សៀមរាប ៖ កាលពីវេលាម៉ោង១២និង៣០នាទី ថ្ងៃទី១០ ខែមីនា ឆ្នាំ២០១៩ អគ្គិភ័យ បានឆាបឆេះព្រៃនៅខាងកើតព្រលានអន្តរជាតិសៀមរាប ស្ថិតក្នុងភូមិខ្វៀន សង្កាត់គោកចក ក្រុង/ខេត្តសៀមរាប។
លោកស្នងការរង ទទួលបន្ទុកផ្នែកពន្លត់អគ្គិភ័យ នៃស្នងការខេត្តបានឲ្យដឹងដែរថា ក្រោយទទួល សេចក្តីរាយការណ៍ពីបងប្អូនប្រជាពលរដ្ឋ កម្លាំងនគរបាលប៉ុស្ដិ៍រដ្ឋបាលសង្កាត់គោកចក និងកម្លាំងប្រជាការពារ ដឹកនាំដោយ លោកវរសេនីយ៍ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាប ដោយមានការចូលរួម ពីបងប្អូនប្រជាពលរដ្ឋ និងអាជ្ញាធរមូលដ្ឋាន បានយកមែកឈើវ៉ៃ ភ្លើង ក្នុងនោះក៏មានការជួយអន្តរាគមន៍ ពីកម្លាំងនគរបាលការិយាល័យនគរបាលបង្ការពន្លត់អគ្គិភ័យនិងសង្គ្រោះ នៃស្នងការដ្ឋាននគរបាលខេត្តសៀមរាប២គ្រឿង រថយន្តអាជ្ញាធរអប្សរា ការពារព្រៃឈើ ខេត្តសៀមរាប២គ្រឿង និងរថយន្ត កងរាជអាវុធហត្ថ១គ្រឿង បានសហការ ធ្វើការ ពន្លត់ រហូតដល់វេលាម៉ោង១៤:៣០នាទី អណ្ដាតភ្លើង បានរលត់វិញ ដោយមិនបណ្តាលអោយប៉ះពាល់ដល់លំនៅឋាន និងអាយុជីវិត របស់បងប្អូនប្រជាពលរដ្ឋ ឡើយ។លោកស្នងការ រង បានបន្តទៀតថា មូលហេតុនេះគឺបណ្តាលមកពីក្មេងដុតស្មៅក្នុងព្រៃ។
លោកស្នងការរង ទទួលបន្ទុកផ្នែកពន្លត់អគ្គិភ័យ នៃស្នងការខេត្ត សូមធ្វើការអំពាវនាវ ដល់បងប្អូនប្រជាពលរដ្ឋមេត្តា បង្កើនការប្រុងប្រយ័ត្នជាប្រចាំ ចំពោះបញ្ហាគ្រោះអគ្គិភ័យ ដែលកើតឡើងជាយកថាហេតុ ដោយបង្កើនការត្រួតពិនិត្យ បន្ថែមទៀត រាល់អបករណ៍ប្រើប្រាស់ចរន្តអគ្គិសនី ភ្លើងធូប ទៀន ចង្ក្រាន មុនបងប្អូនចាកចេញដំណើរពីលំនៅឋាន ទៅប្រកបមុខរបរ ឬដើរលេងកម្សាន្ត។
ដើម្បីត្រៀមលក្ខណៈឆ្លើយតបនឹងបញ្ហាគ្រោះអគ្គិភ័យនេះ សូមបងប្អូនមេត្តា ត្រៀមបម្រុងស្តុបទឹកទុក ក្នុងពាងឬ ស៊ីទែន និងប្រព័ន្ធបូមទឹក ឬបំពង់ពន្លត់អគ្គិភ័យ នៅក្នុងគេហដ្ឋានរបស់បងប្អូនជានិច្ច ដើម្បីជាផ្នែកមួយ ត្រៀមទប់ស្កាត់ពន្លត់ ភ្លាមៗកម្រិតបឋម និងសូមផ្តល់ការសហការ រាយការណ៍ មកនគរបាលយើងខ្ញុំ អោយបានទាន់វេលា៕
Source: Kampuchea Thmey Daily
0 Comments