លីគកំពូលកម្ពុជា (Metfone Cambodian League) ឆ្នាំ២០១៩ អ្នកចាំទីក្រសួងការពារជាតិ អ៊ុំ វិចិត្រ បានរងរបួសស្មាខាងឆ្វេងរបស់ខ្លួន ពេលប្រកួតស្មើគ្នាជាមួយក្រុមភ្ញៀវអង្គរថាយហ្គឺរ ១ទល់១ កាលពីចុងសប្ដាហ៍ថ្មីៗនេះ ហើយរបួសនេះកើតឡើងដោយសារការហក់សង្គ្រោះបាល់ពុំបានសម្រេច ហើយបុកនិងបង្គោលទី។
អតីតកីឡាករអ្នកចាំទីក្រុមជម្រើសជាតិកម្ពុជារូបនេះបានបញ្ជាក់ថា៖«ពេលហ្នឹងខ្ញុំប្រឹងលោតមួយទំហឹង ព្រោះឃើញរាងឆ្ងាយដែរ តែដល់ពេលហក់ទៅក្រលេកកន្ទុយភ្នែកឃើញបង្គោលបាល់ចូល ក៏ប្រឹងផ្អៀងខ្លួនទម្លាក់ស្មាមកមុន ហើយបុកខ្ទាំសាច់ដុំតែម្ដង។ មួយថ្ងៃពីរថ្ងៃដំបូងរាងឈឺខ្លាំងដែរ លើកដៃអត់ចង់រួចទេ ចូលហាត់អត់កើតទៀត»។ កីឡាករ អ៊ុំ វិចិត្រ បានបន្តថា របួសស្មានេះអាចចំណាយពេលព្យាបាលយ៉ាងតិច១សប្ដាហ៍ ទើបអាចចូលហ្វឹកហាត់វិញបាន។ រូបគេកំពុងត្រូវរង់ចាំមើលបន្តទៀត ប្រសិនបើនៅតែបន្តអាការៈឈឺចាប់ ខ្លួនប្រហែលត្រូវទៅឲ្យគ្រូពេទ្យជំនាញពិនិត្យព្យាបាល។
សូមរំលឹកថា ក្រុមក្រសួងការពារជាតិ បានប្រកួតស្មើគ្នាជាមួយក្រុមភ្ញៀវអង្គរថាយហ្គឺរ ១ទល់១ លើទីលានកីឡដ្ឋានកងយោធពលខេមរភូមិន្ទ (ស្តាតចាស់) ខណៈកីឡាករ Ramos Alexis របស់ក្រុមភ្ញៀវតែតបញ្ចូលទីនៅនាទី៥៤ តែចូលដល់ម៉ោងបន្ថែម៩០+៦នាទីទៅហើយ ទើបខ្សែការពារវ័យក្មេង កាន់ ពិសាល អាចរកតាមស្មើបានវិញ។
សូមរំលឹកថា កីឡាករ អ៊ុំ វិចិត្រ មានភាពល្បីល្បាញកាលពីប៉ុន្មានឆ្នាំមុន ស្មើគ្នាជាមួយអ្នកចាំទី ស៊ូ យ៉ាទី របស់បឹងកេត បច្ចុប្បន្ន។ ប៉ុន្តែជាអកុសលកីឡាកររូបនេះបានរបួសស្រាំឆ្អឹងម្រាមដៃ នៅចុងឆ្នាំ២០១៤ ពេលចូលរួមហ្វឹកហាត់ក្នុងក្រុមជម្រើសជាតិកម្ពុជា។ នៅដើមឆ្នាំ ២០១៥ ក្រោមការជួយជ្រោមជ្រែងពីសហព័ន្ធកីឡាបាល់ទាត់កម្ពុជា និងក្លិបក្រសួងការពារផងដែរនោះ បានវះកាត់ដៃដែលឈឺរបស់ អ៊ុំ វិចិត្រ បានសម្រេចតែត្រូវរបួសនោះទើបតែជាដាច់ស្រឡះ។
កីឡាករវ័យ២៧ឆ្នាំរូបនេះ បានចូលរួមជាមួយក្រុមក្រសួងការពារជាតិ នៅឆ្នាំ២០១៨ ហើយបន្តលេងជាមួយក្រុមដែលមានមូលដ្ឋាននៅកណ្តាលរាជធានីមួយនេះរហូតដល់បច្ចុប្បន្ន។ រូបគេធ្លាប់ជាប់ឈ្មោះនៅក្នុងក្រុមជម្រើសជាតិតាំងពីឈុត U19 ដល់ឈុតធំផងដែរ។ បច្ចុប្បន្នរូបគេកំពុងដើរតួជាកីឡាករផងនិងជាគ្រូបង្វឹកអ្នកចាំទីផងក្រោយគ្រូបង្វឹកអ្នកចាំទី លោក សួង ភារម្យ ចាកចេញហើយទៅចូលរួមជាមួយក្រុមវិសាខា កាលពីដើមរដូវកាលឆ្នាំ២០១៨ កន្លងទៅ៕
Source: Kampuchea Thmey Daily
0 Comments