ឆេះរថយន្ត ឡង់រ៉ូវ៉ែ មួយគ្រឿងយ៉ាងសន្ធោសន្ធៅ អស់ទាំងស្រុងនៅជិតភូមិវប្បធម៌

Cambodia News March 25, 2019

សៀមរាប ៖ រថយន្តស៊េរីទំនើបម៉ាក ឡង់រ៉ូវ៉ែ មួយគ្រឿង បានឆាបឆេះយ៉ាងសន្ធោសន្ធៅ អស់ទាំងស្រុងនៅកណ្តាលក្រុងសៀមរាប ទោះបីពលរដ្ឋនិងសមត្ថកិច្ចប្រឹងជួយពន្លត់យ៉ាងណាក៏នៅតែជួយមិនបាន។

ហេតុការណ៍បង្កការភ្ញាក់ផ្អើលនេះ កើតឡើងនៅ វេលាម៉ោង ៨និង០០នាទីថ្ងៃទី២៤ ខែមីនា ឆ្នាំ២០១៩ ក្នុងភូមិ កសិកម្ម សង្កាត់ ស្រង៉ែ ក្រុង /ខេត្តសៀមរាប ហើយរលត់ទៅវិញនៅម៉ោង៨និង៥០នាទីថ្ងៃដដែល។

លោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យបង្ការពន្លត់អគ្គិភ័យ និង សង្គ្រោះនៃស្នងការដ្ឋានខេត្តសៀមរាប បានឲ្យដឹងថា មានករណីឆ្លងចរន្តខ្សែភ្លើងក្នុងរថយន្តរ៉ែងរូវែមួយគ្រឿង នៅកន្លែងកើតហេតុតាមបណ្តោយផ្លូវជាតិលេខ៦ ស្ថិតនៅភូមិ កសិកម្ម សង្កាត់ ស្រង៉ែ ក្រុងសៀមរាប ដែលមានម្ចាស់ឈ្មោះ ថុង ចរិយា ភេទ ប្រុស អាយុ ៣៥ ឆ្នាំ រស់នៅភូមិ ស្វាយដង្គំ សង្កាត់ស្វាយដង្គំ ក្រុង ខេត្ត សៀមរាប។ ក្នុងហេតុការណ៍នេះដែរ រថយន្តពន្លត់អគ្គិភ័យ របស់ស្នងការខេត្តចេញ ២គ្រឿង រថយន្ត ភូមិវប្បធម៌ ១គ្រឿង បាញ់ទឹកអស់បី ឡាន រលត់វិញ ជាស្ថាពរ។ តែរថយន្ត និងទ្រព្យសម្បត្តិខូចទាំងស្រុង។

លោកបន្តថា តាមការសួរនាំទៅជនរងគ្រោះ បានឲ្យដឹងថា ការឆាបឆេះនេះគឺមិនដឹងមូលហេតុសោះឡើយ ជិះក្នុងឡានសុខៗស្រាប់តែឆេះសន្ធោសន្ធៅតែម្តង សំណាងល្អចុះពីរថយន្តទាន់៕