សម្ដេចសង្ឃរាជ មានព្រះបន្ទូលថា អាជ្ញាធរ និងប្រធានសហគមន៍ ត្រូវសហការគ្នា អនុវត្តន៍គម្រោងមជ្ឈមណ្ឌលវប្បធម៌សន្តិភាពឲ្យបានជោគជ័យ

Cambodia News March 22, 2019

សៀមរាប ៖ សម្ដេចសង្ឃរាជ ទេព វង្ស មានព្រះបន្ទូលកាលពីពេលថ្មីៗនេះថា ប្រធានសហគមន៍ប្រើប្រាស់ទំនប់អាងទឹកជ្រាវ ត្រូវសហការជាមួយអាជ្ញាធរមូលដ្ឋាន អនុវត្តគម្រោងមជ្ឈមណ្ឌលវប្បធម៌សន្តិភាព ឲ្យបានជោគជ័យ ទោះមានការលំបាកប៉ុណ្ណា ក៏ត្រូវព្យាយាម។

សម្តេចសង្ឃរាជ មានព្រះបន្ទូលនេះ គឺកាលពីរសៀលថ្ងៃទី១៩មីនា នៅចំណុចសាលាឆទាន ទំនប់ទឹក៧៨ ក្នុងសង្កាត់ជ្រាវ ក្រុងសៀមរាប ខណៈសម្តេចយាងទៅពិនិត្យការដ្ឋានសាងសង់មជ្ឈមណ្ឌលវប្បធម៌សន្តិភាព ឬ បារាយសិប្បនិម្មិត។

សម្តេចបន្តថា ក្រោយពីគម្រោងនេះចាប់ដំណើរការ ក៏លេចឮពាក្យថា សម្តេចផ្ទាល់បានចេញលិខិតនិរាករណ៍ ដោយសារតែអ្នកអនុវត្តន៍គម្រោងនេះ ជីកយកអាចម៍បាតបារាយណ៍លក់។ ចឹងទេ ចាំបាច់ ត្រូវតែចុះមកពិនិត្យ ហើយផ្តល់ព័ត៌មានដល់អ្នកកាសែត ដើម្បីផ្សព្វផ្សាយកុំឲ្យខុសការពិត។

សម្តេចបញ្ជាក់ថា រឿងសាងសង់មជ្ឈមណ្ឌលវប្បធម៌សន្តិភាព ឬបារាយណ៍សិប្បនិម្មិត គឺគ្មានពាក្យថា និរាករណ៍នោះឡើយ។

ប្រធានសហគមន៍បឹងពារាំង និងជាប្រធានសហគមន៍ទំនប់ទឹងជ្រាវ រួមទាំងលោកចៅសង្កាត់ជ្រាវ ត្រូវសហការជាមួយបងប្អូនប្រជាពលរដ្ឋ និងអាជ្ញាធរ បន្តអនុវត្តគម្រោងនេះ ឲ្យបានជោគជ័យ ទោះបីមានដៃគូបរទេសមកសហការ ឬមិនមានក៏ដោយ។ សុំកុំធ្វើអ្វីខុសពីការពិត ហើយក៏សុំកុំធ្វើអ្វីដែលមិនចំណេញ។ ចំពោះអ្នកដែលនិយាយខុសការពិត ឬផ្សព្វផ្សាយខុសការពិត អាចទទួលបាបកម្ម។

ព្រះអង្គបន្តថា ព្រះអង្គមានព្រះជន្ម៨៨ឆ្នាំហើយ ពុំមានលទ្ធភាពរកថវិកាមកកសាងបារាយណ៍នេះទេ។ ដូច្នេះហើយ អ្នកអនុវត្ត ត្រូវចេះប្រើវិធីណាដែលមានផលប្រយោជន៍ ដែលចំណេញ គឺយកស្លឹកត្នោត ខ្ចប់ស្ករត្នោត។ ពីព្រោះថា គម្រោងនេះ នឹងមានគ្រប់យ៉ាងដូចជា សាលារៀន មន្ទីរពេទ្យ ភោជនីយដ្ឋាន..។..ល។ ចឹងទេ កូនចៅជំនាន់ក្រោយ អាចមានឱកាសរកចំណូលដើម្បីផ្គត់ផ្គង់គ្រួសារ តាមរយៈភ្ញៀវទេសចរជាតិ និងអន្តរជាតិ មកកម្សាន្តក្នុងតំបន់ទេសចរណ៍ថ្មី ដែលស្ថិតក្នុងសង្កាត់ជ្រាវ ក្រុងសៀមរាបនេះ។

ក្រៅពីបង្កើតមជ្ឈមណ្ឌលវប្បធម៌សន្តិភាព ឲ្យក្លាយជាតំបន់ទេសចរណ៍ថ្មីហើយ ត្រូវរួមគ្នាធ្វើផ្លូវចូលទៅតំបន់ទេសចរណ៍ វប្បធម៌ធម្មជាតិបឹងពារាំង ឲ្យបានធំទូលាយដើម្បីងាយស្រួលអ្នកទេសចរណ៍ ចូលទៅទស្សនាព្រៃលិចទឹក និងសត្វស្លាបទឹក ព្រមទាំងជីវចម្រុះ នៅក្នុងតំបន់នោះ។ ជាមួយគ្នានោះ សម្ដេចសង្ឃរាជ ទេព វង្ស ក៏បានទិញកូនឈើចំនួន៥០០០ដើម ត្រៀមដាំនាដើមរដូវវស្សា ក្នុងភូមិសាស្ត្រសង្កាត់ជ្រាវផងដែរ។ ព្រះអង្គបញ្ជាក់ថា ពុំមានការនិរាករណ៍ច្បាប់សាងសង់បារាយណ៍នេះឡើយ។ ដូច្នេះ សូមអ្នកកាសែត និងមហាជនជ្រាបជាព័ត៌មានផងចុះ៕