ប៉ៃលិន ៖ នាព្រឹកថ្ងៃទី២១ ខែមីនា ឆ្នាំ២០១៩ លោកវរសេនីយ៍ទោ រី តារា អធិការនគរបាលស្រុកសាលាក្រៅ បានដឹកនាំកិច្ចប្រជុំបូកសរុប សភាពការណ៍ លទ្ធផលកិច្ចប្រតិបត្តិការ រក្សាសន្តិសុខសង្គម និងអនុវត្តការងារនគរបាល និងសហគមន៍ ប្រចាំខែមីនា និងទិសដៅភារកិច្ចបន្ត ខែមេសា ដើម្បីត្រៀមលក្ខណៈបង្ការ រក្សាសន្តិសុខ សណ្ដាប់ធ្នាប់សង្គម សុវត្ថិភាព ដល់ប្រជាពលរដ្ឋក្នុងស្រុកសាលាក្រៅ។
កិច្ចប្រជុំនេះ ក៏មានការចូលរួមពី លោកអធិការរងស្រុក លោក លោកស្រីក្រោមឱវាទអធិការនគរបាលស្រុក នាយប៉ុស្តិ៍រដ្ឋបាលទាំងបួន នៃអធិការដ្ឋាននគរបាលស្រុកសាលាក្រៅ សរុប៤២រូប។
បន្ទាប់ពីលោកអនុសេនីយ៍ត្រី ពៅ សារ៉ាន់ នាយផ្នែកសេនាធិការ និងលោកអនុសេនីយ៍ឯក អ៊ឹម ឬទ្ធី អធិការរងស្រុក បានអានរបាយការណ៍ និងលិខិតបង្គាប់ការរួចមក លោកវរសេនីយ៍ទោ រី តារា អធិការនគរបាលស្រុកសាលាក្រៅ ដាក់បទបញ្ជាឲ្យមន្ត្រីក្រោមឱវាទ ត្រូវខិតខំយកចិត្តទុកដាក់ការងារសន្តិសុខ សុវត្ថិភាព សណ្ដាប់ធ្នាប់ សាធារណៈឲ្យបានល្អបន្តទៀតតាមជំនាញរៀងៗខ្លួន។
លោកអធិការ បានបន្តថា ៖ គ្រប់បណ្ដាផែនចំណុះអធិការទាំងអស់ត្រូវតែរួមរក្សាសាមគ្គីគ្នា ដើម្បីបង្កើនប្រសិទ្ធភាពការងារ និងត្រូវក្ដាប់សភាពការណ៍ក្នុងមូលដ្ឋាន ឲ្យបានល្អប្រសើរ ហើយប្រសិនបើមានហេតុការណ៍អ្វីកើតឡើង ត្រូវចេញប្រតិបត្តិការភ្លាមៗ និងរាយការណ៍ជូនថ្នាក់លើជាបន្ទាន់ផងដែរ។ ជាមួយគ្នានេះកងកម្លាំងទាំង ត្រូវរក្សា និងពង្រឹងការ សាមគ្គីភាពល្អ និងគ្នាក្នុងអង្គភាព ,ការរួមគ្នាទប់ស្កាត់បទល្មើសព្រហ្មទណ្ឌគ្រប់ប្រភេទ ,ការបង្ការ និងបង្ក្រាបបទល្មើសគ្រឿងញៀន, ការចូលរួមគោរពច្បាប់ចរាចរណ៍, ការលុបបំបាត់បទល្មើសសេដ្ឋកិច្ចគ្រប់ប្រភេទ និងត្រូវគោរព និងអនុវត្តតាមគោលនយោបាយភូមិ-ឃុំមានសុវត្ថិភាពទាំង៩ចំណុចរបស់រាជរដ្ឋាភិបាលកម្ពុជា។
ជាមួយគ្នានេះ លោកអធិការ ក៏បានបញ្ជាក់ដែរថា មន្ត្រីដែលទទួលបន្ទុកធ្វើអត្តសញ្ញាណប័ណ្ណ ត្រូវពង្រឹងការងារនេះឲ្យបានល្អប្រសើរ ធ្វើយ៉ាងណាបម្រើប្រជាពលរដ្ឋឲ្យបានទាន់ពេលវេលា និងមិនត្រូវធ្វើតាមចិត្តប្រជាពលរដ្ឋឡើយ ដូចជា ពលរដ្ឋខ្លះឲ្យមន្ត្រីយើងធ្វើ សុខចិត្តផ្តល់ថវិកាឲ្យមន្ត្រីជាដើម ប្រការមិនត្រូវយកថវិកាឡើយ ព្រោះវាអាចប៉ះពាល់ធ្ងន់ដល់អង្គភាព និងកិត្តិយសយើងផងដែរ៕
Source: Kampuchea Thmey Daily
0 Comments