បន្ទាយមានជ័យ ៖ យុវជនម្នាក់ ជួលម៉ូតូគេមួយថ្ងៃក្នុងតម្លៃ២០០បាតជិះ ផុងខ្លួន មិនហ៊ានយកមកឲ្យម្ចាស់គេវិញ ជិះបាន២ខែ ទើបម្ចាស់ម៉ូតូប្តឹងចាប់ដាក់គុក។
ជនរងគ្រោះឈ្មោះ អ៊ិន ដារ៉ាវុធ ភេទ ប្រុស អាយុ ៤០ឆ្នាំ រស់នៅក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានបំភ្លឺឲ្យដឹងថា កាលពីថ្ងៃទី១៨ ខែមីនា ឆ្នាំ២០១៩ ជនសង្ស័យខាងលើ បានជួលម៉ូតូម៉ាក ZOOMER-X ពណ៌លឿង ស៊េរីឆ្នាំ២០១៤ ពីខ្លួន ក្នុងតម្លៃ១ថ្ងៃ ២០០បាត។ បន្ទាប់ពីជួលម៉ូតូហើយជនសង្ស័យបានបាត់ដំណឹងសូន្យឈឹងទាក់ទងមិនបាន បើគិតពីថ្ងៃជួល មកទល់ពេលដែលសមត្ថកិច្ចឃាត់ខ្លួនបាន គឺមានរយៈពេល ៦០ថ្ងៃមកហើយ។
ក្រោយពីទទួលបានពាក្យបណ្តឹង កម្លាំងមូលដ្ឋានកងរាជអាវុធហត្ថក្រុង ដឹកនាំដោយលោកវរសេនីយ៍ទោ អ៊ុំ សាខន នាយរងសេនាធិការ ប្រចាំការមូលដ្ឋានកងរាជអាវុធហត្ថក្រុងប៉ោយប៉ែត បានចុះឃាត់ខ្លួនជនសង្ស័យបាន១នាក់ ឈ្មោះ សុខ ប៊ុនទី ភេទ ប្រុស អាយុ ១៩ឆ្នាំ រស់នៅភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត នៅថ្ងៃទី២៤ ខែមីនា ឆ្នាំ២០១៩ វេលាម៉ោង៣រសៀល នៅចំណុចម្តុំខារ៉ាអូខេឌីហ្គោល ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ជនសង្ស័យ ត្រូវបានបញ្ជូនមកទីបញ្ជាការកងរាជអាវុធហត្ថខេត្ត ដើម្បីចាត់ការបន្ត។
លោកវរសេនីយ៍ទោ ព្រហ្ម ថេង ប្រធានមន្ទីរយុត្តិធម៌ បានឲ្យដឹងថា ក្រោយពីធ្វើការសាកសួរ ជនសង្ស័យបានឆ្លើយសារភាពថា ខ្លួនពិតជាបានជួលម៉ូតូពីជនរងគ្រោះពិតប្រាកដមែន ដោយជិះជ្រុលខ្លួន ហើយមិនបានទាក់ទងប្រាប់ទៅម្ចាស់ម៉ូតូ។ លោកវរសេនីយ៍ទោ ព្រហ្ម ថេង បានបញ្ជាក់បន្ថែមទៀតថាផ្អែកលើចម្លើយសារភាពរបស់ជនសង្ស័យឃើញថាមានតម្រុយពិរុទ្ធភាពនៃបទល្មើសជាក់លាក់ ជនសង្ស័យខាងលើ អាចត្រូវចោទពីបទ រំលោភលើទំនុកចិត្ត កម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យ ទៅតុលាការដើម្បីចាត់ការទៅតាមផ្លូវច្បាប់ហើយ៕
Source: Kampuchea Thmey Daily
0 Comments