ភ្នំពេញ ៖ ដោយអាចទទួលយកបាននូវការសម្របសម្រួលវិវាទរបស់អាជ្ញាធរខណ្ឌដូនពេញនោះបានធ្វើឲ្យភាគីទាំងសងខាងដែលមានទំនាស់គ្នាជាយូរមកហើយនោះ អាចទទួលយកបាន និងសន្យាថា ឈប់មានទំនាស់គ្នាទៀតហើយ ចាប់ពេលនេះទៅ។
ជាក់ស្ដែងនៅថ្ងៃព្រហស្បតិ៍ ០១រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែមីនា ឆ្នាំ២០១៩វេលាម៉ោង០៨និង៣០នាទី លោក ម៉ុក ច័ន្ទករុណា អភិបាលរង នៃគណៈអភិបាលខណ្ឌដូនពេញ បានដឹកនាំកិច្ចប្រជុំសម្របសម្រួលករណីវិវាទការសាងសង់ ដែលស្ថិតនៅភូមិ៤ សង្កាត់ជ័យជំនះ ខណ្ឌដូនពេញ។
ក្រោយពីសម្របសម្រួលរួចមក ភាគីទាំងពីរ បានព្រមព្រៀងគ្នាដោយដើមបណ្ដឹង ទទួលយកដំណោះស្រាយពីចុងបណ្តឹង គឺចុងបណ្តឹង ធានារកទីតាំងរស់នៅបណ្ដោះអាសន្ន ឬ ផ្តល់ជាប្រាក់ជាក់ស្តែងដល់ដើមបណ្តឹង ដើម្បីឲ្យក្រុមជាងចុះធ្វើការជួសជុល។ ចំណែកចុងបណ្តឹង ធានាដឹកជញ្ជូនសម្ភារៈឲ្យដើមបណ្តឹងទៅកាន់ទីតាំងរស់នៅបណ្ដោះអាសន្ន និងជូនដំណឹងដល់ដើមបណ្ដឹង អំពីកាលកំណត់ថ្ងៃចុះជួសជុល នៅថ្ងៃទី២៥ ខែមីនា ឆ្នាំ២០១៩នេះផងដែរ។
គួរបញ្ជាក់ផងដែរថា នៅថ្ងៃដដែលនោះដែរ វេលាម៉ោង១៤និង៣០នាទី លោកអភិបាលរងខណ្ឌ បានដឹកនាំកិច្ចប្រជុំស្តីពីការគ្រប់គ្រងសំណង់ និងដោះស្រាយវិវាទខណ្ឌ ប្រចាំខែកុម្ភៈ និងលើកទិសដៅសម្រាប់ខែមីនា និងមេសា ឆ្នាំ២០១៩ ដោយរបៀបវារៈសំខាន់ៗរួមមាន ៖
ទី១.ការងារពង្រឹងយន្តការគ្រប់គ្រងសំណង់ និងការដោះស្រាយវិវាទខណ្ឌសង្កាត់
ទី២.ការងារពង្រឹងយន្តការច្រកចេញចូលតែមួយ
ទី៣.ការងារពង្រឹងការអនុញ្ញាតផ្តល់ទីតាំងសង់រោងការ រោងបុណ្យ រោងពិធីផ្សេងៗ
ទី៤.ការងារពង្រឹងការប្រគល់ភារកិច្ចជូនភ្នាក់ងារអនាម័យ ( ដែលមានស្រាប់ ) ធ្វើការរាយការណ៍ពីទីតាំងសំណង់គ្មានច្បាប់ លើសច្បាប់ ការហ៊ុមព័ទ្ធការដ្ឋាន និងសំណង់ខុសបច្ចេកទេស៕
Source: Kampuchea Thmey Daily
0 Comments