រដ្ឋបាលខេត្តរតនគិរី ប្រារព្ធទិវាទីក្រុងស្អាតលើកទី៧ ក្រោមប្រធានបទ ទីក្រុងស្អាត ទីក្រុងមានភាពកក់ក្តៅ

រតនគិរី ៖ នាព្រឹកថ្ងៃទី២៤ ខែមីនា ឆ្នាំ២០១៩ លោក មួង ប៉ាង អភិបាលរងខេត្តតំណាង លោក ថង សាវុន អភិបាល នៃគណៈអភិបាលខេត្តរតនគិរី បានអញ្ជើញជាអធិបតីភាព ក្នុងទិវាទីក្រុងស្អាតលើកទី៧ ក្រោមប្រធានបទ “ទីក្រុងស្អាត ទីក្រុងផ្តល់ភាពកក់ក្តៅ” នៅបរិវេណមន្ទីរវប្បធម៌ និងវិចិត្រសិល្បៈខេត្ត ស្ថិតក្នុងសង្កាត់បឹងកន្សែង ក្រុងបានលុង ខេត្តរតនគិរី។

ទិវាទីក្រុងស្អាត លើកទី៧ ឆ្នាំ២០១៩នេះ មានការចូលរួមកិច្ចសហការរៀបចំពីសាលាក្រុងបានលុង មន្ទីរបរិស្ថានខេត្ត មន្ទីរទេសចរណ៍ខេត្ត ថ្នាក់ដឹកនាំ មន្ត្រីរាជការ មន្ទីរពាក់ព័ន្ធនានាក្នុងខេត្ត អាជីវករ សិស្សនិស្សិត និងប្រជាពលរដ្ឋចូលរួមប្រមាណ ជិត២.០០០នាក់។

នៅក្នុងពិធីនេះដែរ លោក មួង ប៉ាង បានលើកឡើងថា បើយើងចង់ឲ្យមានទីក្រុងស្អាតល្អបាន គឺផ្តើមចេញពីយើងទាំងអស់គ្នា ដោយយើងគ្រប់រូបនាំគ្នាចូលរួមអនុវត្ត រក្សាសម្អាតអនាម័យ បរិស្ថានល្អគ្រប់ពេលវេលា គ្រប់ទីកន្លែង។

លោកអភិបាលរងបានបញ្ជាក់ថា ដើម្បីរក្សាបាននូវជយលាភីជាប់ចំណាត់ថ្នាក់ទទួលពានរង្វាន់ទីក្រុងស្អាត ដូច្នេះយើងទាំងអស់គ្នា នាំគ្នាចូលរួមបន្តជាប្រចាំដោយនាំគ្នាសម្អាតអនាម័យ បរិស្ថាន នៅតាមផ្ទះ ទីកន្លែងសាធារណៈនានា ក្នុងទីក្រុង និងជនបទ ដើម្បីទទួលបានមកវិញនូវសុខភាពល្អ ទីក្រុងស្អាត និងបានទាក់ទាញភ្ញៀវទេសចរជាតិ និងអន្តរជាតិ មកទស្សនា និងឆ្លងកាត់ ហើយបានចូលរួមប្រលងប្រណាំងទីក្រុងស្អាតពីថ្នាក់ជាតិ និងថ្នាក់តំបន់ផងដែរ។

លោកបានបន្តថា ការចូលរួមសម្អាតអនាម័យបរិស្ថាននេះ ការរស់នៅក្នុងជីវភាពគ្រួសារម្នាក់ៗ យើងបានអនុវត្តជាប្រចាំជាយូរមកហើយ ដោយបានហូបស្អាត ផឹកទឹកស្អាត និងរស់ នៅស្អាតយើងគ្រាន់តែបន្តការថែទាំនៅតាមទីសាធារណៈបន្ថែមទៀត ដើម្បីឲ្យទីក្រុងយើងជាទីក្រុងពណ៌បៃតង បរិស្ថានល្អ ទីក្រុងស្អាត ជាមុខមាត់របស់ប្រជាពលរដ្ឋខេត្តយើងទាំងអស់គ្នា។

នៅក្នុងឱកាសនោះដែរ លោក បានអានសាររបស់ សម្ដេចតេជោ នាយករដ្ឋមន្ត្រី ហ៊ុន សែន ប្រធានកិត្តិយស នៃគណៈកម្មាធិការជាតិវាយតម្លៃទីក្រុងស្អាតជូនអង្គពិធី រួចនាំគ្នាដើររើសសំរាមសម្អាតទីក្រុងទាំងអស់គ្នា ធ្វើការសម្អាតអនាម័យតាមដងផ្លូវសំខាន់ៗសួនសាធារណៈ ដើម្បីឲ្យទីសាធារណៈក្រុងបានលុង មានភាពស្រស់បំព្រង៕