ភ្នំពេញ ៖ មន្ត្រីជាន់ខ្ពស់ធនាគារជាតិនៃកម្ពុជាបានជំរុញឲ្យរោងចក្រសហគ្រាសក្នុងវិស័យឯកជនបើកប្រាក់បៀវត្សជាប្រាក់រៀលជូនដល់កម្មកររបស់ខ្លួនដើម្បីចូលរួមលើកកម្ពស់ប្រាក់រៀលក្នុងស្រុកទាំងអស់គ្នា។
ថ្លែងនៅក្នុងពិធីបិទសិក្ខាសាលាផ្សព្វផ្សាយស្តីពី លទ្ធផលនៃការអង្កេតបឋម នៃគម្រោងអង្កេតដំណាក់កាលទី២ ដើម្បីលើកកម្ពស់ការប្រើប្រាស់ប្រាក់រៀលនៅកម្ពុជាកាលពីពេលថ្មីៗនេះលោកស្រីទាវ នាវ ច័ន្ទថាណា ទេសាភិបាលរង ធនាគារជាតិនៃកម្ពុជាបានលើកឡើងថា តាមតួលេខបឋម នៃការអង្កេតឃើញថា សម្រាប់ភ្នំពេញ និងខេត្តសៀមរាប មានការប្រើប្រាស់លុយដុល្លារច្រើនជាងគេ បើប្រៀបធៀបទៅនឹងតំបន់ដៃទែទៀត ក្នុងនោះអ្នករកលុយបានច្រើន ភាគច្រើនជាលុយបរទេសចំណែកតាមបណ្តារោងចក្រ សហគ្រាសបានបើកប្រាក់ខែជូនកម្មករជាប្រាក់បរទេសផងដែរ។
លោកស្រីបានបន្តថា «ដើម្បីលើកកម្ពស់ការប្រើប្រាស់ប្រាក់រៀល តាមរយៈការបង់លុយជាលុយខ្មែរ ខ្ញុំចង់ឃើញបណ្តារោងចក្រសហគ្រាសក្នុងវិស័យឯកជន បើកប្រាក់បៀវត្សជាប្រាក់រៀលជូនកម្មកររបស់ខ្លួន ដើម្បីចូលរួមលើកកម្ពស់ប្រាក់រៀល ដែលជាប្រាក់ក្នុងស្រុកទាំងអស់គ្នា»។
លោកស្រីនាវ ច័ន្ទថាណា បានបញ្ជាក់ថា ពាក់ព័ន្ធនឹងការចរាចរប្រាក់រៀលនេះ បច្ចុប្បន្នគ្រឹះស្ថានម៉ាក្រូហិរញ្ញវត្ថុ បានចរាចរប្រាក់កម្ចីជាលុយខ្មែរ ចំណែកអ្នកខ្ចីលុយពីធនាគារវិញ ភាគច្រើនពួកគេខ្ចីជាលុយដុល្លារ ក្នុងនោះអ្នកសន្សំលុយ ឬការដាក់លុយផ្ញើនៅធនាគារវិញ ក៏ភាគច្រើនជាលុយដុល្លារដូចគ្នាដែលបញ្ហានេះសូមឲ្យស្ថាប័នពាក់ព័ន្ធ គ្រឹះស្ថានម៉ាក្រូហិរញ្ញវត្ថុ ចូលរួមលើកទឹកចិត្តក្នុងការប្រើប្រាស់ប្រាក់រៀលឲ្យបានផុលផុស។
ចំណែក លោក យុន សុវណ្ណា នាយកប្រតិបត្តិសមាគមន៍មីក្រូហិរញ្ញវត្ថុកម្ពុជា បានលើកឡើងថា បច្ចុប្បន្នប្រជាពលរដ្ឋខ្មែរយើងមានការប្រើប្រាស់ប្រាក់រៀលច្រើន ក្នុងការទិញសម្ភារៈប្រើប្រាស់ ក៏ដូចជាការចំណាយផ្សេងៗ ប៉ុន្តែចំពោះការប្រើប្រាស់ក្នុងអាជីវកម្មវិញ ការប្រើប្រាស់រៀលក៏មានការកើនឡើង និងការប្រើប្រាស់ប្រាក់ដុល្លារ និងប្រាក់បាតនៅជាប់ព្រំដែន ក៏មានការកើនឡើងដូចគ្នា ដែលជាបញ្ហានេះយើងត្រូវតែយកចិត្តទុកដាក់ផងដែរ។
លោក Hidenobu Okada សាស្ត្រាចារ្យមកពីសកលវិទ្យាល័យ Hitosubashi ប្រទេសជប៉ុន បានលើកឡើងផងដែរថា នៅក្នុងប្រទេសកម្ពុជាដុល្លារនីយកម្មបានចាប់ផ្តើមឥតឈប់ឈរ គឺជំនួសដល់ប្រាក់រៀល ទាំងការបង់លុយនិងការសន្សំដោយសារទីផ្សារអំណោយផល ជាពិសេសទីផ្សារកម្ពុជាមានលក្ខណៈល្អប្រសើរ ដូច្នេះដុល្លារនីយកម្មនេះនៅតែបន្តរីកចម្រើនទៅទៀត គឺដោយសារសេដ្ឋកិច្ច និងលក្ខណៈអំណោយផលរបស់ប្រទេសកម្ពុជា។
លោកស្រីនាវ ច័ន្ទថាណាបានបញ្ជាក់ថា «ខ្ញុំជឿជាក់ថា ការប្រឹងប្រែងរួមគ្នារវាងធនាគារជាតិ និងអង្គការ JICA នឹងអាចសម្រេចគោលដៅរួមគ្នា ក្នុងការលើកកម្ពស់ការប្រើប្រាស់ប្រាក់រៀលយ៉ាងងាយស្រួល ហើយខ្ញុំសូមចូលរួមយ៉ាងសកម្ម ក្នុងការលើកកម្ពស់ការប្រើប្រាស់ប្រាក់រៀល នៅទូទាំងប្រទេសកម្ពុជា»៕
Source: Kampuchea Thmey Daily
0 Comments