ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម កាលពី ថ្ងៃទី២០ ខែមីនា ឆ្នាំ២០១៩ នៅទីស្តីការ ក្រសួង បាន ដឹកនាំអង្គប្រជុំត្រួតពិនិត្យបច្ចេកទេស ក្នុងការបង្វែរទឹកស្ទឹងព្រែកត្នោត ឆ្ពោះទៅកាន់ខេត្តតាកែវ ដើម្បីបញ្ចៀស ការលិចលង់ ខេត្តកំពង់ស្ពឺ កណ្តាល តាកែវ ពិសេសរាជធានីភ្នំពេញ នារដូវវស្សា។
ក្រសួងបានឲ្យដឹងថា ទឹកស្ទឹងព្រែកត្នោត ដែលជានិច្ចជាកាល នារដូវវស្សាតែងបង្កឡើងនូវជំនន់គំរាមកំហែងដល់ខេត្ត កំពង់ស្ពឺ កណ្តាល តាកែវ ពិសេសរាជធានីភ្នំពេញ។ ដើម្បី ដោះស្រាយ បញ្ហានេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានបន្តដឹកនាំអង្គប្រជុំត្រួតពិនិត្យបច្ចេកទេស ក្នុងការបង្វែរទឹកស្ទឹងព្រែកត្នោត ទៅកាន់ ខេត្តតាកែវ ទុកជាវិធានដើម្បីរំដោះទឹកជំនន់ផង និងស្រោចស្រពផលដំណាំផង។
ក្រសួងបានបន្តថា គោលបំណងសំខាន់នៃគំរោងនេះ គឺត្រូវរកដំណោះស្រាយជាបន្ទាន់ព្រោះដំណើរការអភិវឌ្ឍន៍មិនអនុញ្ញាតឲ្យប្រើប្រាស់នូវហេដ្ឋារចនាសម្ព័ន្ធ ដែលមានស្រាប់ទៀតនោះឡើយ។ ដូចនេះទើបគោលបំណងនៃគំរោងគឺបង្វែរបរិមាណទឹកដែលមានធារទឹកអតិបរិមារហូតទៅដល់ ១២០០-១៥០០ម៉ែត្រគូប/s ដោយចាប់បង្វែរពីភាគខាងលើមុនធ្លាក់មកដល់សំណង់៧មករាតម្រង់ឆ្ពោះទៅកាន់ខេត្តតាកែវដោយទុកជាវិធានដើម្បីរំដោះទឹកជំនន់ផង និងស្រោចស្រពផលដំណាំផង ដោយរក្សាទឹកតាមលំហូរស្ទឹងព្រែកត្នោតចាស់ក្នុងកម្រិតសមល្មមដែលអាចធានាបានតែប៉ុណ្ណោះ៕
Source: Kampuchea Thmey Daily
0 Comments