប្រកួត​ទៀតផង។ រីឯ នួន ម៉ា​រ៉ា​ឌី អ្នក​ប្រដាល់​ក្លិប​ភារ​ម្យ​គុន​ខ្មែរ ប្រកួត​ស្មើ​ជាមួយ សេក សាវ៉ា​ន់ អ្នក​ប្រដាល់​ក្លិប​អង្គរ​មាន​ជ័យ​ខេត្តសៀមរាប ហើយ​ខាំ សុវណ្ណ​និ​ត វាយ​ឈ្នះ​ឆាំ សុជាតិ ក្លិប​កុលបុត្រ​គុន​ខ្មែរ​ក្នុង​ទឹក​ទី​៤។

•ហ៊ឹម សេរី ស្មើ ស៊ុម ជី​ឡេ​ក ឯ វង្ស វិឆ័យ ចាញ់ ម៉ា​ទីន ដោយ​ពិន្ទុ
​អ្នក​ប្រដាល់​ហ៊ឹម សេរី ក្លិប​តា​ព្រហ្ម​មានជ័យ បាន​វាយ​ស្មើ​ជាមួយ​អ្នក​ប្រដាល់​ជើង ខ្លាំង ថៃ​ស៊ុម ជី​ឡេ​ក (Suom Chilek) ក្នុង​ការជួប​ប្រកួត​គ្នា​នៅលើ​សង្វៀន​SEATV​កាលពី​រសៀល​ថ្ងៃទី​២៤​ ខែមីនា ឆ្នាំ​​២០១៩​នេះដែរ។
​
ហ៊ឹម សេរី ដែល​កន្លងមក​កម្រ​មាន​អ្នក​ប្រដាល់​ថៃ​អាច​យកឈ្នះ​ ឬក៏​ស្មើ​ជាមួយ​គេ​បាន​ណាស់ តែ​លើក​នេះ​ត្រូវ​ប៉ះ​ជួប​ប្រកួត​ជាមួយ​អ្នក​ប្រដាល់​ថៃ​ស៊ុម ជី​ឡេ​ក សេរី​ទៅ​អត់​រួច​ដែរ ដោយសារ​អ្នក​ប្រដាល់​ថៃ​រូបនេះ គេ​ខ្លាំង ​និង​រឹងមាំ​ពេក។
​
ស៊ុម ជី​ឡេ​ក មកជួប​សេរី​លើក​នេះ ដើម្បី​សងសឹក​អោយ​មិត្ត​រួម​ជាតិ​របស់គេ ប៉ុន្តែ​ពុំ​អាច​ធ្វើ​បាន​សម្រេច ដោយសារ​ហ៊ឹម សេរី គេ​ខ្លាំង​ហួស​ពី​ការគិត​ទុក​មុន​របស់គេ។
​
ចំពោះ វង្ស វិឆ័យ អ្នក​ប្រដាល់​ក្លិប​កងពលតូច​ទ័ព​ពិសេស​ឆ័​ត្រ​យោង​៩១១ បាន​វាយ​ចាញ់​អ្នក​
ប្រដាល់​អ៊ីរ៉ង់​ឈ្មោះ ម៉ា​ទីន (Matin) ដោយ​ពិន្ទុ បន្ទាប់ពី​ប្រកួត​គ្នា​៥​ទឹក​ពេញ​នោះ។​ ពីរ​នាក់​នេះ ជួប​ប្រកួត​គ្នា​ក្នុង​ប្រភេទ​ទម្ងន់ ៦៩​គីឡូក្រាម។
​
ក្នុងការ​ប្រកួត​៥​ទឹក​នោះ វិឆ័យ បាន​ព្យាយាម​សម្រុក​វាយ​កែង​ និង​ជង្គង់​ទៅលើ​ ម៉ា​ទីន ខ្លាំង​ណាស់​ដែរ ប៉ុន្តែ​មិនអាច​ផ្ដួល​អ្នក​ប្រដាល់​អ៊ីរ៉ង់​រូប​នេះ​បាន ព្រោះ​ម៉ា​ទីន គេ​មានការ​ប៉ិនប្រសប់​ខាង​ប្រដាល់​នេះដែរ។
​
ចំពោះ​ការប្រកួត​រវាង​អ្នក​ប្រដាល់​រួម​ជាតិ​វិញ អេ​លី​ត កែវ​ឡុង អ្នក​ប្រដាល់​ក្លិប​ឆ្មា​ស​សែន​សុខ​គុន​ខ្មែរ ដែល​ឡើង​ប្រកួត​សងសឹក​មាឃ វណ្ណា​រ៉ា អ្នក​ប្រដាល់​ក្លិប​រាជសីហ៍ ខេត្តរតនគិរី ក្នុង​ទម្ងន់​៦០​គីឡូ​ក្រាម​នោះ បាន​ត្រូវ​មាឃ វណ្ណា​រ៉ា វាយ​ឲ្យ​សន្លប់​ក្នុង​ទឹក​ទី​២។ កាលពី​ជួបគ្នា​លើក​មុន កែវ​ឡុង វាយ​ចាញ់​វណ្ណា​រ៉ា ត្រឹម​ពិន្ទុ​ប៉ុណ្ណោះ។​
​
វ៉ែន សុវណ្ណ អ្នក​ប្រដាល់​ក្លិប​កងកេង​មាន​រិ​ទ្ធ​ខេត្តបាត់ដំបង បាន​ប្រកួត​ចាញ់​លួ​ន សុខ​ខេង អ្នក​ប្រដាល់​ក្លិប​ពុទ្ធ​សេរី​វង្ស​កីឡា ក្នុង​ទឹក​ទី​២ ក្រោយពី​សុខ​ខេង​ទាត់​ឲ្យ​ខូច​ជើង​នោះ។

•​នី សុ​ភី ជួប​ជើង​ខ្លាំង​ផុង សា​រិ បាន​ត្រឹម​ស្មើ ខណៈ ធន អៀង​ឡៃ​ ចាញ់​ម៉ា​ធី​ ដោយ​ពិន្ទុ​
​អ្នក​ប្រដាល់​ថៃ​២​រូប ដែល​ឆ្លងដែន​មក​ប្រកួត​ជាមួយ​អ្នក​ប្រដាល់​ខ្មែរ កាលពី​រសៀល​ថ្ងៃទី​២៣​ ខែ​មីនា​ឆ្នាំ​២០១៩ នៅលើ​សង្វៀន​ប្រដាល់​SEA-TV​នោះ ម្នាក់​បាន​ស្មើ និង​ម្នាក់ទៀត​បានឈ្នះ។​
​ ​
អ្នក​ប្រដាល់​ថៃ​ដែល​បាន​ស្មើ​នោះ គឺ នី សុ​ភី អ្នក​ប្រដាល់​ជើង​ខ្លាំង​របស់​កម្ពុជា ក្លិប​សាល​វ័​ន្ត​កីឡា និង​ធន អៀង​ឡៃ​អ្នក​ប្រដាល់​សមាគម​កីឡាប្រដាល់​ក្រសួងការពារជាតិ ដើម្បី​តទល់​ជាមួយ​អ្នក​ប្រដាល់​ថៃ​២​នាក់​ដែល​ឆ្លងដែន​មក​នោះ។​
​
អ្នក​ប្រដាល់​ថៃ ផុង សិរិ (Phong Seri) ដែលជា​ជើង​ខ្លាំង ​និង​ជា​ម្ចាស់​ខ្សែក្រវាត់​ដល់​ទៅ​៣ ដែល​បាន​ជួប​ប្រកួត​ជាមួយ ​នី សុ​ភី អ្នក​ប្រដាល់​ជើង​ខ្លាំង​របស់​កម្ពុជា​នៅ​ក្លិប​សាល​វ័​ន្ត​កីឡា។​
​
នី សុ​ភី គេ​ត្រូវ​ដួល​ដោយសារ​ផុង សិរិ កាច់​ផ្ដួល​ច្រើនលើក​ពេក ទើប​ពុំ​បានឈ្នះ​នោះ។ សុ​ភី ពុំមាន​ឪ​កាស​យកឈ្នះ​លើ​ផុង សិរិ បានឡើយ ក្នុងការ​ប្រកួត​៥​ទឹក​នោះ។​
​
ផុង សិរិ​នេះ ធ្លាប់​មក​ប្រកួត​នៅ​ស្រុក​ខ្មែរ​ម្តង​ហើយ ដោយ​ត្រូវ​បឺត ខាំ វាយ​ឲ្យ​ចេញ​បាយ​ក្នុង​ទឹក​ទី​៤ កាលពី​ប៉ុន្មាន​ឆ្នាំមុន​នៅលើ​សង្វៀន​SEATV​នេះ។
​
ចំពោះ ធន អៀង​ឡៃ អ្នក​ប្រដាល់​ស្រករ​ក្រោយ​នៃ​សមាគម​កីឡាប្រដាល់​ក្រសួងការពារជាតិ គេ​ប្រកួត​ចាញ់​អ្នក​ប្រដាល់​ថៃ​ចំណូល​ថ្មី​ឈ្មោះ​ម៉ា​ធី​( Mathy)​ ដោយ​ពិន្ទុ ក្នុង​ការជួប​គ្នា​ ទម្ងន់​៥៤​គីឡូក្រាម។
​
សូមបញ្ជាក់ថា ម៉ា​ធី នេះ គេ​ធ្លាប់​មក​ប្រកួត​នៅ​ស្រុក​ខ្មែរ​បី​លើក​ហើយ​កន្លងមក ដោយ​វាយ​ឈ្នះ​ទាំង​បី​លើក។ នេះ​ជា​លើក​ទី​៤ សម្រាប់​រូបគេ​ដែល​បាន​ឈ្នះ​អ្នក​ប្រដាល់​ខ្មែរ​( ធន អៀង​ឡៃ​) ម្នាក់ទៀត​នោះ។ ម៉ា​ធី​នេះ នៅ​ស្រុក​ថៃ គេ​ជា​ជើងឯក​រង​ខ្សែក្រវាត់ ​នៅ​ក្នុង​ប្រភេទ​ទម្ងន់​៥៤​គីឡូក្រាម​នេះ៕



​

Source: Kampuchea Thmey Daily