ភ្លៀងកក់ខែមួយមេធំ លាយឡំខ្យល់កន្ត្រាក់ បានវាយបំផ្លាញផ្ទះពលរដ្ឋជាង៥០ខ្នង នៅស្រុកត្រពាំងប្រាសាទ

Cambodia News March 25, 2019

ឧត្តរមានជ័យ ៖ ពីរថ្ងៃ ផ្ទះប្រជាពលរដ្ឋជាច្រើនខ្នង បានរងការខូចខាតដោយសារគ្រោះធម្មជាតិខ្យល់កន្ត្រាក់ ដូចជា របើកដំបូល,របើកជញ្ជាំង,ដួលរលំ កាលពីល្ងាចថ្ងៃទី២២,២៣ ខែមីនា ឆ្នាំ២០១៩ ក្នុងស្រុកចំនួន២ ជិត៥០ខ្នងផ្ទះ ក្នុងខេត្តឧត្តរមានជ័យ។

លោក អិន កាយ អធិការស្រុកត្រពាំងប្រាសាទបានឲ្យកម្ពុជាថ្មីដឹងថា កាលពីវេលាម៉ោង៦និង៣០នាទីល្ងាច នាថ្ងៃទី២២ ខែមីនា ឆ្នាំ២០១៩ មានអាកាសធាតុ មេឃភ្លៀងធ្លាក់លាយឡំនឹងខ្យល់កន្ត្រាក់លើភូមិត្រាំប៉ោង ឃុំព្រះប្រឡាយ ស្រុកត្រពាំងប្រាសាទ។ ខ្យល់បានបក់បោកបណ្តាលឲ្យរលំផ្ទះប្រជាពលរដ្ឋអស់ចំនួន១១ខ្នងផ្ទះ។ ក្នុងនោះមួយខ្នង ត្រូវបានរងការដួលរលំខូចខាតទាំងស្រុង។

រីឯ លោក ឃុន ភិន អធិការស្រុកបន្ទាយអំពិល ក៏បានឲ្យដឹងដែរថា នៅវេលាម៉ោង៧និង៣០នាទីយប់ថ្ងៃទី២៣ ខែមីនា ឆ្នាំ២០១៩ មានភ្លៀងធ្លាក់ខ្យល់កន្ត្រាក់ បណ្តាលឲ្យខូចខាតផ្ទះពលរដ្ឋនៅក្នុងស្រុកបន្ទាយអំពិល លើឃុំចំនួនបី សរុបចំនួន៣៥ខ្នងផ្ទះ រួមមាន ៖
១.ឃុំគោកមនចំនួន៥ខ្នងផ្ទះ
២.ឃុំបេងចំនួន១៨ខ្នង
៣.ឃុំអំពិលចំនួន១៣ខ្នងផ្ទះ។

ក្នុងនោះដែរ ផ្ទះធ្លាក់ពីជើងតាង,របើកដំបូលផ្ទះ,របើកសំយាបផ្ទះ,របើកជញ្ជាំងផ្ទះ និងខូចខាតដំបូលសាលារៀនផងដែរ៕