ប្រដាល់ ៖ អ្នកប្រដាល់ជើងខ្លាំងរបស់កម្ពុជា២រូប គឺផល សោភ័ណ្ឌ និង ចាន់ ប៊ុនហឿន បានវាយឈ្នះអ្នកប្រដាល់ថៃដូចគ្នា ក្នុងឡើងប្រកួតកាលពីយប់ថ្ងៃទី២៣ ខែមីនា ឆ្នាំ២០១៩ នៅលើសង្វៀនបាយ័នស្ទឹងមានជ័យនោះ។
អ្នកប្រដាល់ជើងខ្លាំងកម្ពុជា ផល សោភ័ណ្ឌ ក្លិបតាឡីដំរីមានរិទ្ធ បានវាយឈ្នះអ្នកប្រដាល់ថៃកូលាប ដាំ ប្រាន២៦(Kolabdam Phran26 ) ដោយពិន្ទុ បន្ទាប់ពីប្រកួតគ្នា៥ទឹកពេញនោះ។
យ៉ាងណា ការយកឈ្នះលើកូលាប ដាំ ប្រាន២៦ នេះ ផល សោភ័ណ្ឌ គេក៏យ៉ាប់ណាស់ដែរ ព្រោះអ្នកប្រដាល់ថៃម្នាក់នេះ រឹងមាំ និងមានស្នៀតប្រដាល់ល្អមិនចាញ់ សោភ័ណ្ឌ ប៉ុន្មានឡើយ។ អ្នកប្រដាល់ថៃនេះ កាលពីបីឆ្នាំមុន គេធ្លាប់ផ្ដួលអ្នកប្រដាល់ជើងខ្លាំងរបស់កម្ពុជាបីរូប ដែលមកលើកទី១ គេបានវាយឈ្នះផាន់ គ្រាន់ ដោយពិន្ទុ(២៤មេសា២០១៦) លើកទី២ បានវាយឈ្នះសេក គឹមរួន អ្នកប្រដាល់ក្លិបអង្គរមានជ័យដោយពិន្ទុ(២៤កក្កដា២០១៦ ) លើកទី៣ថ្ងៃទី០៩ ខែតុលា ឆ្នាំ២០១៦ គេបានវាយឈ្នះសូត្រ ប៊ុនធី ជើងខ្លាំងក្លិបបក្សីស្លាបដែកដោយពិន្ទុ ហើយលើកទី៤ថ្មីៗកន្លងទៅនេះ គេបានវាយឈ្នះសេង ស្រឿន ក្លិបមហិទ្ធរិទ្ធមាសរថ្ងកខេត្តស្វាយរៀងក្នុងទឹកទី៤ និងចុងក្រោយនេះ(០៨មីនា២០១៩) គេបានវាយឈ្នះចាន់ ប៊ុនលាភ ក្លិបនិរោធមានជ័យដោយពិន្ទុ ហើយពេលនេះ គេចាញ់ ផល សោភ័ណ្ឌ ដោយពិន្ទុ។
ចំពោះ ចាន់ ប៊ុនហឿន អ្នកប្រដាល់ក្លិបនិរោធមាន គេធ្វើបានល្អ ដោយបានផ្ដួលអ្នកប្រដាល់ថៃ យុគ ផេត ផេត កាសាម(Yokphetch Phetch karsamat )ក្នុងទឹកទី២។
យុគ ផេត ជាអ្នកប្រដាល់ថៃជើងចាស់ ធ្លាប់មកប្រកួតនៅកម្ពុជាប៉ុន្មានលើកហើយកន្លងមក តែលើកនេះត្រូវចាន់ ប៊ុនហឿន ប្រើពេលតែពីរទឹកប៉ុណ្ណោះ ផ្ដួលឲ្យបោះបង់ការប្រកួត។ យុគ ផេត ត្រូវប៊ុនហឿន ទាត់ឲ្យខូចដៃ មិនអាចបន្តការប្រកួតទៀតបាន។
សូមបញ្ជាក់ថា យុគ ផេតនេះ គេធ្លាប់ប៉ះជាមួយឃុន ឌីម៉ា ២ដង ដោយលើកទី១ វាយស្មើពិន្ទុគ្នា និងលើកទី២ មកសងសឹកនោះ ត្រូវឌីម៉ា វាយឲ្យសន្លប់ក្នុងទឹកទី២។ តែមកជួប ចាន់ ប៊ុនហឿន ត្រូវ ប៊ុនហឿន ស៊ីផុយទៅវិញ។
•ពុទ្ធ ឆាយរិទ្ធី ឈ្នះ ផេតឆ័ត្រឆ័យ ខណៈ មាជ សុខរ៉ា ចាញ់ ក្លាឃុនសឹក
អ្នកប្រដាល់ជើងខ្លាំងកម្ពុជាពុទ្ធ ឆាយរិទ្ធី អ្នកប្រដាល់ក្លិបពុទ្ធសេរីវង្សកីឡា បានប្រកួតឈ្នះអ្នកប្រដាល់ថៃផេត ឆ័ត្រឆ័យ សរ ប៊ុនយៀម (Phetchchharchai Sor.Bunyeam) ដោយពិន្ទុ ក្នុងកម្មវិធីប្រដាល់ខារ៉ាបាវ នៅសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យ ទី២៤ ខែមីនា ឆ្នាំ២០១៩ នៅលើសង្វៀនបាយ័នស្ទឹងមានជ័យ។
យ៉ាងណា ការឈ្នះរបស់ឆាយរិទ្ធី លើផេតឆ័ត្រឆ័យនេះ គឺឈ្នះដោយលក្ខណៈប្រផុតប្រផើយតែប៉ុណ្ណោះ។
ចំពោះ មាជ សុខរ៉ា អ្នកប្រដាល់ក្លិបថ្មគោលពោធិសែនជ័យវិញ គេប្រកួតចាញ់អ្នកប្រដាល់ថៃ ក្លាឃុនសឹក ផរ.ប៉ា យ៉ាស៊ូ(Klakhunserk Phor.Payasue )ដោយពិន្ទុ និងដោយវេទនាបំផុត។ ពួកគេទាំងពីរ ជួបប្រកួតគ្នាក្នុងប្រភេទទម្ងន់៦៧ គីឡូក្រាម។
មាជ សុខរ៉ា វាយបានល្អបានតែបីទឹកដំបូងប៉ុណ្ណោះ។ ចូលដល់ទឹកទី៤ សុខរ៉ាត្រូវ ក្លាឃុនសឹក វាយឲ្យអាជ្ញាកណ្ដាលរាប់៨ដល់ទៅ២ដង។ ហើយនៅពេលបន្តការប្រកួតទៀតនោះ គេកាន់តែទ្រុឌទ្រោមកម្លាំងថែមទៀត ដោយសារក្លាឃុនសឹក វាយសម្រុកដោយការដាល់និងទាត់ សឹងតែធ្វើឲ្យសុខរ៉ា ពុំអាចឆ្លងចូលទឹកទី៥បាន។
ចំពោះការប្រកួតរវាងអ្នកប្រដាល់រួមជាតិវិញ ឈាន រស្មី អ្នកប្រដាល់ក្លិបរាជសីហ៍ខេត្តរតនគិរី ត្រូវមាស សារ៉ាក់ អ្នកប្រដាល់ក្លិបអាណាចក្រគុនខ្មែរ វាយឲ្យបោះបង់ការប្រកួតក្នុងទឹកទី៤។ រស្មី ត្រូវ សារ៉ាក់ វាយឲ្យអាជ្ញាកណ្ដាលរាប់៨ក្នុងទឹកទី២ ពីរដង ទឹកទី៣ម្តង ហើយដួលម្តងទៀត ក៏ត្រូវអាជ្ញាកណ្ដាលបញ្ឈប់លែងឲ្យប្រកួតបន្តទៀត៕
Source: Kampuchea Thmey Daily
0 Comments